নতুন চৰকাৰৰ প্ৰথমখন কেবিনেট বৈঠকৰ অন্তত মুখ্যমন্ত্ৰী হিমন্ত বিশ্ব শৰ্মাই ঘোষণা কৰে যে অহা ৬ মাহৰ বাবে ৰাজ্যৰ কোনো মন্ত্ৰী বা চৰকাৰী বিষয়াই বিদেশ ভ্ৰমণ কৰিব নোৱাৰিব
অসমত ধাৰাবাহিকভাৱে তৃতীয়বাৰৰ বাবে ক্ষমতালৈ অহা বিজেপি নেতৃত্বাধীন এনডিএ চৰকাৰে কাৰ্যভাৰ গ্ৰহণ কৰিয়েই এক গুৰুত্বপূৰ্ণ সিদ্ধান্ত গ্ৰহণ কৰিছে । বুধবাৰে অনুষ্ঠিত চৰকাৰৰ প্ৰথমখন কেবিনেট বৈঠকৰ অন্তত মুখ্যমন্ত্ৰী হিমন্ত বিশ্ব শৰ্মাই ঘোষণা কৰে যে অহা ৬ মাহৰ বাবে ৰাজ্যৰ কোনো মন্ত্ৰী বা চৰকাৰী বিষয়াই বিদেশ ভ্ৰমণ কৰিব নোৱাৰিব ।
মুখ্যমন্ত্ৰীগৰাকীয়ে সংবাদ মাধ্যমৰ আগত স্পষ্ট কৰি দিয়ে যে এই নিষেধাজ্ঞা চৰকাৰী আৰু বেচৰকাৰী উভয় ভ্ৰমণৰ ক্ষেত্ৰতে প্ৰযোজ্য হ’ব । আনকি কোনো বিষয়াই নিজৰ ব্যক্তিগত খৰচত বিদেশলৈ যাব বিচাৰিলেও বৰ্তমানৰ বাবে তাক অনুমতি দিয়া নহ’ব ।
সিদ্ধান্তৰ মূল দিশসমূহ :
ছয় মহীয়া নিষেধাজ্ঞা : প্ৰথম ৬ মাহৰ বাবে এই নিয়ম বলবৎ থাকিব ।
সকলোৰে বাবে সমানে প্ৰযোজ্য : মন্ত্ৰী আৰু আমোলা-বিষয়া সকলোৰে ক্ষেত্ৰতে এই নিষেধাজ্ঞা আৰোপ কৰা হৈছে ।
ব্যক্তিগত ভ্ৰমণতো বাধা : নিজৰ ব্যক্তিগত ব্যয়ৰে ভ্ৰমণ কৰিলেও অনুমতি লাভ নকৰিব ।
জৰুৰীকালীন ৰেহাই : কেৱল জৰুৰীকালীন পৰিস্থিতি বা চিকিৎসাৰ দৰে গুৰুত্বপূৰ্ণ কাৰণতহে ভ্ৰমণৰ অনুমতি দিয়া হ’ব । অৱশ্যে ইয়াৰ বাবে মুখ্যমন্ত্ৰীৰ কাৰ্যালয়ৰ (CMO) পৰা আগতীয়া অনুমোদন লোৱাটো বাধ্যতামূলক ।
উল্লেখ্য যে, যোৱা ১২ মে’ত একেৰাহে দ্বিতীয়টো কাৰ্যকালৰ বাবে মুখ্যমন্ত্ৰী হিচাপে শপত গ্ৰহণ কৰা হিমন্ত বিশ্ব শৰ্মাই আজিৰ এই কেবিনেট বৈঠকত কেইবাটাও গুৰুত্বপূৰ্ণ প্ৰস্তাৱ গ্ৰহণ কৰে । ২০২৬ চনৰ বিধানসভা নিৰ্বাচনত বিপুল জনাদেশ লাভ কৰি এনডিএ চৰকাৰে শাসনলৈ অহাৰ পিছত প্ৰশাসনীয় দক্ষতা আৰু জনহিতৈষী কামত অধিক গুৰুত্ব দিয়াৰ লক্ষ্যৰে এই সিদ্ধান্ত লোৱা বুলি চৰ্চা হৈছে ।
লগতে পঢ়ক : কেবিনেটৰ ঐতিহাসিক সিদ্ধান্ত: অসমত শীঘ্ৰেই বলৱৎ হ’ব UCC ! ৫ বছৰত ২ লাখ চৰকাৰী চাকৰিৰ লক্ষ্য
