মেছিৰ বাবে এয়া কেৰিয়াৰৰ অন্তিমখন বিশ্বকাপ আৰু ধাৰাবাহিকভাৱে দ্বিতীয়বাৰৰ বাবে বিশ্বকাপ ট্ৰফী দাঙি ধৰাৰ সোণালী সুযোগ
সমগ্ৰ বিশ্বৰ ফুটবল প্ৰেমীৰ অপেক্ষাৰ অন্ত পৰিবলৈ আৰু মাত্ৰ কেইটামান ঘণ্টা বাকী । অহা ১৯ জুলাই অৰ্থাৎ দেওবাৰে ভাৰতীয় সময় অনুসৰি নিশা ১২:৩০ বজাত অনুষ্ঠিত হ’ব ফিফা বিশ্বকাপ ২০২৬-ৰ সেই বহু প্ৰত্যাশিত মেগা ফাইনেল । এই ঐতিহাসিক যুঁজত খিতাপ দখলৰ যুঁজত অবতীৰ্ণ হ’ব ফুটবল বিশ্বৰ দুই মহাশক্তি আৰ্জেণ্টিনা আৰু স্পেইন ।
ট্ৰফীৰ উপৰিও এইবাৰ সমগ্ৰ বিশ্বৰ চকু নিবদ্ধ থাকিব ফুটবলৰ যাদুকৰ লিয়নেল মেছিৰ ওপৰত । ডিফেন্ডিং চেম্পিয়ন আৰ্জেণ্টিনাই এইবাৰো খিতাপ ৰক্ষা কৰি ইতিহাস সৃষ্টি কৰিবলৈ সাজু হৈছে । মেছিৰ বাবে এয়া কেৰিয়াৰৰ অন্তিমখন বিশ্বকাপ আৰু ধাৰাবাহিকভাৱে দ্বিতীয়বাৰৰ বাবে বিশ্বকাপ ট্ৰফী দাঙি ধৰাৰ সোণালী সুযোগ তেওঁৰ সন্মুখত । খিতাপৰ উপৰিও মেছিৰ হাতত আছে গোল্ডেন বল আৰু গোল্ডেন বুটৰ দৰে সন্মানীয় বঁটা আঁজুৰি আনি ইতিহাস ৰচনা কৰাৰ অন্তিম সুযোগ ।
মেছিৰ সপোনৰ হেঙাৰ কিলিয়ান এমবাপে!
আৰ্জেণ্টিনা ফাইনেলত প্ৰৱেশ কৰিলেও মেছিৰ এই ঐতিহাসিক যাত্ৰাত আটাইতকৈ ডাঙৰ প্ৰত্যাহ্বান হৈ থিয় দিছে ফ্ৰান্সৰ তাৰকা ষ্ট্ৰাইকাৰ কিলিয়ান এমবাপে । যদিও ফ্ৰান্সৰ দলটো ছেমিফাইনেলত স্পেইনৰ হাতত পৰাজিত হৈ বিশ্বকাপৰ পৰা বাহিৰ হৈছে, তথাপিও ‘গোল্ডেন বুট’ৰ দৌৰত এমবাপেই মেছিক তীব্ৰ প্ৰত্যাহ্বান জনাইছে ।
বৰ্তমানলৈকে এই টুৰ্ণামেণ্টত লিয়নেল মেছি আৰু কিলিয়ান এমবাপে দুয়োগৰাকীয়ে ৮ টাকৈ গ’ল দি সমতাত আছে ।
ফিফাৰ টাই-ব্ৰেকাৰ নিয়ম: কোনে পাব গোল্ডেন বুট?
ফিফাৰ নিয়ম অনুসৰি, যদি টুৰ্ণামেণ্টৰ শেষত দুজন খেলুৱৈৰ গ’লৰ সংখ্যা সমান হয়, তেন্তে ‘এছিষ্ট’ ( অৰ্থাৎ লগৰ খেলুৱৈক গ’ল কৰাত কৰা সহায়)ক টাই-ব্ৰেকাৰ হিচাপে গণ্য কৰা হয় ।
লিয়নেল মেছি: ৪ টা এছিষ্ট (বৰ্তমান আগবাঢ়ি আছে)
কিলিয়ান এমবাপে: ৩ টা এছিষ্ট
মেছি বৰ্তমান এটা এছিষ্টৰ ব্যৱধানত আগবাঢ়ি আছে যদিও তেওঁৰ এই স্থান একেবাৰেই সুৰক্ষিত নহয় ।
ফাইনেলৰ পূৰ্বেই খেলপথাৰত নামিব এমবাপে
ফাইনেল মেচখনৰ ঠিক এদিন পূৰ্বেই, অৰ্থাৎ ১৮ জুলাইৰ নিশা ফ্ৰান্সে ইংলেণ্ডৰ বিৰুদ্ধে তৃতীয় স্থানৰ বাবে খেলিবলগীয়া মেচখনত অৱতীৰ্ণ হ’ব । এই মেচখনতেই এমবাপেই মেছিৰ সপোন ভাঙি চূৰমাৰ কৰাৰ সুযোগ পাব :
১ টা গ’ল কৰিলে: এমবাপেই মেছিক পিছ পেলাই গোল্ডেন বুটৰ দৌৰত এক নম্বৰ স্থান পাব ।
২ টা গ’ল কৰিলে: ফাইনেলৰ পূৰ্বেই মেছিৰ ওপৰত মানসিক চাপ দুগুণ বৃদ্ধি পাব আৰু তেতিয়া মেছিয়ে গোল্ডেন বুট পাবলৈ হ’লে স্পেইনৰ বিৰুদ্ধে যিকোনো প্ৰকাৰে গ’ল কৰিবই লাগিব ।
সৰ্বকালৰ অভিলেখতো খহনীয়াৰ সম্ভাৱনা
কেৱল চলিত বিশ্বকাপৰে নহয়, ফিফা বিশ্বকাপৰ সৰ্বকালৰ সৰ্বাধিক গ’লদাতাৰ অভিলেখৰ ক্ষেত্ৰতো মেছিক পিছ পেলাব পাৰে এমবাপেই । বৰ্তমানলৈকে ফিফা বিশ্বকাপৰ ইতিহাসত মেছিৰ নামত ২১ টা গ’ল থকাৰ বিপৰীতে এমবাপেৰ নামত আছে ২০ টা গ’ল । ইংলেণ্ডৰ বিৰুদ্ধে যদি এমবাপেই ২ টা গ’ল কৰিবলৈ সক্ষম হয়, তেন্তে তেওঁ ফিফাত সৰ্বাধিক গ’ল কৰা খেলুৱৈ হিচাপে মেছিক অতিক্ৰম কৰিব ।
লগতে পঢ়ক : ২০২৬ ফিফা বিশ্বকাপত ধনৰ বৰষুণ: কিমান লাভ কৰিব চেম্পিয়ন-ৰানাৰ্ছ আপ দলে ?
