মুখ্যমন্ত্ৰী হিচাপে ধাৰাবাহিকভাৱে দ্বিতীয়টো কাৰ্যকালৰ বাবে দায়িত্বভাৰ গ্ৰহণ কৰাৰ পিছত ৰাষ্ট্ৰপতিগৰাকীৰ সৈতে ড° শৰ্মাৰ এয়া আছিল প্ৰথমটো সৌজন্যমূলক সাক্ষাৎ
মুখ্যমন্ত্ৰী ড° হিমন্ত বিশ্ব শৰ্মাই বুধবাৰে (৩ জুন) নতুন দিল্লীত ৰাষ্ট্ৰপতি দ্ৰৌপদী মুৰ্মুক সাক্ষাৎ কৰে । মুখ্যমন্ত্ৰী হিচাপে ধাৰাবাহিকভাৱে দ্বিতীয়টো কাৰ্যকালৰ বাবে দায়িত্বভাৰ গ্ৰহণ কৰাৰ পিছত ৰাষ্ট্ৰপতিগৰাকীৰ সৈতে ড° শৰ্মাৰ এয়া আছিল প্ৰথমটো সৌজন্যমূলক সাক্ষাৎ । এই গুৰুত্বপূৰ্ণ বৈঠকত মুখ্যমন্ত্ৰীগৰাকীয়ে ৰাষ্ট্ৰপতিক অসমৰ সাম্প্ৰতিক অৰ্থনৈতিক প্ৰগতি, আন্তঃগাঁথনিমূলক উন্নয়ন, জনকল্যাণমুখী আঁচনি আৰু অনাগত বৰ্ষসমূহত বিকাশৰ ধাৰা অক্ষুণ্ণ ৰখাৰ পৰিকল্পনাৰ বিষয়ে বিতংভাৱে অৱগত কৰে ।
ছচিয়েল মিডিয়া প্লেটফৰ্ম ‘X’ত এই সন্দৰ্ভত সবিশেষ শ্বেয়াৰ কৰি মুখ্যমন্ত্ৰী ড০ শৰ্মাই কয় :
“মাননীয় ৰাষ্ট্ৰপতিগৰাকীক সাক্ষাৎ কৰাটো সদায় এক প্ৰেৰণাদায়ক অভিজ্ঞতা । তেওঁৰ আদৰ্শ আৰু মাৰ্গদৰ্শনে আমাক জনসেৱাৰ পথত সদায় উৎসাহিত কৰে । মই তেওঁক ভাৰতৰ আটাইতকৈ দ্ৰুতগতিত বিকাশশীল ৰাজ্য হিচাপে অসমৰ চলি থকা প্ৰগতিৰ যাত্ৰাৰ বুজ দিছোঁ আৰু এই গতি কেনেকৈ আগুৱাই নিবলৈ পৰিকল্পনা কৰিছোঁ সেই বিষয়ে অৱগত কৰিছোঁ ।”
গুৱাহাটীত স্থাপন হ’ব IIM-
ৰাষ্ট্ৰপতিক সাক্ষাৎ কৰাৰ পূৰ্বে মুখ্যমন্ত্ৰীগৰাকীয়ে নতুন দিল্লীত কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ সৈতেও এক গুৰুত্বপূৰ্ণ বৈঠকত মিলিত হয় । এই বৈঠকত প্ৰস্তাৱিত ভাৰতীয় প্ৰবন্ধ প্ৰতিষ্ঠান গুৱাহাটী (IIM Guwahati) চৌহদৰ ৰূপৰেখা চূড়ান্ত কৰাৰ সন্দৰ্ভত ফলপ্ৰসূ আলোচনা কৰা হয় ।
এই সন্দৰ্ভত মুখ্যমন্ত্ৰীয়ে উল্লেখ কৰে যে ৰাজ্য চৰকাৰৰ লক্ষ্য হৈছে অসমক পূব ভাৰতৰ এক প্ৰধান শিক্ষা আৰু গৱেষণাৰ কেন্দ্ৰবিন্দু হিচাপে গঢ়ি তোলা । গুৱাহাটীত আই.আই.এম. স্থাপন হ’লে ৰাজ্যখনৰ উচ্চ শিক্ষা আৰু ব্যৱস্থাপনা (Management) শিক্ষাৰ আন্তঃগাঁথনি অভূতপূৰ্বভাৱে শক্তিশালী হৈ পৰিব ।
ৰাজ্যখনত বিনিয়োগ আকৰ্ষণ কৰা, সংস্থাপন বৃদ্ধি কৰা আৰু শিক্ষাব্যৱস্থাক বিশ্বমানৰ কৰি তোলাৰ বাবে অসম চৰকাৰে বৰ্তমান সৰ্বাত্মক প্ৰচেষ্টা চলাই থকাৰ সময়তে মুখ্যমন্ত্ৰীগৰাকীৰ এই দিল্লী ভ্ৰমণ অত্যন্ত তাৎপৰ্যপূৰ্ণ হিচাপে বিবেচিত হৈছে ।
লগতে পঢ়ক : দিল্লীত কেন্দ্ৰীয় মন্ত্ৰী জে পি নাড্ডা আৰু পিয়ুষ গোৱেলক সাক্ষাৎ মুখ্যমন্ত্ৰী হিমন্ত বিশ্ব শৰ্মাৰ
