এক নতুন ইতিহাসৰ সূচনা কৰি দেওবাৰে TVKৰ মুৰব্বী চন্দ্ৰশেখৰ জোচেফ বিজয়ে তামিলনাডুৰ ত্ৰয়োদশগৰাকী মুখ্যমন্ত্ৰী হিচাপে শপত গ্ৰহণ কৰে
দক্ষিণ ভাৰতৰ ৰাজনীতিত এক নতুন ইতিহাসৰ সূচনা কৰি দেওবাৰে তামিলগা ভেট্ৰি কাজাগাম (TVK) ৰ মুৰব্বী চন্দ্ৰশেখৰ জোচেফ বিজয়ে তামিলনাডুৰ ত্ৰয়োদশগৰাকী মুখ্যমন্ত্ৰী হিচাপে শপত গ্ৰহণ কৰে । নিজৰ অভিষেক নিৰ্বাচনতে ৰাজকীয় সফলতা লাভ কৰা জনপ্ৰিয় অভিনেতাগৰাকীক চেন্নাইৰ জৱাহৰলাল নেহৰু ষ্টেডিয়ামত ৰাজ্যপাল ৰাজেন্দ্ৰ বিশ্বনাথ আৰলেকাৰে শপত বাক্য পাঠ কৰোৱায় ।
এই ঐতিহাসিক অনুষ্ঠানত লোকসভাৰ বিৰোধী দলপতি ৰাহুল গান্ধী, বিজয়ৰ পিতৃ-মাতৃ, অভিনেত্ৰী তৃষা কৃষ্ণণৰ লগতে বহু বিশিষ্ট ব্যক্তি উপস্থিত থাকি নবনিযুক্ত মুখ্যমন্ত্ৰীগৰাকীক অভিনন্দন জনায় । শপত গ্ৰহণ অনুষ্ঠানৰ পূৰ্বে বিজয়ে ৰাজ্যপালক উষ্ম আদৰণি জনোৱাৰ লগতে তেওঁৰ কেবিনেটৰ মনোনীত মন্ত্ৰীসকলৰ সৈতে পৰিচয় কৰাই দিয়ে ।
বিজয়ৰ এই প্ৰথম কেবিনেটত মুঠ ৯ জন নেতাই মন্ত্ৰী হিচাপে শপত গ্ৰহণ কৰিব । তেওঁলোক হ’ল— এন আনন্দ, আধাভ অৰ্জুন, কে এ চেংগোত্তিয়ান, কে জি অৰুণৰাজ, পি ভেংকটৰমণন, আৰ নিৰ্মলকুমাৰ, ৰাজমোহন, টি কে প্ৰভু আৰু এছ কীৰ্তনা ।
দ্ৰাবিড় ৰাজনীতিৰ অৱসান আৰু এক নতুন যুগ-
২০২৬ চনৰ তামিলনাডু বিধানসভা নিৰ্বাচন ৰাজ্যখনৰ ইতিহাসত সদায় স্মৰণীয় হৈ ৰ’ব । দশক দশক ধৰি ৰাজ্যখন শাসন কৰি অহা দুয়োটা শক্তিশালী ‘দ্ৰাবিড়’ দলক ক্ষমতাচ্যুত কৰি বিজয়ে এক অভূতপূৰ্ব জনমত লাভ কৰিবলৈ সক্ষম হয় । যদিও টিভিকে-এ ১০৮খন আসন লাভ কৰি একক সংখ্যাগৰিষ্ঠতাৰ পৰা সামান্য আঁতৰত আছিল, তথাপিও কংগ্ৰেছ (৫), চিপিআই-এম (২), চিপিআই (২), ভিচিকে (২) আৰু আইইউএমএল (২) ৰ সমৰ্থনেৰে তেওঁ চৰকাৰ গঠন কৰে ।
জনতাৰ ‘থালাপতি’-
নিৰ্বাচনী প্ৰচাৰৰ সময়ত বিজয়ৰ জনপ্ৰিয়তা আৰু জনসমুদ্ৰই প্ৰাক্তন মুখ্যমন্ত্ৰী এম জি ৰামচন্দ্ৰনৰ (MGR) দিনবোৰলৈ মনত পেলাই দিছিল । কেপ্তেইন বিজয়কান্তৰ পিছত তামিলনাডুৰ ৰাজনীতিত এজন শক্তিশালী অভিনেতা-ৰাজনীতিবিদৰ অভাৱ বিজয়ে পূৰণ কৰিব বুলি অনুগামীসকলে আশা প্ৰকাশ কৰিছে ।
নিজৰ ছবিত ড্ৰাগছ, দুৰ্নীতি আৰু সামাজিক সমস্যাৰ বিৰুদ্ধে মাত মাতি অহা বিজয়ে ২০০৯ চনৰ পৰাই সমাজসেৱাৰ সৈতে জড়িত হৈ আছিল । ২০২৬ চনৰ এই নিৰ্বাচনত তেওঁ পেৰাম্বুৰ আৰু ত্ৰিচী ইষ্ট— এই দুয়োখন আসনৰ পৰাই জয়লাভ কৰিছে, যাৰ ভিতৰত এখনৰ পৰা তেওঁ ত্ৰিচী ইষ্ট আসনখন ত্যাগ কৰিছে । ধৰ্মনিৰপেক্ষ ৰাজনীতি আৰু সামাজিক ন্যায়ৰ শ্লোগানেৰে বিজয়ৰ এই নতুন যাত্ৰাই তামিলনাডুৰ উন্নয়নক এক নতুন মাত্ৰা দিব বুলি চৰ্চা চলিছে ।
লগতে পঢ়ক : তামিলনাডুত ‘বিজয় যুগ’ৰ আৰম্ভণি! কাইলৈ মুখ্যমন্ত্ৰী ৰূপে শপত ল’ব থালাপতিয়ে
