অভিনেতাৰ পৰা ৰাজনীতিবিদ হোৱা থালাপতী বিজয়ৰ মুখ্যমন্ত্ৰী হোৱাৰ পথ এতিয়া সম্পূৰ্ণ প্ৰশস্ত
অৱশেষত সকলো জল্পনা-কল্পনাৰ অন্ত পৰিল । তামিলনাডুৰ ৰাজনৈতিক আকাশত উদয় হ’ল এক নতুন সূৰ্যৰ । অভিনেতাৰ পৰা ৰাজনীতিবিদ হোৱা থালাপতী বিজয়ৰ মুখ্যমন্ত্ৰী হোৱাৰ পথ এতিয়া সম্পূৰ্ণ প্ৰশস্ত । শনিবাৰে ৰাজ্যপাল ৰাজেন্দ্ৰ বিশ্বনাথ আৰ্লেকাৰক সাক্ষাৎ কৰি ১২০ জন বিধায়কৰ সমৰ্থন পত্ৰ জমা দিয়াৰ পাছতে বিজয়ৰ দল TVK-ক চৰকাৰ গঠনৰ বাবে সেউজ সংকেত প্ৰদান কৰা হৈছে ।
মাজনিশাৰ নাটকীয় সমৰ্থন আৰু মেজিক নম্বৰ-
তামিলনাডু বিধানসভাৰ মুঠ ২৩৪ খন আসনৰ ভিতৰত সংখ্যাগৰিষ্ঠতাৰ বাবে প্ৰয়োজন আছিল ১১৮ খন আসন । বিজয়ৰ দল টিভিকে অকলশৰীয়াই ১০৭ খন আসন লাভ কৰি সৰ্ববৃহৎ দল হিচাপে পৰিগণিত হৈছিল (বিজয়ে দুখন আসনত জয়লাভ কৰিছিল যদিও এতিয়া এখন এৰি দিব লাগিব) । বিগত চাৰিদিন ধৰি চলা ৰাজনৈতিক অচল অৱস্থাৰ অন্ত পেলাই শনিবাৰে ভিচিকে (VCK) আৰু আইইউএমএল (IUML)-এ বিজয়ক বিনাচৰ্ত সমৰ্থন আগবঢ়ায় । ইয়াৰ উপৰিও কংগ্ৰেছৰ ৫ জন আৰু বাওঁদলৰ ৪ জন বিধায়কৰ সমৰ্থনত বিজয়ৰ শিবিৰত এতিয়া মুঠ ১২০ জন বিধায়ক আছে ।
জানিব পৰা মতে কাইলৈ বিয়লি ৩.৩০ বজাত বিজয়ে ৰাজ্যখনৰ পৰৱৰ্তী মুখ্যমন্ত্ৰী হিচাপে শপত ল’ব । বিশেষ কথাটো হ’ল যে শপত গ্ৰহণৰ সময়ক লৈ বিজয় আৰু ৰাজ্যপালৰ মাজত প্ৰায় দুঘণ্টা ধৰি আলোচনা চলিছিল ।
দ্ৰাবিড় ৰাজনীতিৰ বৃহৎ ওলট-পালট
মাত্ৰ দুবছৰ পূৰ্বে গঠন হোৱা এটা দলে ডিএমকে (DMK) আৰু এআইএডিএমকে (AIADMK) ৰ দৰে পুৰণি শক্তিক ধূলিসাৎ কৰি শাসনলৈ অহাটোৱে ভাৰতীয় ৰাজনীতিত এক বিৰল ঘটনা হিচাপে বিবেচিত হৈছে । কংগ্ৰেছে ডিএমকেৰ সংগ ত্যাগ কৰি বিজয়ক সমৰ্থন দিয়াটোৱে নিৰ্বাচনৰ পৰৱৰ্তী আটাইতকৈ ডাঙৰ চমক হিচাপে দেখা দিছে ।
ভিচিকে-ৰ চৰ্তহীন সমৰ্থন, কিন্তু…
যদিও ভিচিকে-এ বৰ্তমান চৰকাৰ গঠনৰ বাবে সমৰ্থন দিছে, তথাপিও দলটোৱে ভৱিষ্যতে বিজয়ৰ খালী হোৱা আসনখনত থোল থিৰুমাভালভানক প্ৰক্ষেপ কৰা আৰু তেওঁক উপ-মুখ্যমন্ত্ৰীৰ পদ দিয়াৰ বাবে পৰোক্ষভাৱে দাবী উত্থাপন কৰিছে ।
কাইলৈৰ পৰা তামিলনাডুত ‘বিজয় যুগ’ৰ আৰম্ভণি হ’ব নে অভিনেতাগৰাকীয়ে ৰূপালী পৰ্দাৰ দৰে বাস্তৱ ৰাজনীতিতো যাদু দেখুৱাবলৈ সক্ষম হ’ব, সেইয়া হ’ব লক্ষ্যণীয় ।
লগতে পঢ়ক : তামিলনাডুত অব্যাহত ৰাজনৈতিক অনিশ্চয়তা, সংখ্যাবল লৈয়ো ৰাজ্যপালৰ সাক্ষাৎ পোৱা নাই বিজয়ে
