তামিলনাডু বিধানসভাত চৰকাৰ গঠনৰ বাবে প্ৰয়োজনীয় সংখ্যাগৰিষ্ঠতাৰ সংখ্যা হৈছে ১১৮ । শেহতীয়া নিৰ্বাচনত বিজয়ৰ দল টিভিকিয়ে ১০৮খন আসন লাভ কৰি একক বৃহত্তম দল হিচাপে আত্মপ্ৰকাশ কৰিছে ।
তামিলনাডুৰ ৰাজনীতিত এক নতুন যুগৰ সূচনা কৰি অভিনেতাৰ পৰা ৰাজনীতিবিদ হোৱা থালাপতি বিজয়ৰ নেতৃত্বাধীন দল টিভিকি (TVK) অৱশেষত চৰকাৰ গঠনৰ দিশে আগবাঢ়িছে । কেইবাদিনো ধৰি চলা অনিশ্চয়তা আৰু ৰাজনৈতিক টনা-আঁজোৰাৰ অন্তত শুকুৰবাৰে ৰাজ্যপাল ৰাজেন্দ্ৰ বিশ্বনাথ আৰ্লেকাৰে টিভিকি মুৰব্বী বিজয়ক চৰকাৰ গঠনৰ বাবে সেউজ সংকেট প্ৰদান কৰে ।
সংখ্যাগৰিষ্ঠতাৰ যুঁজ আৰু মিত্ৰজোঁটৰ সমীকৰণ-
২৩৪ খন আসনৰ তামিলনাডু বিধানসভাত চৰকাৰ গঠনৰ বাবে প্ৰয়োজনীয় সংখ্যাগৰিষ্ঠতাৰ সংখ্যা হৈছে ১১৮ । শেহতীয়া নিৰ্বাচনত বিজয়ৰ দল টিভিকিয়ে ১০৮খন আসন লাভ কৰি একক বৃহত্তম দল হিচাপে আত্মপ্ৰকাশ কৰিছিল যদিও যাদুকৰী সংখ্যাৰ পৰা ১০খন আসন কম আছিল ।
অৱশ্যে, ৰাজ্যখনৰ ৰাজনৈতিক দৃশ্যপট সলনি কৰি কংগ্ৰেছ আৰু বাওঁপন্থী দলসমূহে বিজয়ক সমৰ্থন জনোৱাৰ সিদ্ধান্ত লয় । সমীকৰণটো এনেধৰণৰ :
টিভিকে: ১০৮ খন আসন
কংগ্ৰেছ: ৫ খন আসন
চিপিআই: ২ খন আসন
চিপিআই-এম: ২ খন আসন
ভিচিকে: ২ খন আসন
মুঠ: ১১৯ (সংখ্যাগৰিষ্ঠতাৰ বাবে প্ৰয়োজনীয় ১১৮তকৈ বেছি)
কংগ্ৰেছৰ ঐতিহাসিক সিদ্ধান্ত-
এই নিৰ্বাচনত আটাইতকৈ চৰ্চিত বিষয়টো আছিল কংগ্ৰেছৰ স্থিতি । দলটোৱে ডিএমকেৰ সৈতে থকা তেওঁলোকৰ বহু বছৰীয়া পুৰণি মিত্ৰতা ভংগ কৰি বিজয়ৰ টিভিকিৰ সৈতে হাত মিলায় । আনহাতে, চিপিআই-এম আৰু ভিচিকেয়ে চৰ্তহীন সমৰ্থন আগবঢ়োৱাৰ বিপৰীতে চিপিআই-এ এক “স্থিৰ আৰু ধৰ্মনিৰপেক্ষ” শাসনৰ স্বাৰ্থত “চৰ্তসাপেক্ষ সমৰ্থন” আগবঢ়াইছে ।
ৰাজ্যপালৰ ভূমিকা আৰু বিতৰ্ক-
সংখ্যাগৰিষ্ঠতা থকাৰ পাছতো ৰাজ্যপালে বিজয়ক চৰকাৰ গঠনৰ বাবে আমন্ত্ৰণ নজনোৱাক লৈ তীব্ৰ বিতৰ্কৰ সৃষ্টি হৈছিল । বিৰোধী দলসমূহে অভিযোগ তুলিছিল যে ৰাজ্যপালে কেন্দ্ৰীয় চৰকাৰৰ নিৰ্দেশত এই প্ৰক্ৰিয়া বিলম্বিত কৰিছে । অৱশ্যে, বিজয়ৰ সৈতে হোৱা বৈঠকৰ অন্তত ৰাজ্যপালে বিধায়কসকলৰ সবিশেষ তথ্য আৰু সংখ্যাৰ স্পষ্টতা লাভ কৰাৰ পাছত চৰকাৰ গঠনৰ অনুমতি দিয়ে ।
বিজয়ৰ আসন ত্যাগ-
মন কৰিবলগীয়া যে বিজয় দুটা সমষ্টিৰ পৰা প্ৰতিদ্বন্দ্বিতা কৰি দুয়োটাতে জয়ী হৈছিল । তেওঁ এতিয়া ত্ৰিচী আসনখন ত্যাগ কৰি চেন্নাই পেৰাম্বুৰ সমষ্টিৰ বিধায়ক হিচাপে বাহাল থাকিব । তেওঁ এখন আসন ত্যাগ কৰাৰ পিছত বিধানসভাত মিত্ৰজোঁটৰ মুঠ সংখ্যা ১১৮ হ’ব ।
তিনি দশকৰ একাধিপত্যৰ অন্ত-
বিজয়ৰ এই উত্থানে তামিলনাডুত যোৱা ৩০ বছৰ ধৰি চলি থকা ডিএমকে আৰু এআইএডিএমকেৰ একাধিপত্যৰ অন্ত পেলালে । স্বাধীনতাৰ পিছত প্ৰথমবাৰৰ বাবে তামিলনাডুত কোনো এটা দলেই একক সংখ্যাগৰিষ্ঠতা লাভ কৰিবলৈ সক্ষম নহ’ল । বহু সমৰ্থকে বিজয়ৰ মাজত প্ৰয়াত নেতা এম কৰুণানিধিৰ প্ৰতিচ্ছবি দেখা বুলি মন্তব্য কৰিছে ।
এতিয়া সমগ্ৰ দেশৰে চকু তামিলনাডুৰ ওপৰত । অভিনেতাৰ পৰা মুখ্যমন্ত্ৰী হ’বলৈ আগবঢ়া বিজয়ে ৰাজ্যখনৰ বাবে কেনেধৰণৰ শাসন ব্যৱস্থা উপহাৰ দিয়ে, সেয়া সময়তহে স্পষ্ট হ’ব ।
লগতে পঢ়ক : উৎকণ্ঠাৰ অৱসান! ৪ দলৰ সমৰ্থনত বিজয়ৰ হাতত এতিয়া ‘যাদুকৰী সংখ্যা’
