দীৰ্ঘদিনীয়া শাসনৰ অন্ত পেলাই এইবাৰ বংগবাসীয়ে শাসকীয় তৃণমূল কংগ্ৰেছক প্ৰত্যাখ্যান কৰে
২০২৬ চনৰ পশ্চিমবংগ বিধানসভা নিৰ্বাচনৰ ফলাফলে ৰাজ্যখনৰ ৰাজনীতিত এক অভূতপূৰ্ব জোকাৰণিৰ সৃষ্টি কৰিছে । দীৰ্ঘদিনীয়া শাসনৰ অন্ত পেলাই এইবাৰ বংগবাসীয়ে শাসকীয় তৃণমূল কংগ্ৰেছক প্ৰত্যাখ্যান কৰে । ডাবল চেঞ্চুৰী কোবাই ৰাজ্যখনত ইতিহাস ৰচি শাসনৰ গাদী দখল কৰিছে বিজেপিয়ে । ইঈফালে নিৰ্বাচনত প্ৰতিদ্বন্দ্বিতা কৰা শাসকীয় তৃণমূলৰ ৩৫ জন মন্ত্ৰীৰ ভিতৰত মুখ্যমন্ত্ৰী মমতা বেনাৰ্জীসহ ২২ গৰাকী মন্ত্ৰীয়েই নিজৰ সমষ্টিত পৰাজয়বৰণ কৰিছে ।
মন্ত্ৰীসভাৰ বিপৰ্যয় আৰু জনতাৰ ৰায়-
তৃণমূলৰ মন্ত্ৰীসভাৰ প্ৰায় ৬৩ শতাংশ সদস্যই এই নিৰ্বাচনত পৰাজিত হোৱাটোৱে দলটোৰ নেতৃত্বৰ প্ৰতি জনসাধাৰণৰ তীব্ৰ অসন্তুষ্টি প্ৰতিফলিত কৰিছে । এয়া কেৱল এজন বা দুজন নেতাৰ পৰাজয় নহয়, বৰঞ্চ তৃণমূলৰ শাসন ব্যৱস্থাৰ বিৰুদ্ধে এক সংগঠিত প্ৰত্যাখ্যান বুলি বিবেচিত হৈছে ।
পৰাজিত হোৱা হাই-প্ৰফাইল মন্ত্ৰীসকল :
ৰাজ্যখনৰ কেইবাটাও গুৰুত্বপূৰ্ণ বিভাগৰ দায়িত্বত থকা মন্ত্ৰীসকল এইবাৰ ধৰাশায়ী হৈছে । ইয়াৰ ভিতৰত উল্লেখযোগ্য হ’ল:
ভৱানীপুৰ: মুখ্যমন্ত্ৰী মমতা বেনাৰ্জীৰ শোচনীয় পৰাজয় ।
টলীগঞ্জ: অৰূপ বিশ্বাস (গৃহ নিৰ্মাণ আৰু শক্তি মন্ত্ৰী)।
দমদম: ব্ৰাত্য বসু (শিক্ষা মন্ত্ৰী)।
উত্তৰ দমদম: চন্দ্ৰিমা ভট্টাচাৰ্য (বিত্ত আৰু পৰিৱেশ মন্ত্ৰী)।
শ্যামপুকুৰ: শশী পাঁজা (উদ্যোগ আৰু মহিলা-শিশু উন্নয়ন মন্ত্ৰী)।
দিনহাটা: উদয়ন গুহ (উত্তৰ বংগ উন্নয়ন মন্ত্ৰী)।
ইয়াৰ উপৰি সুজিত বসু, ইন্দ্ৰনীল সেন, বেচাৰাম মান্না, মলয় ঘটক আৰু ছিদ্দিকুল্লাহ চৌধুৰীৰ দৰে প্ৰভাৱশালী নেতাসকলেও নিজৰ আসন সুৰক্ষিত কৰিবলৈ ব্যৰ্থ হয় ।
বিজেপিৰ ঐতিহাসিক জয়-
ভাৰতীয় নিৰ্বাচন আয়োগৰ শেহতীয়া তথ্য অনুসৰি, পশ্চিমবংগত বিজেপিয়ে এক বিশাল অগ্ৰগতি লাভ কৰি ইতিহাস সৃষ্টি কৰিছে । ২৯৪ খন আসনৰ ভিতৰত বিজেপিয়ে ২০৭ খন আসন লাভ কৰি একক সংখ্যাগৰিষ্ঠতা অৰ্জন কৰিছে । আনহাতে, তৃণমূল কংগ্ৰেছ মাত্ৰ ৮০ খন আসনতে সীমাবদ্ধ থাকিবলগীয়া হৈছে ।
ভোটৰ ব্যৱধান আৰু বিশেষ পৰাজয় :
-শ্যামপুকুৰত শশী পাঁজাক বিজেপিৰ পূৰ্ণিমা চক্ৰৱৰ্তীয়ে ১৪,৬০০ তকৈ অধিক ভোটত পৰাজিত কৰে।
-গগাটত নিৰ্মাল মাঝি প্ৰায় ৪৯,৫০০ ভোটৰ বৃহৎ ব্যৱধানত পৰাজিত হয়।
-দুৰ্গাপুৰ পূৰ্বত প্ৰদীপ মজুমদাৰ ৩০,৯০০ তকৈ অধিক ভোটত হাৰে।
এই ফলাফলে স্পষ্ট কৰি দিছে যে পশ্চিমবংগৰ ভোটাৰে এইবাৰ পৰিৱৰ্তনৰ সপক্ষে আৰু বিজেপিৰ সু-শাসনৰ প্ৰতি আস্থা প্ৰকট কৰিছে । ৰাজ্যখনত প্ৰথমবাৰৰ বাবে বিজেপিৰ চৰকাৰ গঠন হোৱাটো এতিয়া কেৱল আনুষ্ঠানিকতাহে মাত্ৰ ।
লগতে পঢ়ক : পশ্চিম বংগত বিজেপিৰ ছুনামী; ১৫ বছৰৰ পিছত মমতাৰ বিদায়
