হাই ভল্টেজ যুঁজত গুৱাহাটীৰ বৰ্ষাপাৰা ষ্টেডিয়ামত মুখামুখি হ’ব মুম্বাই ইণ্ডিয়ানছ আৰু ৰাজস্থান ৰয়েলছ
নিৰ্বাচনৰ ধামখুমীয়া পৰিৱেশৰ মাজতে গুৱাহাটীত এতিয়া আই পি এলৰ জ্বৰ । মঙলবাৰে আই পি এল ২০২৬ৰ এখন হাই ভল্টেজ যুঁজত গুৱাহাটীৰ বৰ্ষাপাৰা ষ্টেডিয়ামত মুখামুখি হ’ব মুম্বাই ইণ্ডিয়ানছ আৰু ৰাজস্থান ৰয়েলছ । এই মেচখন দুয়োটা দলৰ বাবে অতি গুৰুত্বপূৰ্ণ বুলি বিবেচিত হৈছে । মুম্বাই ইণ্ডিয়ানছে পূৰ্বৰ পৰাজয়ৰ পৰা প্ৰত্যাৱৰতনৰ চেষ্টা কৰাৰ বিপৰীতে ৰাজস্থান ৰয়েলছে জয়ৰ হেটট্ৰিক অৰ্জনৰ চেষ্টা কৰিব ।
মুম্বাই ইণ্ডিয়ানছৰ বাবে আটাইতকৈ ডাঙৰ সকাহৰ খবৰ হৈছে অধিনায়ক হাৰ্দিক পাণ্ডিয়াৰ ফিটনেছ । অসুস্থতাৰ বাবে দিল্লী কেপিটেলছৰ বিৰুদ্ধে পূর্বৰ মেচত অংশ ল’ব পৰা নাছিল তেওঁ ৷ পাণ্ডিয়াৰ অনুপস্থিতিত মুম্বাই ৬ উইকেটত পৰাস্ত হয় । হাৰ্দিকৰ অনুপস্থিতিত দলটোৰ বেটিং আৰু বলিং দুয়োটা দিশতে ভাৰসাম্যহীন হৈ পৰে ।
পূৰ্বৰ খেলখনত সূৰ্যকুমাৰ যাদৱে দলটোৰ অধিনায়কৰ জায়িত্ব পালন কৰিছিল যদিও দলটোক পৰাজয়ৰ পৰা ৰক্ষা কৰিব নোৱাৰিলে । মুম্বাইয়ে ট্ৰেণ্ট ব’ল্টৰ ঠাইত কৰ্বিন বছক নিযুক্তি দিছিল যদিও এই সিদ্ধান্ত সফল হোৱা নাছিল । বছ যথেষ্ট ব্যয়বহুল বুলি প্ৰমাণিত হোৱাৰ বিপৰীতে দীপক চহৰে মিতব্যয়িতাৰে বলিং কৰে ।
হাৰ্দিকে এতিয়া দলত যোগদান কৰি নেটত অনুশীলন কৰা দেখা গৈছে । ৰাজস্থানৰ বিৰুদ্ধে তেওঁ খেলপথাৰত নামিব পাৰিব বুলি আশা কৰা হৈছে । যদি পাণ্ডিয়া মূল একাদশলৈ ঘূৰে তেন্তে মুম্বাই যথেষ্ট লাভৱান হ’ব ।
মুম্বাইৰ বলিঙে এতিয়ালৈকে আশা কৰা ধৰণে প্ৰদৰ্শন কৰিব পৰা নাই । যশপ্ৰীত বুমৰাহে মিতব্যয়িতাৰে বলিং কৰিছে যদিও এই ছিজনত তেওঁ এতিয়াও এটা উইকেট লব পৰা নাই । ইফালে শাৰ্দুল ঠাকুৰ শেষৰখন খেলত যথেষ্ট ব্যয়বহুল বুলি প্ৰমাণিত হয় । স্পীন বিভাগত নিজৰ স্থান মজবুট কৰি তুলিছে মিচেল ছেণ্টনাৰে ।
আনহাতে ৰাজস্থান ৰয়েলছৰ টপ অৰ্ডাৰ উৎকৃষ্ট ফৰ্মত আছে । যশস্বী জয়ছোৱাল আৰু যুৱ বেটছমেন বৈভৱ সূৰ্যবংশীয়ে দলটোক দ্ৰুত আৰম্ভণি দিছে । তাৰ পিছত ধ্ৰুৱ জুৰেলে ইনিংছ আগবঢ়াই নিয়াৰ কাম কৰি আছে । অধিনায়ক ৰিয়ান পৰাগে এতিয়াও ডাঙৰ ইনিংছ খেলিব পৰা নাই যদিও তেওঁৰ অধিনায়ক হিচাবে দেখুওৱা দক্ষতাই যথেষ্ট প্ৰশংসা লাভ কৰিছে । গুজৰাট টাইটানছৰ বিৰুদ্ধে অন্তিম অভাৰত তেওঁৰ কৌশলে ৰাজস্থানক ৰোমাঞ্চকৰ জয় প্ৰদান কৰিছিল ।
ৰাজস্থানৰ বলিঙো শক্তিশালী দেখা গৈছে । দুখন মেচত ৫টা উইকেট দখল কৰি উজ্জ্বল প্ৰদৰ্শন আগবঢ়াইছে ৰবি বিষ্ণোই । যোৱা ছিজনত হতাশাজনক প্ৰদৰ্শনৰ মাজেৰে যোৱাৰ পিছত তেওঁৰ যথেষ্ট উন্নতি হৈছে । ইফালে তুষাৰ দেশপাণ্ডে ডেথ অভাৰত নিয়ন্ত্ৰিত বলিং কৰি গুজৰাটৰ জয়ত মুখ্য ভূমিকা লৈছিল ।
বৰ্তমান পইণ্ট তালিকাৰ ষষ্ঠ স্থানত থকা মুম্বাইৰ বিপৰীতে দ্বিতীয় স্থানত আছে ৰাজস্থান । দুয়োটা দলৰ মাজত এই মেচখন ৰোমাঞ্চকৰ হ’ব বুলি আশা কৰা হৈছে । মেচখনৰ ফলাফল বহুলাংশে নিৰ্ভৰ কৰিব মুম্বাইৰ বলাৰসকলে ৰাজস্থানৰ ইন-ফৰ্ম টপ অৰ্ডাৰক কিমান ক্ষীপ্ৰতাৰে ধৰি ৰাখিব পাৰিব তাৰ ওপৰত ।
লগতে পঢ়ক : বৰষুণৰ বাবে পৰিত্যক্ত কলকাতা-পঞ্জাবৰ মেচ, লাভ কৰিলে ১-১ পইণ্ট
