আৰ্টেমিছ-২ অভিযানে মহাকাশ অন্বেষণৰ ক্ষেত্ৰত এক ঐতিহাসিক সফলতা অৰ্জন কৰিছে
নাছাৰ আৰ্টেমিছ-২ অভিযানে মহাকাশ অন্বেষণৰ ক্ষেত্ৰত এক ঐতিহাসিক সফলতা অৰ্জন কৰিছে । এই অভিযানৰ মানৱ দলটোৱে সফলতাৰে পৃথিৱীৰ কক্ষপথ এৰি এতিয়া চন্দ্ৰৰ ফালে আগবাঢ়িছে । এই পদক্ষেপক মানুহৰ গভীৰ মহাকাশলৈ যোৱাৰ এক উল্লেখযোগ্য মাইলৰ খুঁটি হিচাপে গণ্য কৰা হৈছে ।
নাছাৰ মতে, অৰিয়ান মহাকাশযানখনে এক গুৰুত্বপূৰ্ণ ট্ৰেন্সলুনাৰ ইনজেকচন বাৰ্ন সফলতাৰে সম্পন্ন কৰিছে । এই প্ৰক্ৰিয়াত মহাকাশযানখনৰ মূল ইঞ্জিনটোক প্ৰায় ছয় মিনিট ধৰি চলোৱা হৈছিল, যাৰ ফলত ই পৃথিৱীৰ মহাকৰ্ষণীয় আকৰ্ষণৰ পৰা হাত সাৰি চন্দ্ৰৰ চাৰিওফালে নিজৰ নিৰ্দিষ্ট কক্ষপথত প্ৰৱেশ কৰিবলৈ সক্ষম হয় । ইয়াৰ ফলত প্ৰায় ৬,০০০ পাউণ্ড থ্ৰাষ্ট সৃষ্টি হয়, যিয়ে মহাকাশযানখনক সঠিক দিশলৈ আগুৱাই লৈ যায় ।
মিছন পৰিচালনা দলে সৰ্বসন্মতিক্ৰমে এই গুৰুত্বপূৰ্ণ কৌশলৰ বাবে সংকেত দিয়ে । এই প্ৰক্ৰিয়া ৫ মিনিট ৪৯ ছেকেণ্ড সময় ধৰি চলিছিল । এই প্ৰক্ৰিয়া সফলতাৰে সম্পূৰ্ণ হোৱাৰ লগে লগে ১৯৭২ চনত এপ’ল’ ১৭ৰ পিছত প্ৰথমবাৰৰ বাবে মহাকাশচাৰীসকলে চন্দ্ৰৰ চাৰিওফালে পৰিভ্ৰমণ কৰিবলৈ সাজু হৈছে ।
নাছাৰ মুৰব্বী জেৰেড আইজাকমেনে ছ’চিয়েল মিডিয়া প্লেটফৰ্ম এক্সত এই কৃতিত্ব নিশ্চিত কৰি কয় যে ট্ৰেন্সলুনাৰ ইনজেকচন বাৰ্ন সফলতাৰে সম্পূৰ্ণ হৈছে আৰু আৰ্টেমিছ-২ৰ ক্ৰুৱে এতিয়া চন্দ্ৰৰ ফালে আগবাঢ়িছে । তেওঁ ইয়াক সংস্থাটোৰ বাবে এক সংজ্ঞায়িত মুহূৰ্ত বুলি অভিহিত কৰি কয় যে আমেৰিকাই পুনৰবাৰ সক্ৰিয়ভাৱে চন্দ্ৰলৈ মহাকাশচাৰী প্ৰেৰণৰ অভিযান চলাইছে ।
লগতে পঢ়ক : ৫৪ বছৰৰ পাছত চন্দ্ৰলৈ মানৱ অভিযান, আৰ্টেমিছ-২ৰ সফল উৎক্ষেপণ
