ভাৰতীয় সময় অনুসৰি ১২:১৫ বজাত নাছাৰ আৰ্টেমিছ-২ অভিযানৰ চাৰিজন মহাকাশচাৰীয়ে আনুষ্ঠানিকভাৱে চন্দ্ৰৰ কক্ষপথ সম্পূৰ্ণ কৰে

৫০ বছৰতকৈও অধিক সময়ৰ পাছত পুনৰ প্ৰথমবাৰৰ বাবে চন্দ্ৰৰ আটাইতকৈ ওচৰত উপস্থিত হৈছে মানুহ । ৭ এপ্ৰিল মঙলবাৰে মাজনিশা ভাৰতীয় সময় অনুসৰি ১২:১৫ বজাত নাছাৰ আৰ্টেমিছ-২ অভিযানৰ চাৰিজন মহাকাশচাৰীয়ে আনুষ্ঠানিকভাৱে চন্দ্ৰৰ কক্ষপথ সম্পূৰ্ণ কৰে । লগে লগে আৰ্টেমিছ-২ মিছনে ইতিহাস ৰচনা কৰিছে ।

এই অভিযান নাছাৰ বাবে এক ঐতিহাসিক কৃতিত্ব বুলি গণ্য কৰা হৈছে, কিয়নো এতিয়া অৰিয়ান মহাকাশযানখনে গভীৰ মহাকাশত প্ৰৱেশ কৰিছে, য’ত এসময়ত এপ’ল’ অভিযানৰ আধিপত্য আছিল ।

বৰ্তমান এই অভিযানৰ ক্ৰুসকল এক গুৰুত্বপূৰ্ণ পৰ্যায়ত আছে । তেওঁলোকে মহাকাশযানখনৰ ব্যৱস্থা পৰীক্ষা কৰি আছে আৰু চন্দ্ৰৰ দূৰৱৰ্তী আৰু কঠিন ভূখণ্ডৰ সন্মুখীন হৈছে ।

লুনাৰ ফ্লাইবাই তেতিয়া সংঘটিত হয় যেতিয়া এখন মহাকাশযান চন্দ্ৰৰ ওচৰেৰে পাৰ হয়, কিন্তু গতি কম কৰিবলৈ কক্ষপথত স্থিৰ হৈ থাকিবলৈ ইঞ্জিন বন্ধ কৰি থোৱা হয় । আৰ্টেমিছ-২ৰ দলটোৱে চন্দ্ৰৰ চাৰিওফালে ঘূৰাৰ পৰিৱৰ্তে চন্দ্ৰক মহাজাগতিক পিভট পইণ্ট হিচাপে ব্যৱহাৰ কৰিছে । এইটো সম্ভৱ হৈছে ফ্ৰী-ৰিটাৰ্ণ ট্ৰেজেক্টৰীৰ বাবে, যিটো আকাশী বলবিজ্ঞানৰ এক চতুৰ কৌশল য’ত মহাকাশযানখনে চন্দ্ৰৰ মাধ্যাকৰ্ষণ শক্তিক প্ৰাকৃতিক স্লিংশ্বট হিচাপে ব্যৱহাৰ কৰে ।

লগতে পঢ়ক : চন্দ্ৰৰ মহাকৰ্ষণ ক্ষেত্ৰত উপনীত… ইতিহাস ৰচনাৰ নিচেই কাষ চাপিছে আৰ্টেমিছ-২

আৰ্টেমিছ-২ অভিযানে প্ৰায় ৪ লাখ কিলোমিটাৰ যাত্ৰা কৰিব, যিটো আজিলৈকে মানুহে অতিক্ৰম কৰা আটাইতকৈ দীঘলীয়া দূৰত্ব

চন্দ্ৰৰ ফালে আগবাঢ়ি যোৱা দ্বিতীয় আৰ্টেমিছ অভিযান এতিয়া ইতিহাস সৃষ্টিৰ ওচৰ চাপিছে । এই অভিযানে ৫৩ বছৰৰ পাছত মানুহক চন্দ্ৰলৈ লৈ গৈছে আৰু ইয়াৰ পৰা বহু বেছি আশা কৰা হৈছে । এই অভিযানত তিনিজন আমেৰিকান আৰু এজন কানাডাৰ মহাকাশচাৰী আছে, যিসকলে সোমবাৰৰ ভিতৰত চন্দ্ৰৰ নিচেই কাষত উপস্থিত হ’ব । তেওঁলোকে চন্দ্ৰৰ সেই অংশৰ ফটো তুলিব যিটো পৃথিৱীৰ পৰা দেখা নাযায় । এই অভিযান নাছাৰ পুৰণি এপ’ল’ প্ৰগ্ৰেমৰ পিছত পৰৱৰ্তী ডাঙৰ পদক্ষেপ হিচাপে বিবেচিত হৈছে । মহাকাশচাৰী ভিক্টৰ গ্লভাৰে কয় যে তেওঁলোকে আগবাঢ়ি যোৱাৰ লগে লগে পৃথিৱীখন সৰু আৰু চন্দ্ৰ ডাঙৰ যেন দেখা যায় । এই অভিজ্ঞতা তেওঁৰ বাবে অতি বিশেষ ।

কিন্তু মিছনৰ সময়ত এটা সৰু সমস্যাৰ সৃষ্টি হৈছে বুলি প্ৰকাশ পাইছে । অৰিয়ান মহাকাশযানৰ শৌচাগাৰত বিজুতি ঘটিছে । উক্ষেপণৰ পিছৰে পৰাই ই বাৰে বাৰে সমস্যাৰ সন্মুখীন হৈ আহিছে । পাইপত বৰফ জমা হোৱাৰ বাবেই এই সমস্যাৰ সৃষ্টি হোৱা বুলি অভিযন্তাসকলে সন্দেহ কৰিছে । বৰ্তমান মহাকাশচাৰীসকলে বেকআপ পদ্ধতি ব্যৱহাৰ কৰিবলগীয়া হৈছে । নাছাৰ বিষয়াসকলে কয় যে মহাকাশত শৌচাগাৰ ব্যৱস্থা পৰিচালনা কৰাটো সদায় প্ৰত্যাহ্বানজনক যদিও দলটোৱে পৰিস্থিতি ভালদৰে চম্ভালিছে ।

এই মিছনে নতুন অভিলেখো গঢ়িবলৈ সাজু হৈছে । আৰ্টেমিছ-২ অভিযানে প্ৰায় ৪ লাখ কিলোমিটাৰ যাত্ৰা কৰিব, যিটো আজিলৈকে মানুহে অতিক্ৰম কৰা আটাইতকৈ দীঘলীয়া দূৰত্ব । ইয়াৰ পূৰ্বে এই অভিলেখ এপ’ল’ ১৩ মিছনৰ হাতত আছিল । এই অভিযানৰ এটা উল্লেখযোগ্য বৈশিষ্ট্য হ’ল ইয়াত কানাডাৰ জেৰেমি হান্সেনকো অন্তৰ্ভুক্ত কৰা হৈছে, যিজন চন্দ্ৰলৈ যাত্ৰা কৰা প্ৰথমজন অনা আমেৰিকান মহাকাশচাৰী হিচাপে পৰিগণিত হৈছে । ক্ৰীষ্টিনা কোচ প্ৰথম মহিলা আৰু ভিক্টৰ গ্লভাৰ প্ৰথমগৰাকী কৃষ্ণাংগ মহাকাশচাৰী, যি এই অভিযানৰ অংশ ।

প্ৰায় ১০ দিনীয়া এই অভিযানৰ পিছত ১০ এপ্ৰিলত মহাকাশযানখন পৃথিৱীলৈ উভতি আহি প্ৰশান্ত মহাসাগৰত অৱতৰণ কৰিব । এই অভিযান ভৱিষ্যতে স্থায়ী চন্দ্ৰ ঘাটি স্থাপনৰ দিশত নাছাৰ প্ৰথমটো ডাঙৰ পদক্ষেপ । ২০২৮ চনৰ ভিতৰত চন্দ্ৰৰ দক্ষিণ মেৰুৰ ওচৰত মানৱ অৱতৰণৰ লক্ষ্য লৈছে সংস্থাটোৱে ।

লগতে পঢ়ক : ৫৪ বছৰৰ পাছত চন্দ্ৰলৈ মানৱ অভিযান, আৰ্টেমিছ-২ৰ সফল উৎক্ষেপণ

আৰ্টেমিছ-২ কোনো লেণ্ডিং মিছন নহয় । ই ১০ দিনীয়া পৰীক্ষামূলক অভিযান ।

আৰ্টেমিছ ২ অভিযান সফলতাৰে উৎক্ষেপণ কৰি ইতিহাস সৃষ্টি কৰিছে নাছাই । বৃহস্পতিবাৰে ফ্ল’ৰিডাৰ কেনেডি মহাকাশ কেন্দ্ৰৰ পৰা ৩:৫৪ বজাত এই বিশাল এছ এল এছ ৰকেটটো উৎক্ষেপণ কৰা হয় । ৫৪ বছৰৰ ভিতৰত এইটোৱেই হৈছে চন্দ্ৰলৈ প্ৰথমটো মানৱ অভিযান । এই উৎক্ষেপণ সম্পূৰ্ণ সফল হৈছে আৰু চাৰিওজন মহাকাশচাৰী নিৰাপদে পৃথিৱীৰ কক্ষপথত উপনীত হৈছে । সমগ্ৰ বিশ্বই চালে এই ঐতিহাসিক উৎক্ষেপণৰ সাক্ষী হয় ।

এই মিছনত চাৰিজনীয়া ক্ৰু জড়িত আছে । ৰিড ৱাইজমেন (মিছন কমাণ্ডাৰ), ভিক্টৰ গ্লভাৰ (পাইলট আৰু চন্দ্ৰ অভিযানলৈ যোৱা প্ৰথমজন কৃষ্ণাংগ মহাকাশচাৰী), ক্ৰীষ্টিনা কোচ (মিছন বিশেষজ্ঞ আৰু চন্দ্ৰ অভিযানলৈ যোৱা প্ৰথমগৰাকী মহিলা), জেৰেমি হেনচেন (মিছন বিশেষজ্ঞ আৰু চন্দ্ৰ অভিযানলৈ যোৱা প্ৰথমজন কানাডাৰ মহাকাশচাৰী) । এই চাৰিজন অৰিয়ান কেপচুলত চন্দ্ৰৰ অভিযানলৈ ৰাওনা হয় ।

উল্লেখ্য যে, আৰ্টেমিছ-২ কোনো লেণ্ডিং মিছন নহয় । ই ১০ দিনীয়া পৰীক্ষামূলক অভিযান । ক্ৰুৱে চন্দ্ৰৰ অতি ওচৰলৈ, প্ৰায় ৯৬০০ কিলোমিটাৰ প্ৰতি ঘণ্টাত যাত্ৰা কৰি চন্দ্ৰক প্ৰদক্ষিণ কৰিব আৰু তাৰ পিছত পৃথিৱীলৈ উভতি আহিব । এই সময়ছোৱাত অৰিয়ান কেপচুলৰ গভীৰ মহাকাশৰ ক্ষমতা, জীৱন সমৰ্থন ব্যৱস্থা, নেভিগেচন, যোগাযোগ আৰু তাপ ৰক্ষাকৱচ সম্পূৰ্ণৰূপে পৰীক্ষা কৰা হ’ব । উভতিনি যাত্ৰাত অৰিয়ানে ঘণ্টাত ৪০ হাজাৰ কিলোমিটাৰ বেগত পুনৰ পৃথিৱীৰ বায়ুমণ্ডলত প্ৰৱেশ কৰিব ।

এই উৎক্ষেপণ ঐতিহাসিক কাৰণ এপ’ল’ ১৭ৰ পিছত প্ৰথমবাৰৰ বাবে মানুহ চন্দ্ৰৰ ইমান ওচৰলৈ যাত্ৰা কৰিছে । এই মিছনে আৰ্টেমিছ অভিযানৰ প্ৰকৃত আৰম্ভণি চিহ্নিত কৰিছে । ইয়াৰ সফলতাৰ পিছত নাছাই আৰ্টেমিছ ৩ত চন্দ্ৰত মানুহ অৱতৰণ কৰোৱাই স্থায়ী চন্দ্ৰ ঘাটি স্থাপনৰ বাবে সাজু হ’ব । এই অভিযানে ভৱিষ্যতে মংগল গ্ৰহলৈ কৰা অভিযানৰ ভেটিও স্থাপন কৰিব । ইয়াৰ উপৰিও এই অভিযানে নৱ প্ৰজন্মক মহাকাশ বিজ্ঞানৰ প্ৰতি আকৰ্ষিত কৰিব ।

এতিয়া কেইবাদিনো চন্দ্ৰৰ ফালে যাত্ৰা অব্যাহত ৰাখিব ক্ৰুৱেসকলে । চন্দ্ৰৰ পিছফালেৰেও পাৰ হৈ যাব, য’ত পৃথিৱীৰ সৈতে ৰেডিঅ’ সংস্পৰ্শ সাময়িকভাৱে হেৰাই যাব । এই সময়ছোৱাত কেইবাটাও বৈজ্ঞানিক পৰীক্ষা সম্পন্ন কৰা হ’ব । প্ৰায় ১০ দিনৰ পিছত অৰিয়ান কেপচুল পেৰাচুটেৰে প্ৰশান্ত মহাসাগৰত অৱতৰণ কৰিব ।

নাছাৰ আৰ্টেমিছ ২ অভিযানৰ সফল উৎক্ষেপণ মহাকাশ ইতিহাসৰ এক উল্লেখযোগ্য মুহূৰ্ত । ৫৪ বছৰৰ পাছত আকৌ এবাৰ মানুহ চন্দ্ৰলৈ যাত্ৰা কৰিছে । এই অভিযানে কেৱল আমেৰিকালৈই নহয়, সমগ্ৰ মানৱতাৰ বাবেও নতুন আশা আৰু নতুন সম্ভাৱনা কঢ়িয়াই আনিছে ।

লগতে পঢ়ক : ৫৪ বছৰৰ পাছত চন্দ্ৰলৈ… ১ এপ্ৰিলত ঐতিহাসিক উৎক্ষেপণ

এই অভিযানত চন্দ্ৰত অৱতৰণ নহ’ব; বৰঞ্চ চন্দ্ৰৰ ওচৰত পৰা প্ৰদক্ষিণ কৰি উভতি আহিব

ছয় দশক পূৰ্বে এপ’ল’ অভিযানত চন্দ্ৰ কেনেকৈ গঠন হৈছিল সেই কথা প্ৰকাশ পাইছিল । এতিয়া নাছাৰ আৰ্টেমিছ অভিযানে অন্বেষণৰ এক নতুন যুগৰ সূচনা কৰিবলৈ সাজু হৈছে । নাছাই ঘোষণা কৰিছে যে আৰ্টেমিছ-২ অভিযান সম্পূৰ্ণৰূপে প্ৰস্তুত, কোনো কাৰিকৰী সমস্যা নাই । ইতিহাস ৰচনা কৰা এই উৎক্ষেপণ ১ এপ্ৰিলত হ’ব । এই অভিযানত চাৰিজন মহাকাশচাৰীয়ে চন্দ্ৰক প্ৰদক্ষিণ কৰিব । ১৯৭২ চনৰ পিছত প্ৰথমবাৰৰ বাবে মানুহে ইমান দূৰলৈ যাত্ৰা কৰিবৱলৈ সাজু হৈছে ।

শুকুৰবাৰে নাছাৰ চাৰিজন মহাকাশচাৰীয়ে ফ্ল’ৰিডাত উপস্থিত হয় আৰু ইয়াৰ পিছতে এতিয়া এই অভিযানৰ চূড়ান্ত প্ৰস্তুতি আৰম্ভ কৰিছে । কামাণ্ডাৰ ৰিড ৱাইজমেন, পাইলট ভিক্টৰ গ্লভাৰ আৰু ক্ৰীষ্টিনা কোচ আৰু কানাডাৰ জেৰেমি হেনচেনে হিউষ্টনৰ পৰা টি-৩৮ জেট বিমানত কেনেডি স্পেচ চেণ্টাৰত উপস্থিত হয় । তাৰ পৰাই তেওঁলোকে ১ এপ্ৰিলত বিশাল এছ এল এছ ৰকেটত উঠি যাত্ৰা কৰিব ।

এই অভিযান প্ৰায় ১০ দিন ধৰি চলিব । তীব্ৰ বেগেৰে চন্দ্ৰৰ কাষেৰে উৰি পৃথিৱীলৈ উভতি আহিব তেওঁলোক । এই অভিযানত চন্দ্ৰত অৱতৰণ নহ’ব; বৰঞ্চ চন্দ্ৰৰ ওচৰত পৰা প্ৰদক্ষিণ কৰি উভতি আহিব । নাছাই এই অভিযানক আৰ্টেমিছৰ প্ৰথমটো ক্ৰু পৰীক্ষণ বুলি অভিহিত কৰিছে ।

উল্লেখ্য যে, এই অভিযান বহু দিশত ঐতিহাসিক বুলি বিবেচিত হৈছে । ভিক্টৰ গ্লভাৰ হ’ব চন্দ্ৰলৈ উৰা মৰা প্ৰথমজন কৃষ্ণাংগ মহাকাশচাৰী । চন্দ্ৰৰ ওচৰলৈ উৰা মাৰিব প্ৰথমগৰাকী মহিলা ক্ৰীষ্টিনা কোচ । জেৰেমি হেনচেন হ’ব পৃথিৱীৰ নিম্ন কক্ষপথৰ বাহিৰলৈ উৰা প্ৰথমজন অনা আমেৰিকান মহাকাশচাৰী । কামাণ্ডাৰ ৰিড ৱাইজমেন ইতিমধ্যে যথেষ্ঠ অভিজ্ঞ ।

কিয় গুৰুত্বপূৰ্ণ এই অভিযান ?

গভীৰ মহাকাশৰ বাবে ডিজাইন কৰা অৰিয়ান কেপচুলত মহাকাশচাৰীসকলে যাত্ৰা কৰিব । এই অভিযানে অৰিয়ানৰ লাইফ চাপৰ্ট চিষ্টেম, নেভিগেচন, যোগাযোগ আৰু হিট শ্বিল্ডৰ সম্পূৰ্ণ পৰীক্ষা কৰিব । কামাণ্ডাৰ ৱাইজমেনে কয় যে দেশ আৰু বিশ্বই দীৰ্ঘদিন ধৰি ইয়াৰ বাবে অপেক্ষা কৰি আহিছে । এই অভিযান কেৱল চন্দ্ৰলৈ যোৱাৰ কথা নহয়, নাছাৰ বহু কোটি টকীয়া আৰ্টেমিছ কাৰ্যসূচীৰ প্ৰকৃত পৰীক্ষা । যদি সকলো ঠিকে থাকে তেন্তে ভৱিষ্যতৰ অভিযানে চন্দ্ৰত অৱতৰণ কৰি দীৰ্ঘ সময়ৰ বাবে তাত থকাটো সহজ কৰি তুলিব ।

লগতে পঢ়ক : নাছাৰ ডাঙৰ ঘোষণা; চন্দ্ৰত স্থাপন কৰিব স্থায়ী মানৱ ভিত্তি