সোমবাৰে আৰ্টেমিছ-২ৰ চাৰিজন মহাকাশচাৰীয়ে চন্দ্ৰৰ মহাকৰ্ষণ ক্ষেত্ৰত উপস্থিত হয়
আৰ্টেমিছ-২ চন্দ্ৰৰ মহাকৰ্ষণ ক্ষেত্ৰত উপনীত হৈছে । ইতিমধ্যে এই অভিযানে পৃথিৱীৰ পৰা ৪০৬,৭৭৩ কিলোমিটাৰ দূৰত্ব অতিক্ৰম কৰি সৰ্বাধিক দীঘলীয়া মহাকাশ উৰণৰ অভিলেখ ভংগ কৰিছে । এই দূৰত্ব ১৯৭০ চনত এপ’ল’ ১৩ য়ে স্থাপন কৰা অভিলেখতকৈ প্ৰায় ২৫০০ কিলোমিটাৰ বেছি । বিগত ৫৩ বছৰ ধৰি মহাকাশলৈ যোৱা প্ৰতিজন মহাকাশচাৰী আকাশৰ সংকীৰ্ণ অঞ্চলত আৱদ্ধ হৈ আছে, যি বিশ্বব্ৰহ্মাণ্ডৰ এক নগণ্য অংশ স্পৰ্শ কৰিছে । কিন্তু সোমবাৰে আৰ্টেমিছ-২ৰ চাৰিজন মহাকাশচাৰীয়ে চন্দ্ৰৰ মহাকৰ্ষণ ক্ষেত্ৰত উপস্থিত হয় ।
আৰ্টেমিছ-২য়ে ২০২৬ চনৰ ৭ এপ্ৰিলত, ভাৰতীয় ষ্টেণ্ডাৰ্ড টাইম অনুসৰি পুৱা ১২:১৫ বজাত চন্দ্ৰৰ কাষেৰে উৰা মাৰিব । পৃথিৱীলৈ উভতি অহাৰ পূৰ্বে চন্দ্ৰৰ দূৰৈৰ অংশটো প্ৰদক্ষিণ কৰিব এই অভিযানৰ ক্ৰুৱে । তুলনামূলকভাৱে আন্তৰ্জাতিক মহাকাশ কেন্দ্ৰ পৃথিৱীৰ পৰা ৪০০ কিলোমিটাৰ ওপৰত প্ৰদক্ষিণ কৰে । চন্দ্ৰ পৃথিৱীৰ পৰা প্ৰায় ৩৮৪,৬৩৩ কিলোমিটাৰ দূৰত্বত । আৰ্টেমিছ-২ চন্দ্ৰৰ বাহিৰলৈ আৰু অধিক দূৰলৈ যাত্ৰা কৰি এপ’ল’ যুগৰ পৰা ঢুকি নোপোৱা অঞ্চলত প্ৰৱেশ কৰিব । এপ’ল’ ১৩ৰ ৪ লাখ ১৭১ কিলোমিটাৰ দৌৰৰ অভিলেখ ভংগ কৰিব এই অভিযানে । সম্পূৰ্ণ প্ৰস্তুতি আৰু পৰিকল্পনাৰ দ্বাৰা আৰ্টেমিছ-২য়ে এই অভিলেখ প্ৰায় অতিৰিক্ত ২৫০০ কিলোমিটাৰ অতিক্ৰম কৰিব ।
উল্লেখ্য যে, এই অভিযানত ব্যৱহৃত অৰিয়ান মহাকাশযান চন্দ্ৰত অৱতৰণ কৰা যান নহয় । গতিকে ই চন্দ্ৰপৃষ্ঠত অৱতৰণ নকৰে । আৰ্টেমিছ অভিযানৰ অধীনত চন্দ্ৰত মানুহৰ অৱতৰণৰ বাবে ব্যৱহাৰ কৰিব পৰা প্ৰথমখন চন্দ্ৰ লেণ্ডাৰ বৰ্তমান নিৰ্মাণৰ কাম চলি আছে । ইলন মাস্কৰ কোম্পানী স্পেচএক্সে নিৰ্মাণ কৰি থকা এই নতুন লেণ্ডাৰখনক ষ্টাৰশ্বিপ এইচ এল এছ নামেৰে নামাকৰণ কৰা হৈছে । ইয়াক আৰ্টেমিছ-৩ মিছনত ব্যৱহাৰ কৰা হ’ব । গতিকে আৰ্টেমিছ-২ চন্দ্ৰত অৱতৰণৰ প্ৰস্তুতি পৰীক্ষা কৰাৰ এক গুৰুত্বপূৰ্ণ অভিযান ।
লগতে পঢ়ক : ক্ৰমে চন্দ্ৰৰ কাষ চাপিছে আৰ্টেমিছ-২, ভংগ কৰিব এপ’ল’ ১৩ৰ অভিলেখ
