ৰাজ্যসভাত আম আদমি পাৰ্টিৰ নেতৃত্বৰ গাঁথনিত বৃহৎ পৰিৱৰ্তন ঘটাই সাংসদ ৰাঘৱ চাদ্দাক উপ-নেতা পদৰ পৰা অপসাৰণ কৰা হয়। তেওঁৰ ঠাইত দলে সাংসদ অশোক কুমাৰ মিত্তলক নতুন উপ-নেতা হিচাপে নিযুক্তি দিছে।
আম আদমী পাৰ্টিয়ে ৰাজ্যসভাৰ উপ-দলপতি পদৰ পৰা ৰাঘৱ চাদ্দাক অপসাৰণ কৰিছে । এই তথ্য আপে ৰাজ্যসভা সচিবালয়লৈ পত্ৰ যোগে প্ৰদান কৰিছে । সংসদত ভাষণ দিবলৈ ৰাঘৱ চাদ্দাকক সময় নিদিবলৈও অনুৰোধ জনাইছে আপে । ৰাজ্যসভাত দলটোৰ নতুন উপ-দলপতি হ’ব পঞ্জাৱৰ ৰাজ্যসভাৰ সাংসদ ড০ অশোক মিত্তল । এই পত্ৰ আপে ৰাজ্যসভা সচিবালয়লৈ প্ৰেৰণ কৰিছে ।
কিছুদিনৰ পৰা ৰাঘৱ চাদ্দা আৰু আপৰ মাজত বিভাজন বা মতানৈক্যৰ খবৰ আৰু জল্পনা-কল্পনা প্ৰচাৰ হৈ আছে । আপৰ এই পদক্ষেপে তেওঁলোকৰ মাজত চলি থকা বিৰোধ নিশ্চিত কৰা যেন লাগে । অৱশ্যে এই বিবাদ সন্দৰ্ভত কোন পক্ষই আনুষ্ঠানিক বিবৃতি প্ৰকাশ কৰা নাই ।
বৰ্তমান ৰাজ্যসভাত আপৰ ১০ জন গৰাকী সদস্য আছে । ইয়াৰে পঞ্জাৱৰ ৭ জন আৰু দিল্লীৰ ৩ জন সদস্য আছে । পঞ্জাৱৰ ৰাজ্যসভাৰ সাংসদ ৰাঘৱ চাদ্দা আম আদমী পাৰ্টিৰ সৈতে জড়িত । ২০১২ চনত তেওঁ অৰবিন্দ কেজৰিৱালৰ সৈতে দিল্লী লোকপাল বিধেয়ক সন্দৰ্ভত কাম কৰি কৰ্মজীৱন আৰম্ভ কৰিছিল ।
তেওঁ দলৰ ভিতৰত দ্ৰুতগতিত উত্থান ঘটাই ৰাষ্ট্ৰীয় মুখপাত্ৰ হিচাপে পৰিগণিত হয় আৰু ২০১৫ চনৰ দিল্লী নিৰ্বাচনত আপৰ জয়ৰ পিছত দলৰ আটাইতকৈ কম বয়সীয়া কোষাধ্যক্ষ হিচাপে পৰিগণিত হয় । ২০১৯ চনৰ লোকসভা নিৰ্বাচনত তেওঁ দক্ষিণ দিল্লীৰ পৰা প্ৰতিদ্বন্দ্বিতা কৰিছিল যদিও ৰমেশ বিধুৰীৰ হাতত পৰাস্ত হৈছিল । ইয়াৰ পিছতে ৰাজেন্দ্ৰ নগৰৰ পৰা ২০২০ চনৰ দিল্লী বিধানসভা নিৰ্বাচনত জয়লাভ কৰে তেওঁ ।
২০২২ চনত ৰাঘৱ চাদ্দা ৩৩ বছৰ বয়সতে ৰাজ্যসভাৰ আটাইতকৈ কম বয়সীয়া সাংসদ হিচাপে পৰিগণিত হয় আৰু তাৰ পিছৰ পৰাই তেওঁ আপৰ সংসদীয় আৰু সাংগঠনিক বিষয়ত গুৰুত্বপূৰ্ণ ভূমিকা পালন কৰি মনীষ ছিছ’দিয়া আৰু ভগৱন্ত মানৰ দৰে নেতাৰ সৈতে কাম কৰি আহিছে । ২০২৩ চনত সঞ্জয় সিঙৰ ঠাইত আপে তেওঁক ৰাজ্যসভাত নেতা হিচাপে নিযুক্তি দিয়ে ।
লগতে পঢ়ক: মমতাৰ দুৰ্গত বিজেপিৰ শক্তি প্ৰদৰ্শন, অমিত শ্বাহৰ উপস্থিতিত মনোনয়ন দাখিল শুভেন্দু অধিকাৰীৰ
