ইৰানে ভাৰতীয় টেংকাৰসমূহক হৰমুজ প্ৰণালীৰ মাজেৰে নিৰাপদ যাতায়তৰ অনুমতি প্ৰদান কৰিছে
পশ্চিম এছিয়াত চলি থকা সংঘাতৰ মাজতে ভাৰতে লাভ কৰিছে বৃহৎ সকাহ । জানিব পৰা মতে বৈদেশিক পৰিক্ৰমা মন্ত্ৰী এছ জয়শংকৰ আৰু ইৰানৰ বৈদেশিক মন্ত্ৰী ছেইয়দ আব্বাছ আৰাঘচিৰ মাজত হোৱা টেলিফোনিক বাৰ্তালাপৰ পিছত ইৰানে ভাৰতীয় টেংকাৰসমূহক হৰমুজ প্ৰণালীৰ মাজেৰে নিৰাপদ যাতায়তৰ অনুমতি প্ৰদান কৰিছে । ভাৰতৰ শক্তি সুৰক্ষাৰ বাবে এয়া এক উল্লেখযোগ্য পদক্ষেপ, কিয়নো হৰমুজ প্ৰণালী বিশ্বৰ অন্যতম গুৰুত্বপূৰ্ণ সাগৰীয় পথ, য’ত বিশ্বৰ তেল আৰু প্ৰাকৃতিক গেছৰ এক উল্লেখযোগ্য অংশ পাৰ হয় ।
আৰাঘচিৰ সৈতে বৈদেশিক মন্ত্ৰীয়ে বাৰ্তালাপ কৰাৰ পিছতে ইৰাণে ভাৰতীয় তেল টেংকাৰক হৰমুজ প্ৰণালীৰ মাজেৰে পাৰ হ’বলৈ অনুমতি দিছে বুলি বৃহস্পতিবাৰে বাতৰিত প্ৰকাশ পাইছে । দুয়োগৰাকী বৈদেশিক মন্ত্ৰীৰ মাজত হোৱা আলোচনাৰ লক্ষ্য আছিল এই গুৰুত্বপূৰ্ণ সাগৰীয় পথটো মুকলি কৰি ৰখা যাতে খাৰুৱা তেল আৰু প্ৰাকৃতিক গেছৰ যোগানত ব্যাঘাত জন্মিব নোৱাৰে ।
জানিব পৰা মতে বৈদেশিক পৰিক্ৰমা মন্ত্ৰী এছ জয়শংকৰে কেৱল ইৰানৰ সৈতে নহয়, বিশ্বৰ অন্যান্য প্ৰধান শক্তিসমূহৰ সৈতেও বাৰ্তালাপ কৰে । এই জটিল বিষয়টো তেওঁ ৰাছিয়াৰ বৈদেশিক মন্ত্ৰী চাৰ্গেই লাভৰভ আৰু ফ্ৰান্সৰ বৈদেশিক মন্ত্ৰী জিন ন’ৱেল বাৰোৰ সৈতেও আলোচনা কৰে । এই আলোচনাসমূহৰ লক্ষ্য আছিল সামুদ্ৰিক বাণিজ্যিক পথসমূহ মুকলি কৰি ৰখা আৰু বিশ্বৰ যোগান শৃংখলাত ব্যাঘাত জন্মাটো ৰোধ কৰা ।
আমেৰিকা, ইউৰোপ, ইজৰাইলৰ সৈতে সংযুক্ত জাহাজসমূহে এই পথত কঠোৰ নিষেধাজ্ঞাৰ সন্মুখীন হোৱাৰ সময়ত ইৰানে ভাৰতক এই বিশেষ ৰেহাই প্ৰদান কৰিছে । ভাৰতক এই ৰেহাই প্ৰদান কৰি ইৰানে এইটোও স্পষ্ট কৰি দিছে যে আমেৰিকা, ইউৰোপ, ইজৰাইলৰ সৈতে সংযুক্ত জাহাজৰ ওপৰত নিষেধাজ্ঞা অব্যাহত থাকিব যদিও ভাৰতীয় টেংকাৰে নিৰাপদে হৰমুজ প্ৰণালী অতিক্ৰম কৰিব পাৰিব । ভাৰতৰ বাবে এয়া এক কূটনৈতিক সফলতা, কিয়নো বৰ্তমান হৰমুজ প্ৰণালীত জাহাজৰ যাতায়ত ৯০% হ্ৰাস পাইছে, যাৰ ফলত কেইবাখনো দেশৰ টেংকাৰ আবদ্ধ হৈ আছে ।
লগতে পঢ়ক : হৰমুজ প্ৰণালীত ভাৰত অভিমুখী জাহাজত আক্ৰমণ, বিদেশ মন্ত্ৰালয়ৰ প্ৰতিক্ৰিয়া
