বাস্তৱতে বিশ্বৰ বেছিভাগ ইণ্টাৰনেট ট্ৰেফিক সাগৰৰ তলৰ ফাইবাৰ-অপ্টিক কেবলৰ জৰিয়তে যাত্ৰা কৰে । দিহে হৰমুজ প্ৰণালীত উত্তেজনা বৃদ্ধি পায়, তেন্তে সাগৰৰ তলেৰে যোৱা কেবলত বহুতো প্ৰভাৱ পৰিব পাৰে ।
পশ্চিম এছিয়াৰ বৰ্ধিত উত্তেজনাৰ মাজতে হৰমুজ প্ৰণালীক লৈয়ো বিতৰ্ক তীব্ৰতৰ হৈ পৰিছে । এই সাগৰীয় পথটো দীৰ্ঘদিন ধৰি বিশ্বৰ অন্যতম গুৰুত্বপূৰ্ণ তেল পৰিবহণ পথ হিচাপে বিবেচিত হৈ আহিছে । অৱশ্যে কেৱল পেট্ৰ’ল আৰু ডিজেলৰ বাবেই নহয় ডিজিটেল আন্তঃগাঁথনিৰ বাবেও ই অতি গুৰুত্বপূৰ্ণ বুলি বিবেচিত হৈছে । এই অঞ্চলত অসংখ্য ফাইবাৰ-অপ্টিক কেবল সাগৰৰ তলত স্থাপন কৰা হৈছে যিয়ে ইণ্টাৰনেটৰ তথ্য এখন দেশৰ পৰা আন এখন দেশলৈ লৈ যায় । বিশেষজ্ঞসকলৰ মতে এই অঞ্চলত সংঘাত বা বিঘিনি ঘটিলে কেৱল তেলৰ বজাৰতে নহয়, ইণ্টাৰনেট সেৱাতো প্ৰভাৱ পৰিব পাৰে ।
বহু লোকে ধাৰণা কৰে যে ইণ্টাৰনেট উপগ্ৰহৰ দ্বাৰা চালিত হয়, কিন্তু বাস্তৱতে বিশ্বৰ বেছিভাগ ইণ্টাৰনেট ট্ৰেফিক সাগৰৰ তলৰ ফাইবাৰ-অপ্টিক কেবলৰ জৰিয়তে যাত্ৰা কৰে । এই একে কেবলসমূহে ইমেইল, অনলাইন বেংকিং, ক্লাউড ডাটা, ভিডিঅ’ কল, ষ্ট্ৰীমিং, আৰু আন্তঃৰাষ্ট্ৰীয় ডিজিটেল লেনদেন সক্ষম কৰি তোলে । সেইবাবেই এই অঞ্চলটোত যিকোনো অস্থিৰতাই বিশ্বব্যাপী ইণ্টাৰনেট নেটৱৰ্কৰ বাবে বিপদৰ সৃষ্টি কৰিব পাৰে, যাৰ ফলত আমাৰ ইণ্টাৰনেট সেৱাত প্ৰত্যক্ষ প্ৰভাৱ পৰিব পাৰে ।
ভাৰতৰো আন্তঃৰাষ্ট্ৰীয় ইণ্টাৰনেট সংযোগ বহু পৰিমাণে আৰব সাগৰৰ মাজেৰে উপসাগৰীয় অঞ্চল আৰু ইউৰোপলৈ যোৱা সাগৰৰ তলৰ কেবলৰ ওপৰত নিৰ্ভৰশীল । এই কেবলবোৰৰ এটা বৃহৎ অংশ হৰমুজ বন্দৰৰ মাজেৰে পাৰ হৈ যায় । বাতৰি অনুসৰি ভাৰতৰ পশ্চিম দিশলৈ যোৱা ইণ্টাৰনেটৰ প্ৰায় এক তৃতীয়াংশ এই অঞ্চলৰ মাজেৰে পাৰ হৈ যায় । অৰ্থাৎ ভাৰতৰ পৰা বিদেশলৈ তথ্য যাতায়তৰ এক উল্লেখযোগ্য অংশ এই পথৰ ওপৰত নিৰ্ভৰশীল । এই ডাটা ট্ৰেফিক আমাৰ গুৰুত্বপূৰ্ণ প্ৰয়োজনীয়তাসমূহ যেনে- ক্লাউড কম্পিউটিং প্লেটফৰ্ম, আন্তঃৰাষ্ট্ৰীয় বেংকিং আৰু বিত্তীয় নেটৱৰ্ক, বহুজাতিক কোম্পানীসমূহৰ ডিজিটেল পৰিচালনা, ছ’চিয়েল মিডিয়া আৰু ষ্ট্ৰীমিং সেৱা, উপসাগৰীয় অঞ্চলত দ্ৰুতগতিত বৃদ্ধি পোৱা ডিজিটেল আন্তঃগাঁথনিপূৰণ কৰাত সহায় কৰে ।
বিশেষজ্ঞসকলৰ মতে, যদিহে হৰমুজ প্ৰণালীত উত্তেজনা বৃদ্ধি পায়, তেন্তে সাগৰৰ তলেৰে যোৱা কেবলত বহুতো প্ৰভাৱ পৰিব পাৰে । সাগৰৰ তলত পৰি থকা কেবলবোৰ জাহাজৰ লংগৰ, সামুদ্ৰিক দুৰ্ঘটনা, নৌসেনাৰ কাৰ্যকলাপ বা পানীৰ তলত বিস্ফোৰণৰ ফলত ক্ষতিগ্ৰস্ত হ’ব পাৰে । আনকি এডাল কেবল ক্ষতিগ্ৰস্ত হ’লেও ইণ্টাৰনেট ট্ৰেফিকত যথেষ্ট পৰিমাণৰ ব্যাঘাত জন্মিব পাৰে ।
আনহাতে সাধাৰণ পৰিস্থিতিত এই কেবলসমূহ বিশেষ জাহাজ ব্যৱহাৰ কৰি মেৰামতি কৰা হয়, কিন্তু যুদ্ধ বা নিৰাপত্তাৰ বিপদৰ ক্ষেত্ৰত মেৰামতি কৰাটো কঠিন হৈ পৰে । এনে মেৰামতিৰ বাবে কেতিয়াবা কেইবামাহো লাগিব পাৰে । ইফালে প্ৰকাশিত এক প্ৰতিবেদন অনুসৰি, ইণ্টাৰনেট ট্ৰেফিক তাত্ত্বিকভাৱে অন্য কেবল পথলৈ পুনৰ স্থানান্তৰ কৰিব পৰা যাব, কিন্তু সেই পথসমূহত পৰ্যাপ্ত ক্ষমতাৰ অভাৱ । ইয়াৰ ফলত ইণ্টাৰনেটৰ গতি লেহেমীয়া হ’ব পাৰে আৰু নেটৱৰ্কৰ চাপ বৃদ্ধি পাব পাৰে ।
যদিহে হৰমুজ প্ৰণালীৰ আশে-পাশে থকা কেবলত বিঘিনি ঘটে তেন্তে ভাৰতৰ ঘৰুৱা ইণ্টাৰনেট নেটৱৰ্কত শীঘ্ৰেই কোনো প্ৰভাৱ নপৰে, কিন্তু আন্তঃৰাষ্ট্ৰীয় সংযোগত প্ৰভাৱ পৰিব পাৰে । ইয়াৰ ফলত বিদেশী চাৰ্ভাৰৰ সৈতে সংযুক্ত সেৱাসমূহৰ লগতে আন্তঃৰাষ্ট্ৰীয় লেনদেন, বিশ্বব্যাপী চফ্টৱেৰ প্লেটফৰ্মসমূহ আৰু বিদেশী ৱেবছাইটসমূহৰ গতিত প্ৰভাৱ পৰিব পাৰে । ব্যৱহাৰকাৰীসকলে ইণ্টাৰনেটৰ গতি লেহেমীয়া বা সেৱাত বিলম্বৰ সন্মুখীন হ’ব পাৰে ।
লগতে পঢ়ক : আবুধাবিৰ সৰ্ববৃহৎ হিন্দু মন্দিৰত হাই এলাৰ্ট, যুদ্ধৰ মাজতে বন্ধ BAPS মন্দিৰ
