বাংলাদেশত নতুন চৰকাৰৰ শপতগ্ৰহণ অনুষ্ঠানত বাংলাদেশৰ নতুন প্ৰধানমন্ত্ৰী হিচাপে শপত গ্ৰহণ কৰিব বাংলাদেশ নেশ্যনেলিষ্ট পাৰ্টিৰ নেতা তাৰিকে ৰহমানে ।
বাংলাদেশত নতুন চৰকাৰে ক্ষমতা দখল কৰাৰ পূর্বে পদত্যাগ কৰিছে বাংলাদেশৰ অন্তৱৰ্তীকালীন চৰকাৰী মুৰব্বী মহম্মদ ইউনুছে । প্ৰাক্তন প্ৰধানমন্ত্ৰী তথা আৱামি লীগৰ মুৰব্বী শ্বেখ হাছিনাক পদচ্যুত কৰাৰ পিছত গঠন হোৱা অন্তৱৰ্তীকালীন চৰকাৰৰ মুখ্য উপদেষ্টা হিচাপে দায়িত্ব গ্ৰহণ কৰিছিল মহম্মদ ইউনুছে । বাংলাদেশৰ ত্ৰয়োদশ সংসদীয় নিৰ্বাচনৰ পিছত নিৰ্বাচিত চৰকাৰক ক্ষমতা অৰ্পণ কৰাৰ পূৰ্বে তেওঁ দেশবাসীক বিদায় ভাষণত এই কথা ঘোষণা কৰে ।
মহম্মদ ইউনুছে তেওঁৰ ভাষণত কয় যে, “আজি অন্তৱৰ্তীকালীন চৰকাৰখনে কাৰ্যভাৰ এৰিছে, কিন্তু বাংলাদেশত আৰম্ভ হোৱা মৌলিক অধিকাৰ, বাক স্বাধীনতা আৰু গণতন্ত্ৰৰ প্ৰক্ৰিয়াটো বন্ধ কৰা উচিত নহয় ।” ২০২৪ চনৰ আগষ্ট মাহত শ্বেখ হাছিনাৰ চৰকাৰ পতনৰ সময়ত ইউনুছে বাংলাদেশলৈ উভতি আহিছিল । ইউনুছে কয়, “সেইটো আছিল মহান মুক্তিৰ দিন । কি যে আনন্দৰ দিন! বাংলাদেশীসকলে আনন্দৰ চকুলো টুকিলে । আমাৰ দেশৰ যুৱক-যুৱতীসকলে দেশক এটা দানৱৰ কবলৰ পৰা মুক্ত কৰিলে ।”
বাংলাদেশত নতুন চৰকাৰৰ শপতগ্ৰহণ অনুষ্ঠানত বাংলাদেশৰ নতুন প্ৰধানমন্ত্ৰী হিচাপে শপত গ্ৰহণ কৰিব বাংলাদেশ নেশ্যনেলিষ্ট পাৰ্টিৰ নেতা তাৰিকে ৰহমানে । নতুন বাংলাদেশ চৰকাৰৰ শপতগ্ৰহণ অনুষ্ঠানত অংশগ্ৰহণ কৰিবলৈ ভাৰতকো আমন্ত্ৰণ জনোৱা হৈছে । যদিও প্ৰধানমন্ত্ৰী নৰেন্দ্ৰ মোদীয়ে বাংলাদেশলৈ নাযায়, তথাপি তাৰিক ৰহমানৰ শপত গ্ৰহণ অনুষ্ঠানত অংশগ্ৰহণ কৰিব লোকসভাৰ অধ্যক্ষ ওম বিৰলাই ।
লগতে পঢ়ক : ইজৰাইল ভ্ৰমণলৈ যাব প্ৰধানমন্ত্ৰী মোদী, উৎফুল্লিত নেতানিয়াহু…
