আমেৰিকাক সকীয়াই ইৰাণে কয় যে যদি কোনো ভুল হয় তেন্তে কোনো আমেৰিকান নিৰাপদ হৈ নাথাকিব আৰু অঞ্চলটোৰ জুইয়ে আমেৰিকা আৰু ইয়াৰ মিত্ৰ দেশসমূহক আগুৰি ধৰিব ।
ইৰাণ আৰু আমেৰিকাৰ মাজত উত্তেজনা শীৰ্ষবিন্দুত উপনীত হৈছে । ইৰাণৰ শীৰ্ষ সামৰিক বিষয়াই আমেৰিকাক কঠোৰ সতৰ্কবাণী জাৰি কৰি কয় যে যদি কোনো ভুল হয় তেন্তে কোনো আমেৰিকান নিৰাপদ নহয় আৰু অঞ্চলটোৰ জুইয়ে আমেৰিকা আৰু ইয়াৰ মিত্ৰ দেশসমূহক আগুৰি ধৰিব । উত্তেজনা নিৰাময়ৰ বাবে কূটনৈতিক প্ৰচেষ্টা অব্যাহত আছে । খবৰ অনুসৰি অনাগত দিনত দুয়োখন দেশৰ মাজত বৃহৎ আলোচনাৰ সম্ভাৱনা আছে ।
ইৰাণ সেনাৰ মুৰব্বী আব্দ আল ৰহিম মৌছাভিয়ে সোমবাৰে কয় যে, “শত্ৰুৰ সৰু ভুলে আমাক ব্যৱস্থা গ্ৰহণৰ স্বাধীনতা প্ৰদান কৰিব । যেতিয়া বিশ্বই শক্তিশালী ইৰাণৰ বেলেগ দিশ দেখিব, তেতিয়া কোনো আমেৰিকান নিৰাপদ হৈ নাথাকিব । তদুপৰি অঞ্চলটোৰ জুইয়ে আমেৰিকা আৰু ইয়াৰ মিত্ৰ দেশসমূহক আগুৰি ধৰিব ।”
যুদ্ধৰ সূচনা হ’লে আঞ্চলিক প্ৰতিৰোধৰ পুৰুষ-মহিলাই অঞ্চলটোত বাহিৰৰ যিকোনো উপস্থিতি সম্পূৰ্ণৰূপে নিঃশেষ কৰি পেলাব বুলিও তেওঁ কয় । তেওঁ জোৰ দি কয় যে ইৰাণৰ সশস্ত্ৰ বাহিনী যিকোনো আক্ৰমণৰ প্ৰতিশোধ ল’বলৈ সম্পূৰ্ণৰূপে সাজু ।
ইৰাণৰ সমীপত আমেৰিকাৰ নৌসেনাই সামৰিক নিয়োগ বৃদ্ধি কৰাৰ সময়তে ইৰাণ সেনাবাহিনীৰ চীফ অফ ষ্টাফৰ এই বক্তব্য প্ৰকাশ পাইছে । যোৱা সপ্তাহত ৰাষ্ট্ৰপতি ড’নাল্ড ট্ৰাম্পে কৈছিল যে ইৰাণে ৱাশ্বিংটনৰ সৈতে আলোচনাত মিলিত হৈছে । অৱশ্যে ইৰাণৰ বিৰুদ্ধে সামৰিক ব্যৱস্থা লোৱাৰ সম্ভাৱনা ট্ৰাম্পে নুই কৰা নাই ।
লগতে পঢ়ক : ‘আল্লাহে ইচ্ছা কৰিলে…’, ট্ৰাম্পক খামেইনীৰ মুকলি প্ৰত্যাহ্বান, মধ্যপ্ৰাচ্যত আলোড়ন
