উমৰাহ হজলৈ যোৱা ভাৰতীয়ৰ সৈতে ভয়ংকৰ ঘটনা
ছৌদি আৰৱত সংঘটিত হৈছে এক ভয়ংকৰ পথ দুৰ্ঘটনা । এই দুৰ্ঘটনাত কমেও ৪২ জন ভাৰতীয়ৰ মৃত্যু হোৱা বুলি জানিব পৰা গৈছে । আটাইকেইজনেই উমৰাহ হজৰ বাবে চৌদি আৰৱলৈ গৈছিল । সোমবাৰে পুৱা এখন বাছত মক্কাৰ পৰা মদিনা অভিমুখে গৈ আছিল যাত্ৰীসকল । গৈ থকা অৱস্থাতে ডিজেল টেংকাৰৰ সৈতে বাছখন সংঘৰ্ষত লিপ্ত হয় আৰু লগে লগে বাছখন জুইয়ে আগুৰি ধৰে । প্ৰাথমিক খবৰ অনুসৰি মুফাৰীহাটৰ সমীপত প্ৰায় ১:৩০ বজাত সংঘটিত হয় এই দুৰ্ঘটনা ।
জানিব পৰা মতে নিহতসকলৰ ভিতৰত মহিলা আৰু শিশুও আছে । আটাইকেইজন হায়দৰাবাদ আৰু তেলেংগানাৰ বাসিন্দা আছিল বুলি জানিব পৰা গৈছে । প্ৰাথমিক তথ্য অনুসৰি দুৰ্ঘটনাৰ সময়ত বাছখনত প্ৰায় ২০ গৰাকী মহিলা আৰু ১১ টা শিশু আছিল ।
মক্কাৰ পৰা মদিনালৈ গৈ থকা অৱস্থাত সংঘটিত হয় এই দুৰ্ঘটনা-
এই ভাৰতীয় যাত্ৰীসকল উমৰাহ হজলৈ গৈ আছিল । মক্কাত নিজৰ ৰীতি-নীতি সম্পূৰ্ণ কৰাৰ পিছত মদীনালৈ গৈ থকা অৱস্থাত দুৰ্ঘটনাটো সংঘটিত হয় । দুৰ্ঘটনাৰ সময়ত বহু যাত্ৰী বাছখনত শুই থকা বুলি জানিব পৰা গৈছে । এই ভয়ংকৰ দুৰ্ঘটনাত ৪২ জনৰ মৃত্যু হয় । জৰুৰীকালীন সেৱাই ঘটনাৰ লগে লগে উদ্ধাৰ অভিযান আৰম্ভ কৰে ।
হেল্পলাইন নম্বৰ মুকলি-
মদিনাৰ সমীপত চৌদি আৰৱত ভাৰতীয় উমৰাহ তীৰ্থযাত্ৰীৰ সৈতে সংঘটিত হোৱা মৰ্মান্তিক বাছ দুৰ্ঘটনাৰ পিছত জেদ্দাত থকা ভাৰতীয় কনছুলেট জেনেৰেলত ২৪x৭ নিয়ন্ত্ৰণ কক্ষ স্থাপন কৰা হৈছে । সহায়ৰ বাবে হেল্পলাইন নম্বৰ মুকলি কৰা হৈছে :
৮০০২৪৪০০০৩ (টোল ফ্ৰী)
০১২২৬১৪০৯৩
০১২৬৬১৪২৭৬
০৫৫৬১২২৩০১ (ৱাটছএপ)
লগতে পঢ়ক : শ্বেখ হাছিনাক মৃত্যুদণ্ড; মানৱতাৰ বিৰুদ্ধে অপৰাধত দোষী সাব্যস্ত
