মহিলা ক্ৰিকেট বিশ্বকাপ
দেওবাৰে নৱী মুম্বাইৰ ডি ৱাই পাটিল ষ্টেডিয়ামত ইতিহাস ৰচনা কৰিবলৈ মাত্ৰ এখোজ দূৰত আছে ভাৰতীয় মহিলা ক্ৰিকেট দল । ২০২৫ চনৰ মহিলা এদিনীয়া ক্ৰিকেট বিশ্বকাপৰ ফাইনেলত দক্ষিণ আফ্ৰিকাৰ মুখামুখি হ’ব টিম ইণ্ডিয়া । ৩:০০ বজাৰ পৰা আৰম্ভ হ’ব মেচখন । আধা ঘণ্টা পূৰ্বে ২:৩০ বজাত টছ অনুষ্ঠিত হোৱাৰ কথা আছিল যদিও বৰ্তমান বৰষুণৰ বাবে টছত অনুষ্ঠিত হোৱাত পলম হৈছে । এইবাৰ প্ৰতিযোগিতাৰ বাজী কেৱল ট্ৰফী নহয়; এই বিজয়ে ভাৰতীয় দলৰ ওপৰত পেলাব টকাৰ বৰষুণ । উল্লেখ্য যে, প্ৰায় ২৫ বছৰৰ পাছত মহিলা ক্ৰিকেট বিশ্বকাপে লাভ কৰিব নতুন চেম্পিয়ন দল ।
প্ৰতিযোগিতা আৰম্ভ হোৱাৰ পূৰ্বে আই চি চিয়ে ঘোষণা কৰিছিল যে ২০২৫ চনৰ মহিলা এদিনীয়া ক্ৰিকেট বিশ্বকাপৰ বিজয়ী দলটোৱে এতিয়ালৈকে পোৱা সৰ্বাধিক পুৰস্কাৰৰ ধন লাভ কৰিব । এই বছৰ চেম্পিয়ন দলটোৱে ৪.৪৮ মিলিয়ন মাৰ্কিন ডলাৰ অৰ্থাৎ প্ৰায় ৩৯.৫৫ লাভ কৰিব । এই পুৰস্কাৰৰ ধন পূৰ্বৰ সংস্কৰণ ২০২২ চনৰ মহিলা এদিনীয়া বিশ্বকাপতকৈ চাৰিগুণ বেছি ।
যোৱা মহিলা এদিনীয়া বিশ্বকাপ ২০২২ (নিউজীলেণ্ড)ত বিজয়ী দলটোৱে ১.৩২ মিলিয়ন ডলাৰ অৰ্থাৎ প্ৰায় ১১.৬৫ কোটি লাভ কৰিছিল । কিন্তু ২০২৫ চনৰ সংস্কৰণৰ বাবে পুৰস্কাৰৰ ধনৰ গাঁথনি সম্পূৰ্ণৰূপে সলনি কৰা হৈছে । এইবাৰ মুঠ পুৰস্কাৰৰ ধন হ’ব ১৩.৮৮ মিলিয়ন ডলাৰ (প্ৰায় ১২২.৫ কোটি), যিটো ২০২২ চনৰ বিশ্বকাপৰ প্ৰায় তিনিগুণ (৩.৫ মিলিয়ন বা ৩১ কোটি) । উল্লেখ্য য়ে, এই পুৰস্কাৰৰ ধন ২০২৩ চনৰ পুৰুষৰ ক্ৰিকেট বিশ্বকাপতকৈও অধিক (১০ মিলিয়ন বা ৮৮.২৬ কোটি)। ২০২৩ চনৰ পুৰুষৰ এদিনীয়া বিশ্বকাপৰ বিজয়ী দল অষ্ট্ৰেলিয়াই লাভ কৰে ৩৩.৩১ কোটি টকা । ইফালে ৰানাৰ্ছ আপ ভাৰতে লাভ কৰে ১৬.৬৫ কোটি ।
-বিজয়ী দলে ৪.৪৮ মিলিয়ন ডলাৰ লাভ কৰিব ( ভাৰতীয় হিচাপত ৩৯.৫৫ কোটি)
-ৰানাৰ্ছ আপ দলে লাভ কৰিব ২.২৪ মিলিয়ন (ভাৰতীয় হিচাপত ১৯.৭৭ কোটি)
-ছেমিফাইনেলত পৰাস্ত হোৱা প্ৰত্যেক দলে লাভ কৰিব ১.১২ মিলিয়ন (ভাৰতীয় হিচাপত ৯.৮৯ কোটি)
-গ্ৰুপ পৰ্যায়ৰ বিজয়ী দলে প্ৰতিখন খেলতে লাভ কৰিব ৩৪,৩১৪ ডলাৰ (ভাৰতীয় হিচাপত ৩০.২৯ লাখ)
-৫ম আৰু ৬ৰ্থ স্থান : ০.৭ মিলিয়ন ডলাৰ (প্ৰত্যেক) (ভাৰতীয় হিচাপত ৬২ লাখ)
৭ম আৰু ৮ম স্থান : ০.২৮ মিলিয়ন ডলাৰ (প্ৰত্যেক) (ভাৰতীয় হিচাপত ২৪.৭১ লাখ)
অংশগ্ৰহণকাৰী সকলো দল : ০.২৫ মিলিয়ন (প্ৰত্যেক) (ভাৰতীয় হিচাপত ২২ লাখ)
উল্লেখ্য যে, দেওবাৰে যদি ভাৰতে হৰমনপ্ৰীত কৌৰৰ অধিনায়কত্বত ফাইনেলত জয়লাভ কৰে তেন্তে দেশৰ প্ৰথমটো মহিলা এদিনীয়া বিশ্বকাপৰ খিতাপ দখল কৰাই নহয়, পুৰুষৰ দলতকৈ অধিক পুৰস্কাৰ লাভ কৰা ইতিহাসৰ প্ৰথমটো দল হিচাপে পৰিগণিত হ’ব । অৰ্থাৎ এইবাৰ খেলপথাৰত কেৱল আবেগেই নহয়, কাপৰ লগতে কোটি টকাৰ বৰষুণো হ’ব ।
লগতে পঢ়ক : আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰ ঘোষণা কেন উইলিয়ামছনৰ
