চিনেমাৰ ষ্টাইলত ফ্ৰান্সৰ প্ৰসিদ্ধ সংগ্ৰহালয়ত চুৰি
দেওবাৰে বিশ্বৰ অন্যতম বিখ্যাত আৰু ব্যস্ত সংগ্ৰহালয় লুভৰ সংগ্ৰহালয়ত মাত্ৰ চাৰি মিনিটতে সংঘটিত হয় এক চাঞ্চল্যকৰ চুৰিকাণ্ড । চোৰে বাস্কেট লিফ্ট ব্যৱহাৰ কৰি সংগ্ৰহালয়ৰ গেলেৰী ডেছ এপলনত প্ৰৱেশ কৰি নেপোলিয়ন যুগৰ বহুমূলীয়া ৰত্ন চুৰি কৰি পলায়ন কৰে । ইয়াৰে এপদ গহণা, নেপোলিয়নৰ পত্নী সম্ৰাজ্ঞী ইউজেনীৰ পান্না খচিত মুকুট সংগ্ৰহালয়ৰ বাহিৰত পোৱা যায় । অৱশ্যে এই মুকুট ভঙা অৱস্থাত উদ্ধাৰ হয় । উল্লেখ্য যে, এই সংগ্ৰহালয়ত দৈনিক ৩০ হাজাৰ পৰ্যন্ত দৰ্শনাৰ্থী আহিব পাৰে ।
এই ঘটনা ১৯ অক্টোবৰৰ পুৱা প্ৰায় ৯:৩০ বজাত সংঘটিত হয় । ঘটনাৰ সময়ত লুভৰত দৰ্শনাৰ্থীৰ ব্যাপক ভিৰ আছিল । নিৰ্মাণস্থলীৰ ওচৰৰ লিফট ব্যৱহাৰ কৰি চোৰে এখন খিৰিকী ভাঙি ডিস্ক কাটাৰেৰে গ্লাছ কাটি পোনে পোনে বহুমূলীয়া গহনা ৰখা শ্ব’কেছলৈ গৈছিল । ডিছপ্লে কেছ ভাঙি ৯টাকৈ গহনা চুৰি কৰি মটৰ চাইকেলেৰে পলায়ন কৰে চোৰে ।
ফ্ৰান্সৰ সাংস্কৃতিক মন্ত্ৰীয়ে কয় যে কৰ্তৃপক্ষই তদন্ত চলাই থকাৰ সময়তে লুভৰ সেইদিনাৰ বাবে বন্ধ কৰি ৰখা হৈছে । এক্সত তেওঁ লিখিছে, ‘আজি পুৱা লুভৰ মিউজিয়াম মুকলি কৰাৰ সময়ত এটা চুৰিকাণ্ড সংঘটিত হয় । তেওঁ কয় যে তদন্তৰ কাৰণে সংগ্ৰহালয়টো বন্ধ হৈ থাকিব । অৱশ্যে এই চুৰিকাণ্ডৰ সন্দৰ্ভত আৰু কোনো সবিশেষ প্ৰকাশ কৰা নাই তেওঁ ।
কি কি চুৰি হ’ল ?
চুৰি হোৱা নটা গহণাৰ ভিতৰত আটাইতকৈ গুৰুত্বপূৰ্ণ আছিল নেপোলিয়ন তৃতীয়ৰ পত্নী সম্ৰাজ্ঞী ইউজেনীৰ পান্নাৰে আবৃত মুকুট । তাত সোণ, হীৰা আৰু এটা খোদিত ঈগল সজোৱা আছিল । মিউজিয়ামৰ বাহিৰত এই মুকুটটো ভাঙি থকা অৱস্থাত উদ্ধাৰ হোৱাৰ বিপৰীতে বাকী ৰত্নসমূহ এতিয়াও উদ্ধাৰ হোৱা নাই ।
সংগ্ৰহালয়ত প্ৰাচীন সামগ্ৰী, ভাস্কৰ্য্য, আৰু চিত্ৰকলাৰ সংগ্ৰহ-
লুভৰ মিউজিয়ামৰ সংগ্ৰহত নেপোলিয়নৰ লুণ্ঠনৰ সামগ্ৰীও আছে, যিয়ে ক্ষতিপূৰণৰ ওপৰত বিতৰ্কক ইন্ধন যোগাই আহিছে । লুভৰত মেছ’পটেমিয়া, ইজিপ্ত আৰু ধ্ৰুপদী জগতৰ পৰা আৰম্ভ কৰি ইউৰোপীয় শিল্পীলৈকে ৩৩,০০০ৰো অধিক শিল্পকৰ্ম, ভাস্কৰ্য্য আৰু চিত্ৰকলা আছে । ইয়াৰ প্ৰধান আকৰ্ষণসমূহৰ ভিতৰত আছে মনালিছা, ভেনাছ ডি মিলো । দেওবাৰৰ চুৰিৰ অভিযোগ সংঘটিত হোৱা গেলেৰী ডি এপ’লনত ফ্ৰান্সৰ ৰাজমুকুটৰ অলংকাৰ প্ৰদৰ্শিত হয় । এই মিউজিয়ামত হামুৰাবীৰ কোড আৰু ইউৰোপীয় চিত্ৰকলাৰ মাষ্টাৰপিছো আছে ।
লগতে পঢ়ক : মূৰত মুকুট; এ আই ভিডিঅ’ প্ৰকাশ কৰি প্ৰতিবাদকাৰীক উপহাস ডনাল্ড ট্ৰাম্পৰ
