বৃহস্পতিবাৰে (৩ এপ্ৰিল) বেংককত উপস্থিত হয় প্ৰধানমন্ত্ৰী নৰেন্দ্ৰ মোদী । বেংককত থকা ভাৰতীয় প্ৰবাসীসকলে ‘মোদী-মোদী’ আৰু ‘বন্দে মাতৰম’ৰ শ্লোগানেৰে প্ৰধানমন্ত্ৰীগৰাকীক উষ্ম আদৰণি জনায় । বিমানবন্দৰত প্ৰধানমন্ত্ৰী নৰেন্দ্ৰ মোদীক আদৰণি জনায় থাইলেণ্ডৰ উপ-প্ৰধানমন্ত্ৰী সূৰিয়া জংগ্ৰুংগ্ৰেয়াংকিটৰ লগতে আন কেইবাজনো শীৰ্ষ বিষয়াই ।
ইয়াৰ মাজতে প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্মত এটা পোষ্ট শ্বেয়াৰ কৰে । এই পোষ্টটোত প্ৰধানমন্ত্ৰীয়ে লিখিছে, “থাইলেণ্ডৰ বেংককত অৱতৰণ কৰিলোঁ । আগন্তুক চৰকাৰী কাৰ্যসূচীত অংশগ্ৰহণ কৰিবলৈ, ভাৰত আৰু থাইলেণ্ডৰ মাজত সহযোগিতাৰ বান্ধোন শক্তিশালী কৰিবলৈ আগ্ৰহী ।”
উল্লেখযোগ্য যে ষষ্ঠ বিমষ্টেক সন্মিলনত অংশগ্ৰহণৰ বাবে থাইলেণ্ডৰ ৰাজধানী বেংককত উপস্থিত হৈছে প্ৰধানমন্ত্ৰী মোদী । শুকুৰবাৰে (৪ এপ্ৰিল) তেওঁ আঞ্চলিক নেতাসকলৰ সৈতে সহযোগিতাৰ গুৰুত্বপূৰ্ণ ক্ষেত্ৰসমূহৰ বিষয়ে আলোচনা কৰিব । ইয়াৰ উপৰিও প্ৰধানমন্ত্ৰী মোদীয়ে থাইলেণ্ডৰ নেতৃত্বৰ সৈতেও দ্বিপাক্ষিক আলোচনাত মিলিত হৈ ভাৰত-থাইলেণ্ডৰ সম্পৰ্ক সুদৃঢ় কৰিব ।
বেংককত ভাৰতীয় সম্প্ৰদায়ৰ লোকক সাক্ষাৎ কৰিব প্ৰধানমন্ত্ৰীয়ে-
বেংককত উপস্থিত হোৱাৰ লগে লগে প্ৰধানমন্ত্ৰীয়ে ভাৰত আৰু থাইলেণ্ডৰ মাজত গভীৰ সাংস্কৃতিক, অৰ্থনৈতিক সম্পৰ্কক আলোকপাত কৰি প্ৰবাসী ভাৰতীয়সকলৰ সৈতে মত বিনিময় কৰাৰ কথা ।
ইয়াৰ পূৰ্বে প্ৰস্থান বিবৃতিত প্ৰধানমন্ত্ৰী মোদীয়ে কয় যে প্ৰধানমন্ত্ৰী পাটংটাৰ্ণ শ্বিনাৱাট্ৰাৰ আমন্ত্ৰণত আজি মই থাইলেণ্ডলৈ আনুষ্ঠানিক ভ্ৰমণৰ বাবে আৰু ষষ্ঠ বিমষ্টেক শীৰ্ষ সন্মিলনত অংশগ্ৰহণ কৰিবলৈ যাত্ৰা কৰিছো । তেওঁ কয়, “যোৱা দশকত বিমষ্টেক বংগোপসাগৰ অঞ্চলত আঞ্চলিক উন্নয়ন, সংযোগ, অৰ্থনৈতিক প্ৰগতিৰ প্ৰসাৰৰ বাবে এক গুৰুত্বপূৰ্ণ মঞ্চ হিচাপে আত্মপ্ৰকাশ কৰিছে । ইয়াৰ ভৌগোলিক অৱস্থানৰ বাবে ভাৰতৰ উত্তৰ-পূব অঞ্চল বিমষ্টেকৰ কেন্দ্ৰবিন্দুত আছে ।”
বিমষ্টেকৰ নেতাসকলৰ সৈতে আলোচনা কৰিবলৈ আগ্ৰহ প্ৰকাশ-
বিমষ্টেকৰ নেতাসকলৰ সৈতে মত বিনিময় কৰাৰ বাবে উৎসাহ প্ৰকাশ কৰি প্ৰধানমন্ত্ৰীয়ে কয়, “বিমষ্টেক দেশসমূহৰ নেতাসকলক লগ পাই আমাৰ সহযোগিতা আৰু অধিক শক্তিশালী কৰাৰ বাবে গঠনমূলকভাৱে জড়িত হ’বলৈ মই আগ্ৰহী ।”
