কাজাখস্তানৰ আকটৌ বিমানবন্দৰৰ সমীপত দুৰ্ঘটনাত পতিত হৈছে এখন যাত্ৰাবাহী বিমান । বিমানখনত ১০৫ জন যাত্ৰী আৰু ৫ জন ক্ৰু মেম্বাৰ আছিল বুলি বাতৰিত প্ৰকাশ পাইছে । বৰ্তমানলৈকে এই দুৰ্ঘটনাত ৪২ জন লোকৰ মৃত্যু হোৱা বুলি জানিব পৰা গৈছে । যদিও আনুষ্ঠানিকভাৱে মৃত্যু হোৱা লোকৰ সংখ্যা এতিয়াও প্ৰকাশ কৰা হোৱা নাই, কিন্তু দুৰ্ঘটনাটোৰ ভিডিঅ’ চালে হতাহতৰ সংখ্যা যথেষ্ট বেছি হোৱাৰ আশংকা কৰা হৈছে ।
প্ৰাথমিক তথ্য অনুসৰি আকটৌ চহৰত অৱতৰণ কৰাৰ সময়তে বিমানখন দুৰ্ঘটনাগ্ৰস্ত হৈ অগ্নিপিণ্ডলৈ পৰিণত হয় । প্ৰাথমিক খবৰ অনুসৰি আজাৰবাইজান এয়াৰলাইন্সৰ বিমানখন আজাৰবাইজানৰ পৰা ৰাছিয়ালৈ গৈ আছিল । বিমানখনত কিছু কাৰিকৰী সমস্যাৰ সৃষ্টি হৈছিল । ইয়াৰ পিছতে বিমানখনে আকটৌ বিমানবন্দৰৰ পৰা জৰুৰী অৱতৰণৰ অনুমতি বিচাৰিছিল । অৱশ্যে এই সময়ছোৱাতে বিমানখন দুৰ্ঘটনাগ্ৰস্ত হয় ।
বিমানত থকা একাংশ লোক ৰক্ষা পৰে-
মধ্য এছিয়াৰ দেশখনৰ জৰুৰীকালীন মন্ত্ৰালয়ৰ উদ্ধৃতিৰে সংবাদ সংস্থাই কয় যে বিমানখনৰ কিছু লোক ৰক্ষা পৰে । ঘটনাস্থলীত জৰুৰীকালীন সেৱা উপস্থিত হয় । ইফালে কাজাখাস্তানৰ সংবাদ মাধ্যমে স্বাস্থ্যমন্ত্ৰীৰ উদ্ধৃতি দি কয় যে এটি শিশুকে ধৰি ১২ জন যাত্ৰীক জীৱিত অৱস্থাত উদ্ধাৰ কৰা হৈছে । আমি বিশেষজ্ঞ, ট্ৰমাট’লজিষ্ট, নিউৰ’চাৰ্জনকে ধৰি সকলো উদ্ধাৰকাৰী দলক সেই স্থানলৈ প্ৰেৰণ কৰিছো । এয়াৰ এম্বুলেন্সৰ সুবিধাও কৰা হৈছে । আমি ঠাইতে সহায় আগবঢ়াবলৈ চেষ্টা কৰিছো । সাহায্য আৰু উদ্ধাৰৰ কাম চলি আছে ।
কেনেকৈ সংঘটিত হ’ল দুৰ্ঘটনাটো ?
দাবী কৰা হৈছে যে উৰা মৰা Embraer 190 AHY8243 বিমানৰ সৈতে এটা চৰাইৰ সংঘৰ্ষ হয় । ইয়াৰ বাবেই বিমানখনৰ পাইলটে জৰুৰী অৱতৰণৰ বাবে আকটৌ বিমানবন্দৰৰ সৈতে যোগাযোগ কৰে । কিন্তু অৱতৰণ কৰাৰ পূৰ্বেই ষ্টিয়াৰিং বিকল হোৱাৰ বাবে বিমানখন দুৰ্ঘটনাগ্ৰস্ত হয় আৰু বিস্ফোৰিত হৈ অগ্নিদগ্ধ হয় । বৰ্তমান জুই নিৰ্বাপন কৰা হৈছে ।
