সোমবাৰে প্ৰধানমন্ত্ৰী নৰেন্দ্ৰ মোদীয়ে কয় যে তেওঁৰ চৰকাৰে যোৱা ডেৰ বছৰত যুৱক-যুৱতীসকলক প্ৰায় ১০ লাখ স্থায়ী চৰকাৰী চাকৰি প্ৰদান কৰিছে, যিটো তেওঁ অভিলেখ বুলি দাবী কৰে । চাকৰি মেলাত নিযুক্তিপ্ৰাপ্তসকলক নিযুক্তি পত্ৰ প্ৰদান কৰি তেওঁ কয় যে কোনো চৰকাৰৰ কাৰ্যকালত ইয়াৰ পূৰ্বে কেতিয়াও এনে “মিছন মোড”ত চাকৰি দিয়া হোৱা নাছিল ।
ভিডিঅ’ কনফাৰেন্সৰ জৰিয়তে নিযুক্তি পত্ৰ বিতৰণ-
প্ৰধানমন্ত্ৰী নৰেন্দ্ৰ মোদীয়ে সোমবাৰে দেশৰ ৪৫টা স্থানত আয়োজন কৰা নিয়োগ মেলাত ভিডিঅ’ কনফাৰেন্সিঙৰ জৰিয়তে ৭১ হাজাৰ যুৱক-যুৱতীক যোগদান পত্ৰ বিতৰণ কৰে । প্ৰধানমন্ত্ৰীয়ে কয় যে তেওঁৰ চৰকাৰৰ নীতি আৰু কাৰ্যসূচীৰ মূলতে যুৱ জনসংখ্যা আৰু নিযুক্তি প্ৰক্ৰিয়াত সততা আৰু স্বচ্ছতাক সৰ্বোচ্চ অগ্ৰাধিকাৰ দিয়া হৈছে ।
নাৰীক আত্মনিৰ্ভৰশীল কৰি তোলাৰ ওপৰত গুৰুত্ব দিয়া হৈছে-
নিয়োগ মেলাত ভাষণ দি প্ৰধানমন্ত্ৰীগৰাকীয়ে লগতে কয় যে বৃহৎ সংখ্যক নিযুক্তিপ্ৰাপ্ত মহিলা আছে আৰু তেওঁৰ চৰকাৰৰ প্ৰচেষ্টা হৈছে মহিলাসকলক প্ৰতিটো ক্ষেত্ৰতে স্বাৱলম্বী কৰি তোলা । তেওঁ কয় যে মহিলাসকলৰ বাবে ২৬ সপ্তাহৰ প্ৰসূতিকালীন ছুটীৰ নীতি তেওঁলোকৰ কেৰিয়াৰত সহায়ক বুলি প্ৰমাণিত হৈছে । লগতে তেওঁ কয় যে ‘প্ৰধানমন্ত্ৰী আৱাস যোজনা’ৰ অধীনত নিৰ্মাণ কৰা ঘৰৰ মালিকৰ অধিকাংশই মহিলা ।
ছাত্ৰ-ছাত্ৰীয়ে ১৩টা ভাৰতীয় ভাষাত নামভৰ্তি পৰীক্ষা দিব পাৰিব-
প্ৰধানমন্ত্ৰীয়ে কয় যে ভাৰতীয় যুৱক-যুৱতীসকলৰ সামৰ্থ আৰু প্ৰতিভাক অনুকূলভাৱে ব্যৱহাৰ কৰাটো তেওঁৰ চৰকাৰৰ বাবে অগ্ৰাধিকাৰ আৰু তেওঁলোক ষ্টাৰ্টআপ ইণ্ডিয়া, ডিজিটেল ইণ্ডিয়া, আৰু মহাকাশ আৰু প্ৰতিৰক্ষা খণ্ডৰ সংস্কাৰৰ দৰে কেইবাখনো আঁচনিৰ অংশ । লগতে তেওঁ কয় যে ৰাষ্ট্ৰীয় শিক্ষা নীতিয়ে যুৱক-যুৱতীসকলৰ বিকাশৰ বাবে পদক্ষেপ গ্ৰহণ কৰিছে, মাতৃভাষাৰ ব্যৱহাৰত বিশেষ গুৰুত্ব আৰোপ কৰিছে । তেওঁৰ চৰকাৰে নিশ্চিত কৰিছে যে যুৱক-যুৱতীসকলে ১৩টা ভাৰতীয় ভাষাত নিযুক্তি পৰীক্ষা দিব পাৰে যাতে ভাষা বাধা হৈ নপৰে ।
