‘ৰৈ ৰৈ বিনালে‘ৰ ট্ৰেইলাৰ
বৃহস্পতিবাৰে মুক্তি লাভ কৰিব বহু প্ৰতিক্ষীত তথা প্ৰাণৰ শিল্পী জুবিন গাৰ্গৰ হেঁপাহৰ ছবি ‘ৰৈ ৰৈ বিনালে‘ৰ ট্ৰেইলাৰ । ২৩ অক্টোবৰ, বৃহস্পতিবাৰে সন্ধিয়া ৫ বজাত মুক্তি পাব বহু প্ৰততিক্ষীত এই ছবিখনৰ ট্ৰেইলাৰ । কিছু সময় পূৰ্বে সামাজিক মাধ্যমযোগে এই কথা জানিবলৈ দিয়ে ছবিখনৰ পৰিচালক ৰাজেশ ভূঞাই ।
উল্লেখ্য যে, অসমীয়াৰ হৃদস্পদন তথা আপোন শিল্পী জুবিন গাৰ্গৰ সপোনৰ ছবি আছিল ‘ৰৈ ৰৈ বিনালে‘ । এইখনেই হিয়াৰ আমঠু শিল্পীগৰাকীৰ অন্তিমখন চলচ্চিত্ৰ । এই ছবিখন মুক্তি পোৱালৈ আগ্ৰহেৰে ৰৈ আছে অসমবাসী । উল্লেখ্য যে, ৩১ অক্টোবৰৰ দেশজুৰি ছবিগৃহত মুক্তি লাভ কৰিব প্ৰাণৰ শিল্পী জুবিন গাৰ্গৰ সপোনৰ ছবি ‘ৰৈ ৰৈ বিনালে‘ ।
১৯ ছেপ্টেম্বৰত ছিংগাপুৰত শিল্পীগৰাকীৰ দেহাৱসান ঘটাৰ পাছত ডাবিং, চিত্ৰগ্ৰহণকে ধৰি আধৰুৱা হৈ ৰৈছিল ছবিখনৰ কিছু কাম । কিন্তু শেহতীয়াকৈ এই সকলোবোৰ কাম সম্পূৰ্ণ কৰি ছবিখন ৩১ অক্টোবৰত মুক্তিৰ বাবে সাজু কৰি তোলা হৈছে । কিয়নো জুবিন গাৰ্গৰ পত্নী গৰিমা শইকীয়া গাৰ্গে পূৰ্বে জানিবলৈ দিয়া অনুসৰি শিল্পীগৰাকীয়ে তেখেতৰ সপোনৰ এই ছবিখন ৩১ অক্টোবৰতে মুক্তি দিয়াৰ বাবে ইচ্ছা প্ৰকাশ কৰিছিল । সেয়েহে প্ৰাণৰ শিল্পীগৰাকীয়ে ব্যক্ত কৰি যোৱা ইচ্ছা অনুসৰিয়েই এতিয়া ৩১ অক্টোবৰত দেশজুৰি ছবিগৃহত মুক্তি লাভ কৰিব ‘ৰৈ ৰৈ বিনালে‘ ছবিখনে । কাইলৈ এই ছবিখনৰ ট্ৰেইলাৰ মুকলি হ’ব ।
লগতে পঢ়ক : ‘সমাধি নহয়, জুবিন ক্ষেত্ৰ হ’ব সেই স্থান’: গৰিমা শইকীয়া গাৰ্গ
