তীব্ৰ গতিত জনপ্ৰিয় হৈ পৰা ব্যংগাত্মক ৰাজনৈতিক দল ‘ককৰোচ জনতা পাৰ্টী’ৰ অফিচিয়েল এক্স একাউণ্টটো ভাৰতত নিষিদ্ধ কৰা হৈছে
ভাৰতীয় ছ’চিয়েল মিডিয়াত তীব্ৰ গতিত জনপ্ৰিয় হৈ পৰা ব্যংগাত্মক ৰাজনৈতিক দল ‘ককৰোচ জনতা পাৰ্টী’ (CJP)ৰ অফিচিয়েল এক্স (পূৰ্বৰ টুইটাৰ) একাউণ্টটো ভাৰতত নিষিদ্ধ কৰা হৈছে । দলটোৰ প্ৰতিষ্ঠাপক অভিজিৎ দিপকিয়ে এই কথা দাবী কৰিছে । সাধাৰণতে কোনো কৰ্তৃত্বপ্ৰাপ্ত চৰকাৰী সংস্থা বা প্ৰতিষ্ঠানৰ আইনী অনুৰোধৰ ভিত্তিতহে এক্স কৰ্তৃপক্ষই এনে পদক্ষেপ গ্ৰহণ কৰে । অৱশ্যে এক্স একাউণ্ট বন্ধ হ’লেও দলটোৰ ইনষ্টাগ্ৰাম একাউণ্ট বৰ্তমানো সক্ৰিয় হৈ আছে ।
মুখ্য ন্যায়াধীশৰ মন্তব্য আৰু দলটোৰ উত্থান-
প্ৰাপ্ত তথ্য অনুসৰি, যোৱা ১৫ মে’ত ভাৰতৰ মুখ্য ন্যায়াধীশ জাষ্টিচ সূৰ্যকান্তে এটা গোচৰৰ শুনানিৰ সময়ত একাংশ নিবনুৱা যুৱক-যুৱতীক ‘ককৰোচ’ বা পঁইতাচোৰাৰ সৈতে তুলনা কৰি এক বিতৰ্কিত মন্তব্য কৰিছিল । যদিও পিছত তেওঁ স্পষ্টীকৰণ দি কয় যে তেওঁ কেৱল ভুৱা ডিগ্ৰীধাৰীসকলকহে সমালোচনা কৰিছিল, তথাপিও ছ’চিয়েল মিডিয়াত এই মন্তব্যক লৈ তীব্ৰ প্ৰতিক্ৰিয়াৰ সৃষ্টি হয় । ইয়াৰ প্ৰতিবাদ স্বৰূপে ছ’চিয়েল মিডিয়াত ‘ককৰোচ জনতা পাৰ্টী’ নামেৰে এক ব্যংগাত্মক একাউণ্ট খোলা হয় আৰু ই অতি কম সময়ৰ ভিতৰতে ভাইৰেল হৈ পৰে ।
বিজেপি-কংগ্ৰেছকো পিছ পেলালে ইনষ্টাগ্ৰামত-
মাত্ৰ কেইটামান দিনৰ ভিতৰতে এই ব্যংগাত্মক আন্দোলনে জনপ্ৰিয়তাৰ শীৰ্ষ স্পৰ্শ কৰিবলৈ সক্ষম হৈছে । ২১ মে’লৈকে ককৰোচ জনতা পাৰ্টীৰ ইনষ্টাগ্ৰাম পেজত ফল’ৱাৰ্ছৰ সংখ্যা ১.৩৫ কোটি অতিক্ৰম কৰিছে । মন কৰিবলগীয়া যে এই সংখ্যা ভাৰতৰ দুয়োটা প্ৰধান ৰাজনৈতিক দলতকৈ অধিক । বৰ্তমান ইনষ্টাগ্ৰামত বিজেপিৰ ৮৮ লাখতকৈ অধিক আৰু কংগ্ৰেছৰ ১.৩৩ কোটি ফল’ৱাৰ্ছ আছে । আনহাতে, নিষিদ্ধ হোৱাৰ পূৰ্বে দলটোৰ এক্স একাউণ্টত ২ লাখতকৈ অধিক ফল’ৱাৰ্ছ আছিল ।
যদিও এই আন্দোলনটো এটা ব্যংগাত্মক ৰাজনৈতিক প্ৰয়াস হিচাপে আৰম্ভ হৈছিল, তথাপিও ইয়াৰ জৰিয়তে ভাৰতীয় ৰাজনৈতিক আৰু সামাজিক ব্যৱস্থাৰ বিভিন্ন ব্যৰ্থতা তথা নিবনুৱা সমস্যাৰ দৰে গুৰুত্বপূৰ্ণ বিষয়সমূহক লক্ষ্য কৰি লোৱা দেখা গৈছে ।
লগতে পঢ়ক : ‘বকৰিদত কোৰবাণী হ’বই’; বংগৰ বিজেপি চৰকাৰক মুকলি প্ৰত্যাহ্বান হুমায়ুন কবীৰৰ
