সাধাৰণ জনতাৰ পৰা আৰম্ভ কৰি বলীউডৰ তাৰকা আৰু ডাঙৰ ডাঙৰ ছচিয়েল মিডিয়া ইনফ্লুৱেন্সাৰসকল এতিয়া এই পেজটোৰ প্ৰেমত পৰিছে
বৰ্তমান ছচিয়েল মিডিয়া প্লেটফৰ্ম ইনষ্টাগ্ৰামত এটা নামেই সৰ্বত্ৰে তোলপাৰ লগাইছে- সেইয়া হৈছে ‘ককৰোচ জনতা পাৰ্টী‘ (Cockroach Janta Party) । ই কোনো প্ৰকৃত ৰাজনৈতিক দল নহয়, বৰঞ্চ এটা কাল্পনিক পেৰডী পেজহে । কিন্তু ইয়াৰ তীক্ষ্ণ ৰাজনৈতিক কটাক্ষ, ব্যতিক্ৰমী নিৰ্বাচনী পোষ্টাৰ আৰু ‘ডাৰ্ক হিউমাৰ’ সম্বলিত পোষ্টসমূহে ইমান কম সময়ৰ ভিতৰত ইণ্টাৰনেটত খলকনি তুলিছে যে বৰ্তমানলৈকে ইয়াৰ ফল’ৱাৰ্ছৰ সংখ্যাই প্ৰায় ১৫ মিলিয়ন অৰ্থাৎ ১.৫ কোটিৰ ঘৰ স্পৰ্শ কৰিছে ।
সাধাৰণ জনতাৰ পৰা আৰম্ভ কৰি বলীউডৰ তাৰকা আৰু ডাঙৰ ডাঙৰ ছচিয়েল মিডিয়া ইনফ্লুৱেন্সাৰসকল এতিয়া এই পেজটোৰ প্ৰেমত পৰিছে ।
ক’ৰ পৰা হ’ল এই ‘ককৰোচ’ ট্ৰেণ্ডৰ আৰম্ভণি ?
এই সমগ্ৰ বিতৰ্ক তথা নতুন ট্ৰেণ্ডটোৰ সৃষ্টি হৈছিল দেশৰ এখন আদালতৰ শুনানিক কেন্দ্ৰ কৰি । এক গোচৰৰ শুনানিৰ সময়ত ভাৰতৰ মুখ্য ন্যায়াধীশ (CJI) সূৰ্যকান্ত-এ একাংশ বিপথগামী যুৱক-যুৱতীক উদ্দেশ্যি এক কঠোৰ মন্তব্য কৰিছিল । তেওঁ কৈছিল :
“ইতিমধ্যে কিছুমান এনে লোক আছে যিয়ে ব্যৱস্থাটোৰ ওপৰত আক্ৰমণ চলায় আৰু আপুনিও তেওঁলোকৰ লগতে চামিল হ’ব বিচাৰিছে । কিছুমান যুৱক-যুৱতী ককৰোচৰ (পঁইতাচোৰা) দৰে হয়, যিয়ে কোনো সংস্থাপন বিচাৰি নাপায়… তেওঁলোকৰ একাংশ সংবাদ মাধ্যমলৈ গুচি যায়, একাংশ ছচিয়েল মিডিয়ালৈ, একাংশ আৰ.টি.আই. (RTI) এক্টিভিষ্ট হৈ পৰে আৰু তাৰ পিছত তেওঁলোকে সকলোকে আক্ৰমণ কৰিবলৈ আৰম্ভ কৰে ।”
মুখ্য ন্যায়াধীশৰ মুখত যুৱ প্ৰজন্মৰ বাবে ‘ককৰোচ’ শব্দটোৰ প্ৰয়োগ শুনি ছচিয়েল মিডিয়াত ক্ষোভৰ জুই জ্বলি উঠে । যদিও পৰৱৰ্তী সময়ত জষ্টিচ সূৰ্যকান্ত-এ স্পষ্টীকৰণ দি কয় যে তেওঁৰ এই মন্তব্য দেশৰ মেধাৱী বা সাধাৰণ যুৱক-যুৱতীসকলৰ বাবে নাছিল, বৰঞ্চ ভুৱা ডিগ্ৰীধাৰী একাংশ লোকৰ বাবেহে আছিল— কিন্তু তেতিয়ালৈকে বহুত পলম হৈ গৈছিল । যুৱ প্ৰজন্মই এই ক্ষোভ আৰু ব্যংগক একত্ৰিত কৰি ইনষ্টাগ্ৰামত জন্ম দিলে ‘ককৰোচ জনতা পাৰ্টী’।
অনুৰাগ কাশ্যপৰ এণ্ট্ৰি আৰু বলীউডৰ সোঁত-
এই পেজটোৱে আটাইতকৈ ডাঙৰ জাঁপটো মাৰে যেতিয়া বলীউডৰ বিখ্যাত তথা স্পষ্টবাদী চলচ্চিত্ৰ নিৰ্মাতা অনুৰাগ কাশ্যপে ইয়াক ফল’ কৰিবলৈ আৰম্ভ কৰে । অনুৰাগ কাশ্যপ জড়িত হোৱাৰ লগে লগে মনোঞ্জন জগতত এক প্ৰকাৰৰ জোকাৰণি সৃষ্টি হয় ।
বৰ্তমান এই পেজটো অনুসৰণ কৰা তাৰকাসকলৰ তালিকাখনত স্থান পাইছে :
বলীউড অভিনেত্ৰী: ফাতিমা চানা শ্বেখ, সোনাক্ষী সিনহা আৰু দিয়া মিৰ্জা ।
অভিনেতা আৰু নৃত্যশিল্পী: ৰাঘৱ জুয়াল আৰু অভিষেক নিগম ।
ইনফ্লুৱেন্সাৰ আৰু টিভি তাৰকা: বিগ বছ ফেৰ্ম নগমা মিৰাজকাৰ, ফলক নাজ, অপূৰ্ব মখীজা, শীজান খান আৰু নিজৰ অৰ্ধ-অদ্ভুত ফেশ্বন চেন্সৰ বাবে সদায় চৰ্চাত থকা উৰ্ফী জাভেদ ।
বৰ্তমানৰ স্থিতি-
ডিজিটেল বিশেষজ্ঞসকলৰ মতে, ই কেৱল এটা পেজ হৈ থকা নাই, বৰঞ্চ যুৱ প্ৰজন্মৰ প্ৰতিবাদ আৰু ব্যংগাত্মক অভিব্যক্তিৰ এক নতুন মাধ্যম হৈ পৰিছে । তাৰকাসকলৰ এই ব্যাপক সমৰ্থনে স্পষ্ট কৰি দিছে যে ‘ককৰোচ জনতা পাৰ্টী’ৰ এই ভাইৰেল ধুমুহা ইমান সহজে থমকি ৰোৱাৰ কোনো সম্ভাৱনা নাই ।
লগতে পঢ়ক : “৬০ বছৰীয়া, কিন্তু যুঁজিব পাহৰা নাই,জ্বলাই ছাই কৰি দিম”; কিয় খঙত অগ্নিশৰ্মা হ’ল ছলমান খান
