ণ্ডিয়ান প্ৰিমিয়াৰ লীগৰ বহু প্ৰত্যাশিত মেগা ফাইনেলত আজি মুখামুখি হ’ব ৰয়েল চেলেঞ্জাৰ্ছ বেংগালুৰু আৰু গুজৰাট টাইটানছ

ক্ৰিকেট প্ৰেমীৰ বাবে আজি আটাইতকৈ ডাঙৰ দিন । ইণ্ডিয়ান প্ৰিমিয়াৰ লীগ (IPL 2026)ৰ বহু প্ৰত্যাশিত মেগা ফাইনেলত আজি মুখামুখি হ’ব ৰয়েল চেলেঞ্জাৰ্ছ বেংগালুৰু (RCB) আৰু গুজৰাট টাইটানছ (GT) । আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’বলগীয়া এই হাই-ভল্টেজ মেচখনক লৈ এতিয়া উত্তেজনাই চৰম সীমা স্পৰ্শ কৰিছে । দুয়োটা দলেই আজি নিজৰ দ্বিতীয়টো খিতাপ দখলৰ লক্ষ্যৰে খেলপথাৰত নামিব, য’ত স্বাভাৱিকতে যিকোনো এটা দলৰ খিতাপ অৰ্জনৰ সপোন ভংগ হ’ব ।

ট্ৰফীৰ যুঁজ : গীল বনাম পাটিদাৰ-

গুজৰাট টাইটানছৰ অধিনায়ক শুভমন গীলে আজি অধিনায়ক হিচাপে নিজৰ প্ৰথমটো আই পি এল ট্ৰফী জয় কৰিবলৈ মৰণপণ যুঁজ দিব । উল্লেখ্য যে, ইয়াৰ পূৰ্বে ২০২২ চনত হাৰ্দিক পাণ্ডিয়াৰ অধিনায়কত্বত GT-য়ে প্ৰথমবাৰৰ বাবে খিতাপ অৰ্জন কৰিছিল । আনহাতে, ৰজত পাটিদাৰৰ সফল নেতৃত্বত RCB-য়ে যোৱা বছৰ (২০২৫) নিজৰ ইতিহাসৰ প্ৰথমটো আই পি এল ট্ৰফী জিকিবলৈ সক্ষম হৈছিল । ডিফেণ্ডিং চেম্পিয়ন বেংগালুৰুৱে একেৰাহে দ্বিতীয়বাৰৰ বাবে ফাইনেলত প্ৰৱেশ কৰি খিতাপ ধৰি ৰখাৰ বাবে সম্পূৰ্ণ প্ৰস্তুত হৈ উঠিছে ।

দলীয় কম্বিনেশ্যন আৰু সম্ভাৱ্য মূল একাদশ-

RCB শিবিৰত তাৰকা বেটছমেন ফিল ছল্টৰ খেলাক লৈ কিছু সংশয় থকা বুলি খবৰ ওলাইছে যদিও দলটোৱে নিজৰ ‘ৱিনিং কম্বিনেশ্যন’ত বিশেষ সালসলনি কৰাৰ সম্ভাৱনা কম । বিৰাট কোহলীৰ সৈতে এই মেচত ভেংকটেশ আয়াৰে ইনিংছ মুকলি কৰাটো প্ৰায় নিশ্চিত, যিয়ে বিগত মেচসমূহত দলক এক আক্ৰমণাত্মক আৰু বিস্ফোৰক আৰম্ভণি উপহাৰ দিছে । ইফালে, গুজৰাট টাইটান্সৰো ‘প্লেয়িং ১১’ প্ৰায় অপৰিৱৰ্তিত থকাৰে সম্ভাৱনা অধিক ।

কাৰ জোলোঙাত পৰিব কিমান কোটি ? জানক পুৰস্কাৰৰ ধন-

২০০৮ চনৰ প্ৰথমটো সংস্কৰণৰ তুলনাত বৰ্তমান IPL ৰ পুৰস্কাৰৰ ধন কেইবাগুণো বৃদ্ধি পাইছে । প্ৰথম ছিজনত চেম্পিয়ন ৰাজস্থান ৰয়েলছে ৪.৮ কোটি টকা লাভ কৰিছিল, কিন্তু আজিৰ তাৰিখত এই ধনৰ পৰিমাণ ৫ গুণতকৈও অধিক হৈছে ।

বিজয়ী দল: আজিৰ মেচত খিতাপ অৰ্জন কৰা চেম্পিয়ন দলটোৱে লাভ কৰিব নগদ ২০ কোটি টকা ।

ৰানাৰ্ছ-আপ : ফাইনেলত পৰাজিত হোৱা দলটোও উদং হাতেৰে ঘৰলৈ উভতিব নালাগে । ৰানাৰ্ছ-আপ দলে লাভ কৰিব ১৩ কোটি টকা ।

ৰাজস্থান ৰয়েলছ : কোৱালিফায়াৰ-২ লৈকে যাত্ৰা কৰা এই দলটোৱে পাব ৭ কোটি টকা ।

ছানৰাইজাৰ্ছ হায়দৰাবাদ : এলিমিনেটৰ মেচত পৰাজিত হৈ বিদায় লোৱা হায়দৰাবাদে পাব ৬.৫ কোটি টকা ।

উল্লেখ্য যে, আজি নিশা ৭.৩০ বজাৰ পৰা অনুষ্ঠিত হ’ব আই পি এল ২০২৬ৰ বহু প্ৰত্যাশিত ফাইনেল মেচখন । নিশা ৭ বজাত মেচৰ টছ অনুষ্ঠিত হ’ব ।

লগতে পঢ়ক : আই পি এল ফাইনেলত গীল-পাটিদাৰৰ অগ্নিপৰীক্ষা : ভাৰতীয় টি-২০ দলত স্থান পোৱাৰ সোণালী সুযোগ!

এইখন খেল কেৱল আইপিএলৰ খিতাপ জয়ৰ বাবে হোৱা যুঁজ নহয়, বৰঞ্চ ভাৰতীয় টি-২০ দলৰ ভৱিষ্যতৰ নিৰ্বাচনৰ ক্ষেত্ৰতো ই এক গুৰুত্বপূৰ্ণ ভূমিকা ল’ব পাৰে

দেওবাৰে আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব চলিত বৰ্ষৰ ইণ্ডিয়ান প্ৰিমিয়াৰ লীগৰ চূড়ান্ত মেচ । সন্ধিয়া ৭:৩০ বজাৰ পৰা আৰম্ভ হ’বলগীয়া এই হাই-ভল্টেজ মেচখনত মুখামুখি হ’ব গুজৰাট টাইটানছ আৰু ৰয়েল চেলেঞ্জাৰ্ছ বেংগালুৰু ।

এইখন খেল কেৱল আইপিএলৰ খিতাপ জয়ৰ বাবে হোৱা যুঁজ নহয়, বৰঞ্চ ভাৰতীয় টি-২০ দলৰ ভৱিষ্যতৰ নিৰ্বাচনৰ ক্ষেত্ৰতো ই এক গুৰুত্বপূৰ্ণ ভূমিকা ল’ব পাৰে । দুয়োটা দলৰ অধিনায়ক ক্ৰমে শুভমন গীল আৰু ৰজত পাটিদাৰৰ এই চিজনৰ অবিশ্বাস্য প্ৰদৰ্শনে এতিয়া নিৰ্বাচকসকলক এক কঠিন প্ৰত্যাহ্বানৰ সন্মুখীন কৰাইছে ।

প্ৰদৰ্শনৰ তুংগত গীল আৰু পাটিদাৰ-

চলতি চিজনত ৰজত পাটিদাৰ আৰচিবিৰ বেটিং লাইনআপৰ মূল চালিকা শক্তি হৈ পৰিছে । তেওঁ ৪৮৬ ৰান সংগ্ৰহ কৰাৰ লগতে প্ৰায় ২০০ ষ্ট্ৰাইক ৰেটত বেটিং কৰিছে । কোৱালিফায়াৰ-১ত গুজৰাট টাইটানছৰ বিৰুদ্ধে মাত্ৰ ৩৩ বলত তেওঁৰ ৯৩ ৰানৰ বিধ্বংসী ইনিংছে ক্ৰিকেট মহলত খলকনি তুলিছিল ।

আনহাতে, বিশ্বকাপৰ দলৰ পৰা বাদ পৰাৰ পাছত শুভমন গীলে শক্তিশালী প্ৰত্যাৱৰ্তন কৰিছে । ৭২২ ৰান সংগ্ৰহ কৰি তেওঁ নিজৰ কেৰিয়াৰৰ শ্ৰেষ্ঠ ফৰ্মত থকাৰ ইংগিত দিছে । ৰাজস্থান ৰয়েলছৰ বিৰুদ্ধে তেওঁৰ শতৰণ আছিল এই চিজনৰ অন্যতম আকৰ্ষণ ।

নিৰ্বাচন সন্দৰ্ভত খেলুৱৈৰ প্ৰতিক্ৰিয়া-

ফাইনেলৰ পূৰ্বে অনুষ্ঠিত প্ৰেছ কনফাৰেন্সত দুয়োজন অধিনায়কে অতি পৰিপক্কতাৰ পৰিচয় দিছে । ৰজত পাটিদাৰে কয়, “মই বৰ্তমান কোনো নিৰ্বাচনৰ কথা ভবা নাই, মোৰ সম্পূৰ্ণ মনোযোগ কেৱল ফাইনেল মেচখনৰ ওপৰত ।” ঠিক তেনেদৰে শুভমন গিলে মন্তব্য কৰে যে তেওঁ কেৱল এজন উন্নত খেলুৱৈ হৈ উঠাৰ লক্ষ্যত কাম কৰি আছে ।

ইতিহাসৰ দুৱাৰদলিত ৰজত পাটিদাৰ-

যদি আৰচিবিয়ে এইবাৰ খিতাপ জয় কৰিবলৈ সক্ষম হয়, তেন্তে মহেন্দ্ৰ সিং ধোনী আৰু ৰোহিত শৰ্মাৰ পাছত একেৰাহে দুবাৰ আইপিএল জয় কৰা তৃতীয়জন অধিনায়ক হ’ব ৰজত পাটিদাৰ । এই জয় তেওঁৰ কেৰিয়াৰৰ বাবে এক মাইলৰ খুঁটি হ’ব পাৰে ।

নিৰ্বাচকৰ বাবে এক নতুন প্ৰত্যাহ্বান-

২৬ জুনৰ পৰা ১১ জুলাইলৈ অনুষ্ঠিত হ’বলগীয়া আয়াৰলেণ্ড আৰু ইংলেণ্ডৰ বিৰুদ্ধে টি-২০ ছিৰিজৰ বাবে ভাৰতীয় দল ঘোষণা কৰিবলৈ সাজু হৈছে নিৰ্বাচকসকল । এনে পৰিস্থিতিত ফাইনেল মেচখনত কোনো এজন খেলুৱৈৰ এটা ডাঙৰ ইনিংছে নিশ্চিতভাৱে ভাৰতীয় দলত তেওঁলোকৰ স্থান প্ৰায় খাটাং কৰি তুলিব ।

ইতিমধ্যে সমগ্ৰ দেশৰ ক্ৰিকেট অনুৰাগীৰ দৃষ্টি এতিয়া আহমেদাবাদৰ নৰেন্দ্ৰ মোদী ষ্টেডিয়ামলৈ । কোনে পিন্ধিব ২০২৬ চনৰ আইপিএলৰ বিজয় মুকুট, সেয়াই এতিয়া চৰ্চাৰ মূল বিষয় ।

লগতে পঢ়ক : আজি আই পি এল ২০২৬ৰ ফাইনেলৰ মহাৰণঃ খিতাপৰ বাবে ‘কিং’ কোহলী বনাম ‘প্ৰিন্স’ গীলৰ যুঁজ

আজি আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব ইণ্ডিয়ান প্ৰিমিয়াৰ লীগ ২০২৬ ৰ সেই বহুল প্ৰত্যাশিত মেগা ফাইনেল

ক্ৰিকেট প্ৰেমীৰ উৎকণ্ঠাৰ অন্ত পেলাই আজি আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব ইণ্ডিয়ান প্ৰিমিয়াৰ লীগ (IPL) ২০২৬ ৰ সেই বহুল প্ৰত্যাশিত মেগা ফাইনেল । ট্ৰফী জয়ৰ অন্তিম যুঁজত আজি মুখামুখি হ’ব এই ছিজনৰ আটাইতকৈ শক্তিশালী দুটা দল- ৰয়েল চেলেঞ্জাৰ্ছ বেংগালুৰু (RCB) আৰু গুজৰাট টাইটানছ (GT) । সমগ্ৰ ছিজনত ধামাকাদাৰ প্ৰদৰ্শন কৰা দুয়োটা দলেই এতিয়া খিতাপ জয়ৰ পৰা মাত্ৰ এখোজ দূৰত থিয় হৈছে ।

ফাইনেলৰ পথ আৰু ইতিহাস-

কোৱালিফায়াৰ-১ ত গুজৰাট টাইটানছক পৰাস্ত কৰি ৰয়েল চেলেঞ্জাৰ্ছ বেংগালুৰুৱে পোনপটীয়াকৈ ফাইনেলত স্থান সুৰক্ষিত কৰিছিল । সেই মেচখনত আৰচিবিৰ অধিনায়ক ৰজত পাটিদাৰে মাত্ৰ ৩৩ টা বলত ৯৩ ৰানৰ এক বিধ্বংসী ইনিংছ খেলিছিল । আনহাতে, গুজৰাট টাইটানছে কোৱালিফায়াৰ-২ ত ৰাজস্থান ৰয়েলছক ধূলিসাৎ কৰি ফাইনেলৰ টিকট কাটিবলৈ সক্ষম হয় । ৰাজস্থানৰ বিৰুদ্ধে খেলা সেই গুৰুত্বপূৰ্ণ মেচখনত গুজৰাটৰ অধিনায়ক শুভমন গীলে ১৫ টা চাৰি আৰু ৩ টা ছয়েৰে এক দৰ্শনীয় শতক অৰ্জন কৰিছিল ।

মন কৰিবলগীয়া যে, আৰচিবিয়ে এতিয়ালৈকে পঞ্চমবাৰৰ বাবে আইপিএলৰ ফাইনেলত প্ৰৱেশ কৰিছে । ৰজত পাটিদাৰৰ অধিনায়কত্বতে দলটোৱে যোৱা ২০২৫ চনত নিজৰ প্ৰথমটো আইপিএল খিতাপ অৰ্জন কৰিছিল । আনহাতে, গুজৰাট টাইটানছে আই পি এল ইতিহাসত তৃতীয়বাৰৰ বাবে ফাইনেল খেলিব । ইয়াৰ পূৰ্বে ২০২২ চনত নিজৰ প্ৰথমটো আত্মপ্ৰকাশৰ ছিজনতে গুজৰাটে ট্ৰফী লাভ কৰি চমক সৃষ্টি কৰিছিল ।

ঘৰুৱা খেলপথাৰৰ সুবিধা আৰু পৰিসংখ্যা-

আহমেদাবাদৰ নৰেন্দ্ৰ মোদী ষ্টেডিয়ামত গুজৰাট টাইটানছৰ ৰেকৰ্ড অতি সুন্দৰ । এই ছিজনত গুজৰাটে নিজৰ ঘৰুৱা খেলপথাৰত খেলা ৭ খন মেচৰ ভিতৰত ৫ খনতে জয়লাভ কৰিছে । গতিকে ঘৰুৱা দৰ্শকৰ সমৰ্থনেৰে গুজৰাটে আৰচিবিক তীব্ৰ প্ৰত্যাহ্বান জনাব । অৱশ্যে, এই ছিজনত যেতিয়াই এই দুয়োটা দল মুখামুখি হৈছিল, দুয়োবাৰেই আৰচিবিয়ে বাজি মাৰিছিল ।

দুয়োটা দলৰ শক্তি আৰু খেলুৱৈৰ ফৰ্ম-

গুজৰাট টাইটানছৰ দুয়োগৰাকী অপেনিং বেটছমেন বৰ্তমান সুন্দৰ ফৰ্মত আছে । অধিনায়ক শুভমন গীলে এই আইপিএল ছিজনৰ ১৫ খন মেচত ১৬৩.৭১ ষ্ট্ৰাইক ৰেটেৰে ৭২২ ৰান সংগ্ৰহ কৰিছে । আনহাতে, চাই সুদৰ্শনে ১৬ খন মেচত ১৫৯.৫৫ ষ্ট্ৰাইক ৰেটেৰে ৭১০ ৰান সংগ্ৰহ কৰি তেওঁক যোগ্য সংগ দিছে । গুজৰাটৰ বলিং বিভাগৰ কথা ক’বলৈ গ’লে কগিছো ৰাবাডাই ১৬ খন মেচত ২৮ টা উইকেট লৈ পাৰ্পল কেপৰ দৌৰত আটাইতকৈ আগত আছে ।

আনহাতে, আৰচিবিৰ ৰান মেচিন বিৰাট কোহলীৰ বাবেও এই আইপিএল ছিজনটো অতি ধামাকাদাৰ আছিল । তেওঁ ১৫ খন মেচত ১৬৪.৩৮ ষ্ট্ৰাইক ৰেটেৰে ৬০০ ৰান সংগ্ৰহ কৰিছে, য’ত এটা শতকো অন্তৰ্ভুক্ত আছে । অনুৰাগীসকলে পুনৰ এবাৰ কিং কোহলীৰ বেটৰ যাদু চাবলৈ আৰু তেওঁক আইপিএল ট্ৰফী হাতত তুলি লোৱা দেখিবলৈ অধীৰ আগ্ৰহেৰে বাট চাই আছে । আৰচিবিৰ বলিং বিভাগত ভুৱনেশ্বৰ কুমাৰে এই ছিজনত উৎকৃষ্ট প্ৰদৰ্শন আগবঢ়াই ১৫ খন মেচত ২৬ টা উইকেট দখল কৰি থৈছে ।

লগতে পঢ়ক : ২০০৮ৰ পৰা ২০২৫ চনলৈঃ কোন বৰ্ষত কোনটো দলে জিনিছিল আই পি এল খিতাপ ?

RCBৰ বেটিং তাৰকা বিৰাট কোহলীয়ে ইণ্ডিয়ান প্ৰিমিয়াৰ লীগৰ ইতিহাসত এক অভূতপূৰ্ব অভিলেখ গঢ়িবলৈ সক্ষম হৈছে

ৰয়েল চেলেঞ্জাৰ্ছ বেংগালুৰু (RCB)ৰ বেটিং তাৰকা বিৰাট কোহলীয়ে ইণ্ডিয়ান প্ৰিমিয়াৰ লীগ (IPL)ৰ ইতিহাসত এক অভূতপূৰ্ব অভিলেখ গঢ়িবলৈ সক্ষম হৈছে । মঙলবাৰে গুজৰাট টাইটানছ (GT)ৰ বিৰুদ্ধে খেলা প্ৰথম কোৱালিফায়াৰ মেচখনত তেওঁ আই পি এলৰ ইতিহাসত ধাৰাবাহিকভাৱে চাৰিটা ছিজনত ৬০০ বা তাতকৈ অধিক ৰাণ সংগ্ৰহ কৰা প্ৰথমগৰাকী বেটাৰ হিচাপে পৰিগণিত হয় । এই গুৰুত্বপূৰ্ণ মেচখনত কোহলীয়ে ১৭২.০০ ষ্ট্ৰাইক ৰেটেৰে মাত্ৰ ২৫ টা বলত ৪৩ ৰাণৰ এক ক্ষিপ্ৰ ইনিংছ খেলে, য’ত আছিল পাঁচটা চাৰি আৰু এটা দৃষ্টিনন্দন ছয় ।

এই ঐতিহাসিক ছিজনত কোহলীয়ে বৰ্তমানলৈকে ১৫ টা ইনিংছ খেলি ৫০.০০ গড় আৰু ১৬৪.৩৮ ষ্ট্ৰাইক ৰেটেৰে মুঠ ৬০০ ৰাণ সম্পূৰ্ণ কৰিছে । উল্লেখ্য যে, এই ষ্ট্ৰাইক ৰেটটো আই পি এলৰ এটা ছিজনত তেওঁৰ কেৰিয়াৰৰ সৰ্বশ্ৰেষ্ঠ । চলিত ছিজনত তেওঁ এটা শতক আৰু চাৰিটা অৰ্ধশতক অৰ্জন কৰিছে আৰু তেওঁৰ সৰ্বোচ্চ স্ক’ৰ হৈছে অপৰাজিত ১০৫ ৰাণ ।

ফৰ্মহীনতা নেওচি ক্ৰমাগত উন্নতিৰ যাত্ৰা-

২০২২ চনৰ আই পি এল ছিজনত বিৰাট কোহলী এক ভয়াৱহ ফৰ্মহীনতাৰ মাজেৰে গতি কৰিছিল । সেই সময়ত তেওঁ ১৬ খন মেচত মাত্ৰ ২২.৭৩ গড়ত মাত্ৰ ৩৪১ ৰাণহে কৰিবলৈ সক্ষম হৈছিল । কিন্তু তাৰ পিছৰে পৰা আই পি এলত তেওঁ যিধৰণে প্ৰত্যাৱৰ্তন কৰিলে আৰু এগৰাকী আধুনিক টি-২০ ক্ৰিকেটাৰ হিচাপে নিজক নতুনকৈ গঢ়ি তুলিলে, সেয়া সঁচাকৈয়ে অসাধাৰণ । বিশেষকৈ ২০২৪ চনৰ টি-২০ বিশ্বকাপ জয়ৰ পিছত আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰ লোৱা আৰু ক্ৰমান্বয়ে বাঢ়ি অহা বয়সকো নেওচি তেওঁ প্ৰতিটো ছিজনতে নিজৰ খেলৰ মান উন্নত কৰি গৈছে ।

২০২৩ চনৰ ছিজনটো আছিল কোহলীৰ প্ৰত্যাৱৰ্তনৰ বছৰ । সেইবাৰ তেওঁ ১৪ টা ইনিংছত ৫৩.২৫ গড় আৰু ১৩৯.৮২ ষ্ট্ৰাইক ৰেটেৰে ৬৩৯ ৰাণ সংগ্ৰহ কৰি টুৰ্নামেণ্টৰ চতুৰ্থ সৰ্বাধিক ৰাণ সংগ্ৰহকাৰী হিচাপে পৰিগণিত হৈছিল, য’ত আছিল দুটা শতক আৰু ছটা অৰ্ধশতক । ইয়াৰ পিছৰ অৰ্থাৎ ২০২৪ চনৰ ছিজনত তেওঁ স্পিন বলাৰসকলৰ বিৰুদ্ধে নিজৰ কৌশলৰ ব্যাপক উন্নতি ঘটায় আৰু ছিক্সাৰ কোবোৱাৰ এক আক্ৰমণাত্মক ৰূপ ধাৰণ কৰে । সেই ছিজনত তেওঁ ১৫ টা ইনিংছত ৬১.৭৫ গড় আৰু ১৫৪.৬৯ ষ্ট্ৰাইক ৰেটেৰে সৰ্বাধিক ৭৪১ ৰাণ কৰি অৰেঞ্জ কেপ অৰ্জন কৰে । সেই সংস্কৰণত তেওঁ মুঠ ৩৮ টা ছয় কোবাইছিল, যিটো ২০১৬ চনৰ তেওঁৰ কেৰিয়াৰৰ সৰ্বশ্ৰেষ্ঠ অভিলেখৰ সৈতে সমান আছিল ।

একেদৰে, যোৱা ছিজনতো আৰ চি বিয়ে খিতাপ অৰ্জন কৰাৰ ক্ষেত্ৰত কোহলীয়ে মূল চালিকা শক্তি হিচাপে কাম কৰিছিল । ভিন্ন পৰিস্থিতিত নিজৰ উৎকৃষ্ট অভিযোজন ক্ষমতা আৰু বেটিং গতিৰ জৰিয়তে তেওঁ সন্মুখৰ পৰা দলক নেতৃত্ব দিছিল । সেইবাৰ তেওঁ ১৫ টা ইনিংছত ৫৪.৭৫ গড় আৰু ১৪৪.৭১ ষ্ট্ৰাইক ৰেটেৰে ৮ টা অৰ্ধশতকসহ ৬৫৭ ৰাণ সংগ্ৰহ কৰি টুৰ্নামেণ্টৰ তৃতীয় সৰ্বাধিক ৰাণ সংগ্ৰহকাৰী হিচাপে নিজৰ স্থিতি বজাই ৰাখিছিল ।

ফাইনেলৰ দৌৰত কোন ?

মঙলবাৰৰ এই গুৰুত্বপূৰ্ণ মেচখনত গুজৰাট টাইটানছে টছত জিকি প্ৰথমে ফিল্ডিং কৰাৰ সিদ্ধান্ত লয় । নিয়ম অনুসৰি, এই প্ৰথম কোৱালিফায়াৰ মেচখনত যিটো দলেই জয়লাভ কৰিব, সেই দলে পোনপটীয়াকৈ মেগা ফাইনেলত নিজৰ স্থান সুৰক্ষিত কৰিব । আনহাতে, পৰাজিত দলটোৱে ফাইনেলত প্ৰৱেশৰ বাবে আৰু এটা সুযোগ পাব । তেওঁলোকে কোৱালিফায়াৰ-২ ত ছানৰাইজৰ্ছ হায়দৰাবাদ (SRH) আৰু ৰাজস্থান ৰয়েলছ (RR)ৰ মাজত হ’বলগীয়া এলিমিনেটৰ মেচৰ বিজয়ী দলটোৰ মুখামুখি হ’ব লাগিব ।

লগতে পঢ়ক : পদ্মশ্ৰী সন্মান ল’বলৈ ৰাষ্ট্ৰপতি ভৱনলৈ কিয় নগ’ল ‘হিটমেন’? পোহৰলৈ আহিল আচল কাৰণ!

বেংগালুৰুৰ এম চিন্নাস্বামী ষ্টেডিয়ামত অনুষ্ঠিত এই ৰোমাঞ্চকৰ খেলখনত দিল্লীয়ে ৬ উইকেটত জয়লাভ কৰে

ইণ্ডিয়ান প্ৰিমিয়াৰ লীগ ২০২৬ৰ শনিবাৰে অনুষ্ঠিত এখন মেচত বিৰুদ্ধে দিল্লী কেপিটেলছৰ হাতত ধৰাশায়ী হয় ৰয়েল চেলেঞ্জাৰ্ছ বেংগালুৰু । বেংগালুৰুৰ এম চিন্নাস্বামী ষ্টেডিয়ামত অনুষ্ঠিত এই ৰোমাঞ্চকৰ খেলখনত দিল্লীয়ে ৬ উইকেটত জয়লাভ কৰে । আৰ চি বিয়ে দিল্লী কেপিটেলছক ১৭৬ ৰানৰ লক্ষ্য নিৰ্ধাৰণ কৰি দিছিল । দিল্লীয়ে অন্তিম অভাৰত এই লক্ষ্যত উপনীত হয় ।

দিল্লীৰ ইনিংছ-

দিল্লী কেপিটেলছৰ আৰম্ভণি ভাল নাছিল । পাৱাৰপ্লেত পাথুম নিছাংকা (১ ৰান), কৰুণ নায়াৰ (৫ ৰান), সমীৰ ৰিজভি (২ ৰান)ৰ উইকেটৰ পতন ঘটে । ভুৱনেশ্বৰ কুমাৰে তিনিওজন বেটছমেনক আউট কৰে । ইয়াৰ পিছত ট্ৰিষ্টান ষ্টাবছ আৰু কে এল ৰাহুলে চতুৰ্থ উইকেটৰ বাবে ৬৯ ৰানৰ অংশীদাৰিত্ব গঢ়ে । ৰাহুলে ৩৪টা বলত ৫৭ ৰান সংগ্ৰহ কৰে, য’ত ৬টা চাৰি আৰু দুটা ছয় আছিল । ৰাহুলৰ উইকেট দখল কৰে ক্ৰুনাল পাণ্ডিয়াই । কিন্তু তাৰ পিছত ট্ৰিষ্টান ষ্টাবছ আৰু ডেভিদ মিলাৰে এক উল্লেখযোগ্য অংশীদাৰিত্ব গঢ়ি তোলে । দুয়োজনে বিস্ফোৰক বেটিং কৰি দলটোক জয়ৰ দিশে আগুৱাই লৈ যায় । ষ্টাবছে ৪৭টা বলত অপৰাজিত ৬০ ৰান কৰাৰ বিপৰীতে মিলাৰে ১০টা বলত অপৰাজিত ২২ ৰান সংগ্ৰহ কৰে ।

ৰয়েল চেলেঞ্জাৰ্ছ বাংগালুৰুৰ ইনিংছ-

টছ হেৰুৱাই প্ৰথমে বেটিং কৰাৰ পিছত ৰয়েল চেলেঞ্জাৰছ বাংগালুৰুৱে ৮ উইকেটত ১৭৫ ৰান সংগ্ৰহ কৰে । ৰয়েল চেলেঞ্জাৰ্ছ বাংগালুৰুৱে ভাল আৰম্ভণি কৰে । প্ৰথম উইকেটত বিৰাট কোহলী আৰু ফিল ছল্টৰ মাজত ৫২ ৰানৰ অংশীদাৰিত্ব গঢ়ি উঠে । তিনিটা চাৰিৰ সহায়ত ১৯ ৰান সংগ্ৰহ কৰাৰ পাছত কোহলী লুংগি ঙিডিৰ বলত পেভিলিয়নমুখী হয় । ইয়াৰ পাছত ছল্ট আৰু দেৱদত্ত পাডিক্কালে দ্বিতীয় উইকেটৰ বাবে ৪৭ ৰানৰ অংশীদাৰিত্ব ভাগ কৰে । পাডিক্কাল (১৮ ৰান)ক অধিনায়ক অক্ষৰ পেটেলে আউট কৰে ।

ৰয়েল চেলেঞ্জাৰ্ছ বাংগালুৰুৰ তৃতীয়টো আঘাত ফিল ছল্টৰ ৰূপত লাভ কৰে । কুলদীপ যাদৱৰ হাতত তেওঁ নিজৰ উইকেট বিসৰ্জন দিয়ে । ছল্টে ৩৮টা বলত ৬৩ ৰান সংগ্ৰহ কৰে, য’ত চাৰিটা চাৰিটা আৰু তিনিটা ছয় আছিল । অধিনায়ক ৰজত পাটিদাৰে বিশেষ প্ৰদৰ্শনত ব্যৰ্থ হয় । মুকেশ কুমাৰে ৮ ৰানত অধিনায়কগৰাকীক আউট কৰে ।

তাৰ পিছৰ পৰা নিয়মীয়া ব্যৱধানত ৰয়েল চেলেঞ্জাৰ্ছ বেংগালুৰুৱে উইকেট হেৰুৱাবলৈ ধৰে । টিম ডেভিদ (২৬ ৰান), ৰোমাৰিয়া শ্বেফাৰ্ড (১ ৰান), ক্ৰুনাল পাণ্ডিয়া (১২ ৰান) আৰু জিতেশ শৰ্মাই (১৪ ৰান) সংগ্ৰহ কৰে । দিল্লী কেপিটেলছৰ হৈ লুংগী ঙিদি, কুলদীপ যাদৱ আৰু অক্ষৰ পেটেলে দুটাকৈ উইকেট দখল কৰে ।

দিল্লী কেপিটেলছ আৰু ৰয়েল চেলেঞ্জাৰ্ছ বেংগালুৰুৱে এই পৰ্যন্ত ইণ্ডিয়ান প্ৰিমিয়াৰ লীগত ৩৪খন খেল খেলিছে । ইয়াৰে ২০খন খেলত ৰয়েল চেলেঞ্জাৰ্ছ বাংগালুৰুৱে জয়লাভ কৰাৰ বিপৰীতে দিল্লী কেপিটেলছে ১৩খন খেলত জয়লাভ কৰিছে । এখন মেচ ড্ৰ’ত সমাপ্ত হয় ।

লগতে পঢ়ক : টিম ইণ্ডিয়াত কাৰ ঠাই ল’ব বৈভৱ সূৰ্যবংশীয়ে? শীঘ্ৰেই ঘটিব আন্তঃৰাষ্ট্ৰীয় অভিষেক !

লক্ষ্ণৌ ছুপাৰ জায়েন্টছৰ বিৰুদ্ধে ৰয়েল চেলেঞ্জাৰছ বেংগালুৰুৱে জয়লাভ কৰে

আই পি এল ২০২৬ৰ বুধবাৰে অনুষ্ঠিত হোৱা এখন মেচত লক্ষ্ণৌ ছুপাৰ জায়েন্টছৰ বিৰুদ্ধে ৰয়েল চেলেঞ্জাৰছ বেংগালুৰুৱে জয়লাভ কৰে । বেংগালুৰুৰ এম চিন্নাস্বামী ষ্টেডিয়ামত অনুষ্ঠিত খেলখনত আৰ চি বিয়ে ৫ উইকেটত জয়লাভ কৰে । ১৪৭ ৰানৰ লক্ষ্য লাভ কৰি ১৫.১ অভাৰত এই লক্ষ্যত উপনীত হয় আৰ চি বি ।

এই মেচত বিৰাট কোহলীয়ে দৰ্শনীয় ৪৯ ৰান সংগ্ৰহ কৰে । বেগী বলাৰ ৰছিক চালাম দাৰে ৪টা উইকেট দখল কৰে । এই জয়েৰে ৰয়েল চেলেঞ্জাৰছ বাংগালুৰু পইণ্ট তালিকাৰ শীৰ্ষত উপনীত হৈছে । পাঁচখন মেচত চাৰিখন জয়ৰ পৰা আৰ চি বিয়ে ৮ পইণ্ট লাভ কৰিছে যদিও ৰাজস্থান ৰয়েলছ (আৰ আৰ)তকৈ ইয়াৰ নেট ৰান ৰেট ভাল । তৃতীয় স্থানত আছে পঞ্জাব কিংছ আৰু চতুৰ্থ স্থানত আছে ছানৰাইজাৰ্ছ হায়দৰাবাদ ।

ৰয়েল চেলেঞ্জাৰ বেংগালুৰু আৰু লক্ষ্ণৌ ছুপাৰ জায়েন্টছৰ এই ছিজন উত্থান-পতনেৰে ভৰা । ৰয়েল চেলেঞ্জাৰছ বেংগালুৰুৱে ছানৰাইজাৰ্ছ হায়দৰাবাদ, চেন্নাই ছুপাৰ কিংছ আৰু মুম্বাই ইণ্ডিয়ানছৰ বিৰুদ্ধে জয়লাভ কৰাৰ বিপৰীতে ৰাজস্থান ৰয়েলছে তেওঁলোকক পৰাস্ত কৰে । ইফালে লক্ষ্ণৌ ছুপাৰ জায়েন্টছ দিল্লী কেপিটেলছ আৰু গুজৰাট টাইটানছৰ হাতত পৰাস্ত হয় । ছানৰাইজাৰছ হায়দৰাবাদ আৰু কলকাতা নাইট ৰাইডাৰ্ছক ঋষভ পন্ট ব্ৰিগেডে পৰাস্ত কৰে ।

বেংগালুৰুৰ ইনিংছ-

ৰান চেজত ৰয়েল চেলেঞ্জাৰছ বাংগালুৰুৰ আৰম্ভণি ভাল নাছিল । ফিল ছল্ট মাত্ৰ ৭ ৰানত আউট হয় । ইয়াৰ পাছতে ‘ইমপেক্ট চাব’ বিৰাট কোহলী আৰু দেৱদত্ত পাডিক্কালে দ্বিতীয় উইকেটৰ বাবে ৫৭ ৰানৰ অংশীদাৰিত্ব গঢ়ি তোলে । এই অংশীদাৰিত্ব ভাঙি পাডিক্কালক (১০ ৰান) আউট কৰে আৱেশ খানে । তাৰ পাছত বিৰাট কোহলীৰ ৰূপত আৰ চি বিয়ে তৃতীয়টো আঘাত লাভ কৰে । কোহলীয়ে ৩৪টা বলত ৪৯ ৰান সংগ্ৰহ কৰে । তেওঁৰ এই ইনিংছত ৬টা চাৰি আৰু এটা ছয় আছিল । আৱেশ খানৰ চিকাৰ হয় কোহলী ।

অধিনায়ক ৰজত পাটিদাৰ আৰু জিতেশ শৰ্মাই কিছু ডাঙৰ শ্বট মাৰি দলটোক জয়ৰ ওচৰলৈ নিবলৈ সক্ষম হয় । পাটিদাৰে ১৩টা বলত ২৭ ৰান সংগ্ৰহ কৰাৰ বিপৰীতে জিতেশে ৯টা বলত ২৩ ৰানৰ অৰিহণা যোগায় । ৰজত আৰু জিতেশৰ উইকেট দখল কৰে ৰাজকুমাৰ যাদৱে । তাৰ পৰা টিম ডেভিদ (১৪*) আৰু ৰোমাৰিয়া শ্বেফাৰ্ডে (১৪*) আৰচিবিক জয়ৰ দিশে আগুৱাই লৈ যায় ।

লক্ষ্ণৌৰ বেটিং-

লক্ষ্ণৌ ছুপাৰ জায়েণ্টছে টছ হেৰুৱাই প্ৰথমে বেটিং কৰাৰ পিছত ২০ অভাৰত ১৪৬ ৰান সংগ্ৰহ কৰে । লক্ষ্ণৌৰ আৰম্ভণি বেয়া আছিল । ১২ ৰানত আউট হয় আইডেন মাৰ্কৰাম । মাৰ্কৰামৰ উইকেট দখল কৰে ৰছিক চালাম দাৰে । ইয়াৰ পিছতে অধিনায়ক ঋষভ পন্ট আঘাতপ্ৰাপ্ত হৈ অৱসৰ ল’বলগীয়া হয় । অৱশ্যে পিছত পণ্টে পুনৰ বেটিং কৰিবলৈ সক্ষম হয় ।

ইয়াৰ পিছতে জোছ হেজলউডে লক্ষ্ণৌক দ্বিতীয়টো আঘাত দিয়ে আৰু নিকোলাছ পুৰাণক আউট কৰে । অ’পেনাৰ মিচেল মাৰ্ছে ক্ৰীজত থিতাপি লৈছিল যদিও তেওঁ নিজৰ ইনিংছ বৃদ্ধি কৰিব নোৱাৰিলে । মাৰ্ছক বল্ড কৰে ক্ৰুনাল পাণ্ডিয়াই । ৩২টা বলত ৩টা চাৰি আৰু ২টা ছয়ৰ সহায়ত মাৰ্ছে ৪০ ৰান সংগ্ৰহ কৰে । ইয়াৰ পিছতে ক্ৰুনালে আব্দুল ছামাদক (০ ৰান) আউট কৰে ।

আয়ুস বদোনীক আউট কৰি আৰচিবিক পঞ্চমটো ব্ৰেকথ্ৰু প্ৰদান কৰে ৰছিক চালাম দাৰে । বদোনিয়ে ৪টা চাৰি আৰু ১টা ছয়ৰ সহায়ত ২৪টা বলত ৩৮ ৰান সংগ্ৰহ কৰে । ইয়াৰ পাছতে ভুৱনেশ্বৰ কুমাৰে অধিনায়ক ঋষভ পন্টক আউট কৰে (১ ৰান) । ভুৱনেশ্বৰে ইয়াতেই থমকি নৰ’ল, একেৰাহে জৰ্জ লিণ্ডে (৭ ৰান) আৰু মহম্মদ ছামি (০ ৰান)কো আউট কৰে তেওঁ ।

লক্ষ্ণৌৰ নৱম উইকেটটো উজ্জ্বল বেটিং কৰি থকা মুকুল চৌধাৰীৰ ৰূপত পৰে । মুকুলে ২৮টা বলত ৩৯ ৰান সংগ্ৰহ কৰে, য’ত ৩টা চাৰি আৰু দুটা ছয় আছিল । মুকুলৰ আউটৰ পাছত ইনিংছৰ শেষৰ বলত ৰছিক চালাম দাৰে আভেশ খানক (১ ৰান) বল্ড কৰে । আৰচিবিৰ হৈ বেগী বলাৰ ৰছিক চালাম দাৰে ৪টা উইকেট দখল কৰাৰ বিপৰীতে ভুৱনেশ্বৰ কুমাৰে ৩টা উইকেট দখল কৰে ।

লগতে পঢ়ক : টিম ইণ্ডিয়াত কাৰ ঠাই ল’ব বৈভৱ সূৰ্যবংশীয়ে? শীঘ্ৰেই ঘটিব আন্তঃৰাষ্ট্ৰীয় অভিষেক !

বৰ্তমানৰ ডিফেণ্ডিং চেম্পিয়ন ৰয়েল ছেলেঞ্জাৰ্ছ বেংগালুৰু (আৰ চি বি)য়ে নতুন গৰাকী লাভ কৰিছে

আই পি এলৰ অন্যতম জনপ্ৰিয় দল তথা বৰ্তমানৰ ডিফেণ্ডিং চেম্পিয়ন ৰয়েল চেলেঞ্জাৰছ বেংগালুৰু (আৰ চি বি)য়ে নতুন গৰাকী লাভ কৰিছে । আদিত্য বিৰলা গ্ৰুপ, টাইমছ অৱ ইণ্ডিয়া গ্ৰুপ, বল্ট ভেঞ্চাৰছ আৰু ব্লেকষ্টোনে যৌথভাৱে প্ৰায় ১.৭৮ বিলিয়ন ডলাৰ (প্ৰায় ১৬,৭০৬ কোটি টকা)ত এই দলটো ক্ৰয় কৰিছে । মঙলবাৰে এই চুক্তি চূড়ান্ত কৰা হয় ।

উল্লেখযোগ্য যে আৰ চি বি চুক্তিৰ পূৰ্বে আমেৰিকান ব্যৱসায়ী কাল সোমানীয়ে ৰাজস্থান ৰয়েলছক প্ৰায় ১৫,০০০ কোটি টকাত অধিগ্ৰহণ কৰিছিল । অৰ্থাৎ এদিনতে দুটা আই পি এল দলৰ মালিকীস্বত্ব সলনি হৈছে ।

ক্ৰিকবাজৰ প্ৰতিবেদন অনুসৰি আৰচিবিৰ চুক্তি ইউনাইটেড স্পিৰিটছ লিমিটেড (ডায়েজিঅ’ৰ সহযোগী কোম্পানী)ৰ সৈতে স্বাক্ষৰিত হৈছিল, য’ত আৰচিবিৰ ১০০% অংশীদাৰিত্ব হস্তান্তৰ কৰা হ’ব । এই চুক্তিত আই পি এল আৰু ডব্লিউ পি এল (মহিলা দল) দুয়োটাকে অন্তৰ্ভুক্ত কৰা হৈছে । অৰ্থাৎ আৰ চি বিৰ পুৰুষ আৰু মহিলা দুয়োটা দলৰ মালিকীস্বত্ব এতিয়া এই চাৰিজন শ্বেয়াৰহোল্ডাৰৰ হাতলৈ গৈছে ।

নতুন মালিকীস্বত্বৰ অধীনত :

-আৰ্যমন বিক্ৰম বিৰলা (আদিত্য বিৰলা গ্ৰুপ) অধ্যক্ষ হ’ব ।

-সত্যন গজৱানী (টাইমছ গ্ৰুপ) উপাধ্যক্ষ হ’ব ।

-এই কনচৰ্টিয়ামত ডেভিদ ব্লিটজাৰ (বল্ট ভেঞ্চাৰছ) আৰু ভাইৰেল পেটেল (ব্লেকষ্টোন)ও আছে ।

বৰ্তমান এই চুক্তিত কিছুমান চৰ্ত আৰোপ কৰা হৈছে । এতিয়াও ই বিচিচিআই, ভাৰতীয় প্ৰতিযোগিতা আয়োগ আৰু অন্যান্য নিয়ন্ত্ৰণ কৰ্তৃপক্ষৰ অনুমোদনৰ আওতাত আছে ।

এই চুক্তি সন্দৰ্ভত আদিত্য বিৰলা গ্ৰুপৰ অধ্যক্ষ কুমাৰ মংগলম বিৰলাই কয় যে আই পি এলে বিগত ২০ বছৰত ক্ৰিকেটৰ ৰূপান্তৰ ঘটাইছে আৰু আৰ চি বিৰ দৰে দলৰ সৈতে অংশীদাৰিত্ব কৰাটো তেওঁলোকৰ বাবে এক উল্লেখযোগ্য সুবিধা । তেওঁ কয় যে তেওঁলোকে দলটোৰ উত্তৰাধিকাৰ আৰু অধিক বৃদ্ধি কৰিব ।

টাইমছ গ্ৰুপৰ সত্যন গাজৱানীয়ে কয় যে, “আৰ চি বি কেৱল এটা দল নহয়, বৰঞ্চ আই পি এলৰ অন্যতম জনপ্ৰিয় ব্ৰেণ্ড । তেওঁলোকৰ লক্ষ্য হৈছে ইয়াক বিশ্বব্যাপী ক্ৰীড়া ব্ৰেণ্ড হিচাপে গঢ়ি তোলা ।”

উল্লেখ্য যে আৰ চি বি আই পি এল ২০২৬ৰ ডিফেণ্ডিং চেম্পিয়ন । পঞ্জাৱ কিংছক পৰাস্ত কৰি ২০২৫ৰ ছিজনত খিতাপ দখল কৰিছিল দলটোৱে । আই পি এলৰ ইতিহাসত এই খিতাপ প্ৰথমবাৰৰ বাবে লাভ কৰিছিল আৰ চি বিয়ে ।

লগতে পঢ়ক : বেংগালুৰু বনাম হায়দৰাবাদৰ মেচেৰে আৰম্ভণি হ’ব আই পি এল ২০২৬