পঞ্চায়ত নিৰ্বাচনক লৈ মুখ্যমন্ত্ৰী ড০ হিমন্ত বিশ্ব শৰ্মাই ডাঙৰ ঘোষণা কৰিছে। মুখ্যমন্ত্ৰীগৰাকীয়ে জনোৱা অনুসৰি ১৮ মাৰ্চত জাৰি হ’ব পঞ্চায়ত নিৰ্বাচনৰ অধিসূচনা।১৭ মাৰ্চত শেষ হ’ব উচ্চতৰ মাধ্যমিকৰ পৰীক্ষা।

আৰু পৰীক্ষা শেষ হোৱাৰ পিছতেই অনুষ্ঠিত হ’ব পঞ্চায়ত নিৰ্বাচন। মুখ্যমন্ত্ৰী গৰাকীয়ে লগতে কয় যে এইবাৰ নতুন নিয়মেৰে অনুষ্ঠিত হ’ব পঞ্চায়ত নিৰ্বাচন। পঞ্চায়তক ৰাজনীতিমুক্ত কৰাৰ বাবে লোৱা হৈছে এই সিদ্ধান্ত।

এতিয়াৰে পৰা পঞ্চায়তৰ সভাপতি আৰু সদস্য পদৰ প্ৰাৰ্থী অৰাজনৈতিক হ’ব লাগিব।বিজেপিয়ে পঞ্চায়তৰ সভাপতি আৰু সদস্য পদত হস্তক্ষেপ নকৰে। অৱসৰপ্ৰাপ্ত শিক্ষক নাইবা স্থানীয়ভাৱে ভাল কাম কৰা লোকসকলে এইক্ষেত্ৰত সুবিধা পাব।

নতুন বছৰৰ প্ৰথমটো দিনতে ৰাজ্যবাসীলৈ মুখ্যমন্ত্ৰীৰ কেইবাটাও বৃহৎ ঘোষণা ।নববৰ্ষৰ প্ৰহিলা দিনটোতে কইনাধৰাত সাংবাদিকৰ সৈতে মত-বিনিময়ৰ এক কাৰ্যসূচীত অংশগ্ৰহণ কৰে মুখ্যমন্ত্ৰী ড০ হিমন্ত বিশ্ব শৰ্মাই।

এই কাৰ্যসূচীতে মুখ্যমন্ত্ৰী গৰাকীয়ে ৰাজ্যবাসীক দিলে কেইবাটাও ভাল খব। তাৰ মাজতে বিদ্যুৎ বিলৰ সন্দৰ্ভত মুখ্যমন্ত্ৰী গৰাকীয়ে কয় যে ‘বিগত দুবছৰ ধৰি APDCL লাভত আছে।সেয়েহে এই বছৰ আমি বিদ্যুৎ মাচুল হ্ৰাস কৰিব পৰা পৰিস্থিতিলৈ আহিম”।

লগতে তেওঁ কয়, দুটা বছৰত আমাৰ ৬০০ কোটি টকা লাভ হৈছে। ব’হাগ বিহুৰ পৰা বিদ্যুতৰ মাছুল হ্ৰাস কৰা হ’ব। ৫০ পইচাৰ পৰা ডেৰ টকা হ্ৰাস হ’ব বিদ্যুৎ মাচুল। মধ্যবিত্ত লোক যিসকল লোকে ১৫০ ইউনিট বিদ্যুৎ খৰচ কৰে, তেওঁলোকৰ বাবে ডেৰ টকা মাচুল হ্ৰাস কৰা লক্ষ্য বান্ধি লৈছোঁ”।

ইয়াৰ লগতে ৰাজ্য চৰকাৰৰ কৰ্মচাৰী সকলক লৈও এক ডাঙৰ ঘোষণা কৰিছে মুখ্যমন্ত্ৰী গৰাকীয়ে। এতিয়াৰে পৰা কৰ্মচাৰী সকলে মিউচুৱেল ট্ৰান্সফাৰৰ বাবে এতিয়াৰে পৰা চৰকাৰী কাৰ্যালয়ৰ দুৱাৰে দুৱাৰে যাব নালাগে।

কিয়নো আজি মুকলি কৰা হ’ল ‘স্বাগত সতীৰ্থ’ পৰ্টেল। এই পৰ্টেলৰ জৰিয়তে কৰ্মচাৰী সকলে কৰিব পাৰিব বদলিৰ কাম।প্ৰতিবছৰে ১ জানুৱাৰীৰ পৰা ২৮ ফেব্ৰুৱাৰীলৈ খোলা থাকিব পৰ্টেল।

তৃতীয় আৰু চতুৰ্থ বৰ্গৰ কৰ্মচাৰীৰ বাবেও থাকিব বিশেষ সুবিধা।কৰ্মচাৰী সকলে ৫খন জিলাৰ নিৰ্বাচন দি বাচনি কৰিব পাৰিব। বিহুৰ পূৰ্বেই কম্পিউটাৰৰ জড়িয়তে সমাপন হ’ব বদলিকৰণ প্ৰক্ৰিয়া।

আনহাতে ৰাজ্য চৰকাৰৰ কৰ্মচাৰীলৈ বিনামূলীয়া বীমাৰ ব্যৱস্থা কৰাৰ কথাও উল্লেখ কৰে মুখ্যমন্ত্ৰী গৰাকীয়ে। ৰাজ্য চৰকাৰৰ যি কোনো কৰ্মচাৰীৰ যদি প্ৰাকৃতিক কাৰণত মৃত্যু হয় তেতিয়া হ’লে পৰিয়ালে লাভ কৰিব ১০ লাখ টকা।

ইফালে দুৰ্ঘটনাত মৃত্যু হ’লে কৰ্মচাৰীৰ পৰিয়ালে লাভ কৰিব ১ কোটি টকা আৰু দুৰ্ঘটনাত গুৰুতৰভাৱে আঘাতপ্ৰাপ্ত হৈ বিশেষভাৱে সক্ষম হ’লে লাভ কৰিব ৮০ লাখ।

আনহাতে গুৱাহাটী-উত্তৰ গুৱাহাটী সংযোগী দলংখন জুন জুলাই মাহতে উদ্বোধন কৰা হ’ব বুলিও তেওঁ মন্তব্য কৰে।গুৱাহাটী-উত্তৰ গুৱাহাটী সংযোগী দলংখন কুমাৰ ভাস্কৰ বৰ্মনৰ নামেৰে নামকৰণ কৰা হ’ব বুলিও তেওঁ কয়।