মুখ্যমন্ত্ৰী হিমন্ত বিশ্ব শৰ্মাই কয় যে ৰাজ্যখনৰ প্ৰতিটো নিৰ্বাচন খিলঞ্জীয়াৰ পৰিচয় আৰু ভৱিষ্যত সুৰক্ষিত কৰাৰ বাবে অত্যন্ত গুৰুত্বপূৰ্ণ

আগন্তুক বিধানসভা নিৰ্বাচনৰ বাবে বিজেপিয়ে ৰাজ্যত তীব্ৰতৰ কৰি তুলিছে প্ৰচাৰ অভিযান । ইয়াৰ মাজতে মাজতে মুখ্যমন্ত্ৰী হিমন্ত বিশ্ব শৰ্মাই কয় যে ৰাজ্যখনৰ প্ৰতিটো নিৰ্বাচন খিলঞ্জীয়াৰ পৰিচয় আৰু ভৱিষ্যত সুৰক্ষিত কৰাৰ বাবে অত্যন্ত গুৰুত্বপূৰ্ণ । ভৱানীপুৰ-সৰভোগ সমষ্টিত জন আশীৰ্বাদ যাত্ৰাত অংশগ্ৰহণ কৰি মুখ্যমন্ত্ৰীগৰাকীয়ে এই মন্তব্য কৰে ।

সাংবাদিকৰ সৈতে হোৱা কথা-বতৰাত মুখ্যমন্ত্ৰী ড০ শৰ্মাই জনায় যে আগন্তুক দুই-তিনি দিনৰ ভিতৰত দলৰ নিৰ্বাচনী ইস্তাহাৰ প্ৰকাশ কৰা হ’ব । এই ইস্তাহাৰত ৰাজ্যখনৰ বাবে দলটোৰ লক্ষ্য আৰু প্ৰতিশ্ৰুতিসমূহ উল্লেখ থাকিব বুলি কয় তেওঁ । ইয়াৰ লগতে তেওঁ বুধবাৰৰ পৰা বিজেপিৰ নিৰ্বাচনী প্ৰচাৰৰ পৰৱৰ্তী পৰ্যায় হিচাপে “বিজয় সংকল্প সভা” আৰম্ভ কৰাৰ কথাও ঘোষণা কৰে ।

নিৰ্বাচনৰ পূৰ্বে দলটোৱে দাঙি ধৰিব খোজা ৰাজনৈতিক বাৰ্তাটো স্পষ্ট কৰি মুখ্যমন্ত্ৰীগৰাকীয়ে কয়, “অসমৰ খিলঞ্জীয়া লোকসকলৰ বাবে প্ৰতিটো নিৰ্বাচন নিৰ্ণায়ক; আমি জীয়াই থাকিব লাগিব আৰু নিজৰ পৰিচয় ৰক্ষা কৰিব লাগিব ।” শেহতীয়াকৈ সমাপ্ত হোৱা ‘জন আশীৰ্বাদ যাত্ৰা’ৰ পৰ্যালোচনা কৰি মুখ্যমন্ত্ৰী ড০ শৰ্মাই কয় যে এই অভিযানে ৪০টা বিধানসভা সমষ্টিৰ প্ৰায় ২,০০০ কিলোমিটাৰ পথ সামৰি লৈছে । জনসাধাৰণৰ সঁহাৰি “অতি ইতিবাচক” বুলি বৰ্ণনা কৰি তেওঁ আস্থা প্ৰকাশ কৰে যে এই জনসমৰ্থনে নিৰ্বাচনত সফলতা কঢ়িয়াই আনিব ।

লগতে পঢ়ক : সৰভোগত মুখ্যমন্ত্ৰীৰ জন আশীৰ্বাদ যাত্ৰা, ২ লাখ চাকৰিৰ প্ৰতিশ্ৰুতি

সৰভোগ সমষ্টিৰ ভৱানীপুৰ অঞ্চলত জন আশীৰ্বাদ যাত্ৰাত অংশগ্ৰহণ কৰে মুখ্যমন্ত্ৰী ড০ হিমন্ত বিশ্ব শৰ্মাই

২৪ মাৰ্চত বজালী জিলাৰ ভৱানীপুৰত মুখ্যমন্ত্ৰী ড০ হিমন্ত বিশ্ব শৰ্মাক ভৱানীপুৰ সত্ৰই গোপাল আতা বঁটাৰে সন্মানিত কৰে । মুখ্যমন্ত্ৰী শৰ্মাই সৰভোগ সমষ্টিৰ ভৱানীপুৰ অঞ্চলত জন আশীৰ্বাদ যাত্ৰাত অংশগ্ৰহণ কৰে, য’ত তেওঁ এক বিশাল জন সমাৱেশক সম্বোধন কৰে আৰু নিজৰ বাহনৰ ওপৰৰ পৰাই সমৰ্থকসকলৰ সৈতে মত-বিনিময় কৰে । ইফালে এই যাত্ৰাত মুখ্যমন্ত্ৰীগৰাকীয়ে ৰাইজৰ অভূতপূৰ্ব সঁহাৰি লাভ কৰে । মুখ্যমন্ত্ৰীৰ এই যাত্ৰালৈ হিল-দল ভাঙি ওলাই আহে ভৱানীপুৰৰ ৰাইজ ।

নিৰ্বাচনৰ পূৰ্বে আত্মবিশ্বাস প্ৰকাশ কৰি মুখ্যমন্ত্ৰীগৰাকীয়ে কয় যে বিজেপি প্ৰাৰ্থীয়ে এক ঐতিহাসিক জয় সাব্যস্ত কৰিব আৰু জনসাধাৰণৰ সমৰ্থন দলটোৰ পক্ষত দৃঢ়ভাৱে আছে বুলি তেওঁ দাবী কৰে । ইয়াৰ লগতে তেওঁ কংগ্ৰেছক তীব্ৰ সমালোচনা কৰি সমষ্টিটোত নিৰ্বাচনী প্ৰচাৰ অধিক সক্ৰিয় কৰি তোলে ।

উন্নয়নমূলক প্ৰতিশ্ৰুতিসমূহৰ ওপৰত আলোকপাত কৰি মুখ্যমন্ত্ৰীগৰাকীয়ে আশ্বাস দিয়ে যে ভৱানীপুৰত এখন উৰণ সেতু নিৰ্মাণ কৰা হ’ব । তেওঁ লগতে উল্লেখ কৰে যে ইতিমধ্যে প্ৰায় ১.৫ লাখ বিঘা সত্ৰৰ ভূমি বেদখলমুক্ত কৰা হৈছে আৰু অনাগত সময়ত আৰু ৫০০০ বিঘা ভূমি মুক্ত কৰা হ’ব । সংস্থাপনৰ সন্দৰ্ভত মুখ্যমন্ত্ৰী ড০ শৰ্মাই পুনৰ কয় যে চৰকাৰে দুই লাখ যুৱক-যুৱতীক চাকৰি আৰু ১০ লাখ নিবনুৱাক প্ৰত্যেকৰে বিপৰীতে ২ লাখ টকাকৈ আৰ্থিক সাহায্য প্ৰদানৰ পৰিকল্পনা কৰিছে ।

উল্লেখ্য যে, ভৱানীপুৰ-সৰভোগ বিধানসভা সমষ্টিৰ পৰা বিজেপিয়ে ৰঞ্জিত কুমাৰ দাসক প্ৰক্ষেপ কৰিছে । ইফালে কংগ্ৰেছৰ মিত্ৰদল চিপিআই(এম)-এ মনোৰঞ্জন তালুকদাৰক আৰু সৰ্বভাৰতীয় ইউনাইটেড ডেম’ক্ৰেটিক ফ্ৰণ্টে (AIUDF) ফৰহাদ আলীক প্ৰক্ষেপ কৰিছে ।

লগতে পঢ়ক : নগাঁৱৰ সাংসদ প্ৰদ্যুৎ বৰদলৈৰ পদত্যাগ গ্ৰহণ লোকসভাৰ অধ্যক্ষৰ

পাকিস্তানত নিৰ্বাচন খেলিলে গৌৰৱ গগৈয়ে অধিক ভোট পালেহেঁতেন বুলি কটাক্ষ কৰে মুখ্যমন্ত্ৰীয়ে

আগন্তুক বিধানসভা নিৰ্বাচনৰ অন্তিম দিনটোত মুখ্যমন্ত্ৰীৰ মুখত পুনৰ ঠাই পালে গৌৰৱ গগৈৰ পাকিস্তান সংযোগৰ বিষয়ে । যোৰহাট বিধানসভা সমষ্টিৰ পৰা গৌৰৱ গগৈয়ে নিৰ্বাচন খেলাক লৈ সোমবাৰে প্ৰতিক্ৰিয়া প্ৰকাশ কৰে মুখ্যমন্ত্ৰীয়ে । পাকিস্তানত নিৰ্বাচন খেলিলে গৌৰৱ গগৈয়ে অধিক ভোট পালেহেঁতেন বুলি কটাক্ষ কৰে মুখ্যমন্ত্ৰীয়ে । লগতে পাকিস্তানৰ এজেণ্টে পাকিস্তানত নিৰ্বাচন খেলিব লাগে বুলি মন্তব্য কৰে মুখ্যমন্ত্ৰীগৰাকীয়ে ।

মুখ্যমন্ত্ৰী হিমন্ত বিশ্ব শৰ্মাই কয়-“গৌৰৱ গগৈয়ে যোৰহাটৰ পৰা মনোনয়ন দিছে তেওঁক শুভেচ্ছা জনাইছোঁ, কিন্তু তেওঁ ভাৰততকৈ পাকিস্তানত মনোনয়ন দিয়াহেতেন বেছি ভোট পালেহেতেন । যি পাকিস্তানৰ এজেন্ট তেওঁ পাকিস্তানত নিৰ্বাচন খেলিব লাগে ভাৰতত নহয় ।“

অসমত এইবাৰ আকৌ বিজেপিৰ চুনামি আহিব-

ইফালে অসমত এইবাৰ হ’ব বিজেপিৰ চুনামি আহিব বুলি মন্তব্য কৰে মুখ্যমন্ত্ৰী ড০ হিমন্ত বিশ্ব শৰ্মাই । অসম গণ পৰিষদৰ কাৰ্যকৰী সভাপতি কেশৱ মহন্তৰ মনোনয়ন যাত্ৰাত অংশগ্ৰহণ কৰি মুখ্যমন্ত্ৰীগৰাকীয়ে এইবাৰ বিজেপি মিত্ৰজোঁটৰ অভূতপূৰ্ব ফলাফল হ’ব বুলি মন্তব্য কৰে ।

আগন্তুক নিৰ্বাচনত বিজেপিয়ে কিমান আসন পাব বুলি সাংবাদিকে সোধা আক প্ৰশ্নত মুখ্যমন্ত্ৰীগৰাকীয়ে কয়- “কিমান আসন পাম সেয়া আমিও হিচাপ কৰি শেষ কৰিব নোৱাৰিম । এইবাৰ আমি অভূতপূৰ্বভাৱে ভাল ফলাফল প্ৰদৰ্শন কৰিবলৈ সক্ষম হম ।“

আনহাতে বিৰোধী মহাজোঁটক লৈয়ো প্ৰতিক্ৰিয়া প্ৰকাশ কৰে মুখ্যমন্ত্ৰীগৰাকীয়ে । বিৰোধী মহাজোঁটে নিৰ্বাচনত কোনো প্ৰভাৱ নেপেলায় বুলি মন্তব্য কৰে মুখ্যমন্ত্ৰী হিমন্ত বিশ্ব শৰ্মাই ।

লগতে পঢ়ক : শিৱসাগৰৰ নিৰ্বাচনী ৰণত প্ৰৱেশ কুশল দুৱৰীৰ, দাখিল কৰিলে মনোনয়ন

বিজেপিৰ নিৰ্বাচনী প্ৰচাৰ সন্দৰ্ভত এক গুৰুত্বপূৰ্ণ মন্তব্য কৰিছে মুখ্যমন্ত্ৰী ড০ হিমন্ত বিশ্ব শৰ্মাই

ৰাজ্যত এতিয়া নিৰ্বাচনৰ বতাহ । আগন্তুক বিধানসভা নিৰ্বাচনৰ বাবে প্ৰত্যেকটো দলে প্ৰস্তুতি তীব্ৰতৰ কৰি তুলিছে । ইয়াৰ মাজতে ৰাজ্যত বিজেপিৰ নিৰ্বাচনী প্ৰচাৰ সন্দৰ্ভত এক গুৰুত্বপূৰ্ণ মন্তব্য কৰিছে মুখ্যমন্ত্ৰী ড০ হিমন্ত বিশ্ব শৰ্মাই । বিজেপিয়ে অসমত ৪২ কিলোমিটাৰ জোৰা এক ৰোড শ্ব’ৰ জৰিয়তে নিৰ্বাচনী প্ৰচাৰ আৰম্ভ কৰিব বুলি মুখ্যমন্ত্ৰী হিমন্ত বিশ্ব শৰ্মাই সদৰী কৰিছে । মুখ্যমন্ত্ৰী হিমন্ত বিশ্ব শৰ্মাই জনোৱা মতে, মনোনয়ন দাখিলৰ সময়সীমা শেষ হোৱাৰ ঠিক এদিন পিছত, অৰ্থাৎ ২৪ মাৰ্চত ভৱানীপুৰ-সৰভোগ সমষ্টিত এই বিশাল ৰোড শ্ব’টো অনুষ্ঠিত হ’ব ।

সংবাদ মাধ্যমৰ সন্মখত মুখ্যমন্ত্ৰী ড০ শৰ্মাই কয় যে মিত্ৰজোঁটে ২৪ মাৰ্চৰ পৰা আনুষ্ঠানিকভাৱে প্ৰচাৰ আৰম্ভ কৰাৰ লক্ষ্য নিৰ্ধাৰণ কৰিছে আৰু ২৬ মাৰ্চৰ পৰা নিয়মীয়া নিৰ্বাচনী সভা অনুষ্ঠিত হ’ব । তেওঁ কয়, “ভৱানীপুৰ-সৰভোগ সমষ্টিত এটা ৰোড শ্ব’ অনুষ্ঠিত হ’ব যিয়ে প্ৰায় ৪০ কিলোমিটাৰ পথ সামৰি ল’ব । কিন্তু ২৬ মাৰ্চৰ পৰাহে নিয়মীয়া সভাসমূহ আৰম্ভ হ’ব ।”

ইফালে গুৱাহাটীত মুখ্যমন্ত্ৰী ড০ শৰ্মাই টিকট বঞ্চিত ৰমেন্দ্ৰ নাৰায়ণ কলিতাক সাক্ষাৎ কৰে । মুখ্যমন্ত্ৰীগৰাকীয়ে কয় যে আসন ভাগ-বাটোৱাৰাৰ বাধ্যবাধকতাৰ বাবেহে এই সিদ্ধান্ত লোৱা হৈছে ।

তেওঁ কয়, “আসনৰ বুজাবুজিৰ বাবেহে তেওঁ আসনখন পোৱা নাই । এনেকুৱা নহয় যে তেওঁক প্ৰত্যাখ্যান কৰা হৈছে । তেওঁৰ কৰ্মীসকল সুখী নোহোৱাটো, অলপ হতাশ হোৱাটো আৰু অলপ খং উঠাটো স্বাভাৱিক । কিন্তু লাহে লাহে আমি কথা পাতিব লাগিব আৰু তেওঁলোকৰ স্বাৰ্থ সুৰক্ষিত হ’ব বুলি তেওঁলোকক আশ্বস্ত কৰিব লাগিব ।”

লগতে পঢ়ক : জয়ন্ত দাসৰ পদত্যাগক লৈ হিমন্ত বিশ্ব শৰ্মাৰ প্ৰতিক্ৰিয়া; ক’লে ‘দলে সঠিক সিদ্ধান্তই লৈছে’

৩৫খন জিলাৰ বিভিন্ন সমষ্টিত মুঠ ১০৯ গৰাকী প্ৰাৰ্থীয়ে ২০৯খন মনোনয়ন পত্ৰ দাখিল কৰিছে

আগন্তুক অসম বিধানসভা নিৰ্বাচনৰ বাবে ২০ মাৰ্চ, শুকুৰবাৰে শাসক-বিৰোধীৰ কেইবাজনো প্ৰাৰ্থীয়ে নিজ নিজ সমষ্টিৰ বাবে মনোনয়ন দাখিল কৰে । বৃহৎ সংখ্যক সমৰ্থকেৰে বিশাল ৰেলী কৰি জিলা আয়ুক্ত কাৰ্যালয়ত মনোনয়ন দাখিল কৰে প্ৰাৰ্থীসকলে ।

অসমৰ মুখ্য নিৰ্বাচন বিষয়াৰ কাৰ্যালয়ৰ পৰা প্ৰকাশিত এক চৰকাৰী বিজ্ঞপ্তি অনুসৰি, ২০ মার্চত ৰাজ্যখনৰ ৩৫খন জিলাৰ বিভিন্ন সমষ্টিত মুঠ ১০৯ গৰাকী প্ৰাৰ্থীয়ে ২০৯খন মনোনয়ন পত্ৰ দাখিল কৰিছে । ইয়াৰ লগে লগে এতিয়ালৈকে মুঠ ১১৬ গৰাকী প্ৰাৰ্থীয়ে ২১৯খন মনোনয়ন পত্ৰ দাখিল কৰিছে । ২৩ মাৰ্চ মনোনয়ন পত্ৰ দাখিলৰ অন্তিম দিন হোৱাৰ পৰিপ্ৰেক্ষিতত নিৰ্বাচনী তৎপৰতা ক্ৰমান্বয়ে বৃদ্ধি পোৱা পৰিলক্ষিত হৈছে ।

২০ মাৰ্চ, শুকুৰবাৰে অগণন সমৰ্থকক লগত লৈ জালুকবাৰী সমষ্টিৰ বাবে মনোনয়ন দাখিল কৰে মুখ্যমন্ত্ৰী হিমন্ত বিশ্ব শৰ্মাই । খানাপাৰাৰ পৰা বৃহৎ ৰেলী কৰি জনস্রোতৰ মাজেৰে মনোনয়ন দাখিল কৰে মুখ্যমন্ত্ৰীগৰাকীয়ে। মুখ্যমন্ত্ৰীগৰাকীৰ মনোয়ন যাত্ৰাত অগণিত সমৰ্থকৰ লগতে তেওঁক সংগ দিয়ে পত্নী ৰিণিকি ভূঞা শৰ্মা, পুত্ৰ নন্দিল বিশ্ব শৰ্মা আৰু গুৱাহাটীৰ সাংসদ বিজুলী কলিতা মেধিয়ে।

ইফালে মনোনয়ন দাখিলৰ লগে লগে ​কেইবাটাও সমষ্টিত বহুকোণীয়া প্ৰতিদ্বন্দ্বিতাৰ ইংগিত পোৱা গৈছে। ভৱানীপুৰ-সৰভোগ সমষ্টিত বিজেপিৰ ৰঞ্জিত কুমাৰ দাস আৰু চিপিআই(এম)ৰ মনোৰঞ্জন তালুকদাৰকে ধৰি তিনিগৰাকী প্ৰাৰ্থীয়ে প্ৰতিদ্বন্দ্বিতাত নামিছে। আনহাতে চামগুৰিত চাৰিগৰাকী প্ৰাৰ্থীয়ে মনোনয়ন দাখিল কৰিছে, যিয়ে তীব্ৰ ৰাজনৈতিক যুদ্ধৰ ইংগিত দিছে।

উল্লেখ যে, মুখ্যমন্ত্ৰী হিমন্ত বিশ্ব শৰ্মাৰ লগতে ৰাজ্যৰ কেইবাগৰাকীও প্ৰভাৱশালী নেতাই শুকুৰবাৰে মনোনয়ন দাখিল কৰে। জাগীৰোড সমষ্টিৰ বাবে মন্ত্ৰী পীয়ুষ হাজৰীকা, নগাঁও সমষ্টিৰ বাবে ৰূপক শৰ্মাই, কংগ্ৰেছ নেতা দেৱব্ৰত শইকীয়াই নাজিৰা সমষ্টিৰ বাবে, অসম জাতীয় পৰিষদৰ সভাপতি লুৰীণজ্যোতি গগৈয়ে খোৱাং সমষ্টিৰ বাবে আৰু মন্ত্ৰী প্ৰশান্ত ফুকন ডিব্ৰুগড় সমষ্টিৰ বাবে মনোনয়ন দাখিল কৰে ।

​তামুলপুৰত ইউপিপিএলৰ মুৰব্বী প্ৰমোদ বড়ো আৰু বিজেপিৰ বিশ্বজিৎ দৈমাৰীৰ মাজত এক হাইপ্ৰফাইল যুঁজ হোৱাৰ সম্ভাৱনা আছে। একেদৰে বৰচলাত কংগ্ৰেছ নেতা ৰিপুণ বৰা বিজেপিৰ ঋতু বৰণ শৰ্মাৰ মুখামুখি হ’ব।

​তদুপৰি শুকুৰবাৰৰ দিনটোতে মনোনয়ন দাখিল কৰে- তুলিৰাম ৰংহাঙ, ৰংখাং সমষ্টি আৰু ড° হেবে টেৰণ আমৰি সমষ্টি। চিপিআই(এমএল)ৰ প্ৰাৰ্থী ৰবি কুমাৰ ফাংচোৱে হাওৰাঘাটৰ পৰা প্ৰতিদ্বন্দ্বিতা আগবঢ়াইছে।

​উল্লেখযোগ্য যে, ১২৬ জনীয়া অসম বিধানসভাৰ নিৰ্বাচন ৯ এপ্ৰিলত অনুষ্ঠিত হ’ব আৰু ৪ মে’ত ভোটগণনা হ’ব।

লগতে পঢ়ক : জনসমুদ্ৰৰ মাজেৰে মনোনয়ন দাখিল মুখ্যমন্ত্ৰী ড০ হিমন্ত বিশ্ব শৰ্মাৰ