ম্যানমাৰত সংঘটিত হোৱা ভয়াৱহ ভূমিকম্পৰ পিছত ভাৰতে অপাৰেচন ব্ৰহ্মৰ অধীনত ৬২৫ মেট্ৰিক টন মানৱীয় সাহায্য আৰু দুৰ্যোগ সাহায্য সামগ্ৰী প্ৰেৰণ কৰিছে । ২৮ মাৰ্চৰ পৰা আৰম্ভ হোৱা এই অভিযানৰ অধীনত ভাৰতে ম্যানমাৰত উদ্ধাৰ অভিযান, চিকিৎসা সাহায্য আৰু সাহায্য সামগ্ৰীৰ বাবে কেইবাখনো বিমান আৰু ভাৰতীয় নৌসেনাৰ জাহাজ ব্যৱহাৰ কৰিছে বুলি মঙলবাৰে বৈদেশিক পৰিক্ৰমা মন্ত্ৰালয়ে প্ৰকাশ কৰিছে ।
তিনিটা পৰ্যায়ত প্ৰেৰণ মানৱীয় সাহায্য-
উল্লেখ্য যে এই ভয়াৱহ ভূমিকম্পৰ পিছত ভাৰতে এতিয়ালৈকে অপাৰেচন ব্ৰহ্মৰ অধীনত মুঠ তিনিটা পৰ্যায়ত ম্যানমাৰলৈ সাহাৰ্য প্ৰেৰণ কৰিছে । প্ৰথম পৰ্যায়ত ২৯ মাৰ্চত তম্বু, কম্বল, ঔষধ আৰু খাদ্যকে ধৰি ১৫ টন সামগ্ৰী ইয়াংগনলৈ প্ৰেৰণ কৰা হয় । ইয়াৰ পিছত ৩০ মাৰ্চত ৮০ জন এন ডি আৰ এফৰ অনুসন্ধান আৰু উদ্ধাৰ বিশেষজ্ঞৰ সৈতে হাইজিন কিট, পাকঘৰৰ চেট, ঔষধকে ধৰি ২২ টন সাহায্য সামগ্ৰী কঢ়িয়াই নিয়া দ্বিতীয়টো চালান নেপটাত উপস্থিত হয় ।
তৃতীয় পৰ্যায়ত চাৰ্দিকেল চেল্টাৰ, পানী অনাময় সেৱা, মহিলা আৰু শিশু যত্ন সেৱাকে ধৰি ৬০ টনতকৈ অধিক সামগ্ৰী প্ৰেৰণ কৰিছিল । ইয়াৰ সমান্তৰালকৈ মণ্ডলেত ১১৮ জনীয়া ভাৰতীয় সেনাৰ এখন ক্ষেত্ৰ চিকিৎসালয় স্থাপন কৰা হৈছে, য’ত অস্ত্ৰোপচাৰ আৰু চিকিৎসাৰ কাম চলি আছে ।
ভাৰতীয় সেনাই দিলে তথ্য-
এই সন্দৰ্ভত ভাৰতীয় সেনাই কয় যে মান্দালয়ত ভাৰতীয় সেনাৰ চিকিৎসালয়ৰ অস্ত্ৰোপচাৰ বিশেষজ্ঞসকলে দুটা জীৱন ৰক্ষাকাৰী অস্ত্ৰোপচাৰ সফলতাৰে সম্পন্ন কৰিছে । ম্যানমাৰৰ সাহায্য অভিযানৰ দায়িত্বত থকা লেফটেনেণ্ট জেনেৰেল ম্যো ম’ আউঙে চিকিৎসালয়খন পৰিদৰ্শন কৰি ভাৰতৰ সাহায্যৰ প্ৰশংসা কৰে ।
বৈদেশিক মন্ত্ৰালয়ে তথ্য প্ৰদান কৰে-
বৈদেশিক পৰিক্ৰমা মন্ত্ৰালয়ে লগতে কয় যে ভাৰতীয় নৌসেনাৰ দুখন জাহাজ সাতপুৰা আৰু সাবিত্ৰীয়ে ২৯ মাৰ্চত ৪০ টন সাহায্য সামগ্ৰী লৈ ইয়াংগন অভিমুখে যাত্ৰা কৰিছিল, যি সোমবাৰে ইয়াংগনৰ মুখ্যমন্ত্ৰীক গতাই দিয়া হৈছিল । ইয়াৰ পিছত আন্দামান আৰু নিকোবৰৰ পৰা আৰু দুখন ভাৰতীয় নৌসেনাৰ জাহাজ কাৰ্মুক আৰু এল চি ইউ ৫২ ৩০ মাৰ্চত ৩০ টন সাহায্য সামগ্ৰী কঢ়িয়াই ইয়াংগন অভিমুখে যাত্ৰা কৰে ।
ম্যানমাৰত ভূমিকম্পৰ বিধ্বংসী ৰূপ-
ম্যানমাৰত যোৱা সপ্তাহত সংঘটিত হোৱা ভয়াৱহ ভূমিকম্পৰ ফলত মৃত্যু হোৱা লোকৰ সংখ্যা ক্ৰমাগতভাৱে বৃদ্ধি পাইছে । ভূমিকম্পৰ ফলত ভাঙি পৰা অট্টালিকাসমূহৰ পৰা মৃতদেহ আঁতৰোৱাৰ প্ৰক্ৰিয়া অব্যাহত আছে । ভূমিকম্পৰ ফলত দেশখনত ২৭০০ লোকৰ মৃত্যু হৈছে । ২৮ মাৰ্চত ম্যানমাৰত ৭.৭ প্ৰাবল্যৰ ভূমিকম্প সংঘটিত হৈছিল ।
ইয়াৰ পিছত ৬.৪ তীব্ৰতাৰ কঁপনি অনুভূত হয় । মাটিৰ পৰা ১০ কিলোমিটাৰ তলত, মাণ্ডলে আৰু ছাগেং চহৰৰ সীমান্তত এই ভূমিকম্পৰ কেন্দ্ৰবিন্দু আছিল । ভূমিকম্পৰ ফলত আন্তঃগাঁথনি, পথ আৰু আৱাসগৃহৰ ব্যাপক ক্ষতিসাধন হয় । ভূমিকম্পৰ কম্পন কেৱল ম্যানমাৰতে নহয়, চুবুৰীয়া দেশতো অনুভৱ হৈছিল । থাইলেণ্ডৰ চিয়াং মাই চহৰতো এই ভূমিকম্পৰ ফলত যথেষ্ট ক্ষতিসাধন হয় ।
