আজি ইণ্ডিয়ান প্ৰিমিয়াৰ লীগ (আই পি এল) ২০২৫ৰ ২০ সংখ্যক মেচত মুখামুখি হ’ব শক্তিশালী মুম্বাই ইণ্ডিয়ানছ (এম আই) আৰু ৰয়েল চেলেঞ্জাৰছ বেংগালুৰু (আৰ চি বি) । দুয়োটা দলৰ মাজত এই খেলখন ভাৰতীয় সময় অনুসৰি সন্ধিয়া ৭.৩০ বজাৰ পৰা মুম্বাইৰ ৱাংখেড়ে ষ্টেডিয়ামত অনুষ্ঠিত হ’ব । এই মেচত হাৰ্দিক পাণ্ডিয়াই মুম্বাই ইণ্ডিয়ানছৰ অধিনায়ক হিচাপে খেলিব, আনহাতে আৰ চি বি দলৰ দায়িত্বত আছে ৰজত পাটিদাৰ ।

বুমৰাহৰ প্ৰত্যাৱৰ্তন নিশ্চিত !

চলিত ছিজনত এই পৰ্যন্ত ৩ খন খেলৰ ভিতৰত ২ খন খেলত জয়লাভ কৰিছে ৰয়েল চেলেঞ্জাৰছ বেংগালুৰুৱে । এতিয়া গুজৰাট টাইটানছ (জি টি)ৰ বিৰুদ্ধে শেষৰখন খেলত হোৱা পৰাজয় পাহৰি দুৰ্দান্ত প্ৰত্যাৱৰ্তনৰ চেষ্টা চলাব আৰ চি বিয়ে । আনহাতে, মুম্বাই ইণ্ডিয়ানছে এই পৰ্যন্ত চাৰিখন খেলৰ ভিতৰত মাত্ৰ এখন খেলত জয়লাভ কৰিছে । ৱাংখেড়ে ষ্টেডিয়ামত কলকাতা নাইট ৰাইডাৰ্ছ (কে কে আৰ)ৰ বিৰুদ্ধে মুম্বাইৰ একমাত্ৰ জয় আৰু দলটোৰ খেলুৱৈসকলে এই মেচখনৰ পৰা প্ৰেৰণা ল’বলৈ চেষ্টা কৰিব ।

যদি মুম্বাই ইণ্ডিয়ানে নিজৰ অভিযানক পুনৰ জয়ৰ পথলৈ আনিব বিচাৰে, তেন্তে তেওঁলোকৰ বেটছমেনসকলে ভাল প্ৰদৰ্শন কৰিব লাগিব । মুম্বাইৰ ফালৰ পৰা সামগ্ৰিকভাৱে ভাল প্ৰদৰ্শন কৰিবলৈ সক্ষম হৈছে কেৱল সূৰ্যকুমাৰ যাদৱ আৰু ৰিয়ান ৰিকেলটনে । দলৰ প্ৰাক্তন অধিনায়ক ৰোহিত শৰ্মাই এতিয়াও বিশেষ অৱদান আগবঢ়াব পৰা নাই । মিডল অৰ্ডাৰ বেটছমেন তিলক বাৰ্মায়ো নিজৰ ভাল আৰম্ভণিক ডাঙৰ স্ক’ৰলৈ ৰূপান্তৰিত কৰিব পৰা নাই । আঁঠুৰ আঘাতৰ বাবে লক্ষ্ণৌ ছুপাৰ জায়েন্টছৰ বিৰুদ্ধে অন্তিমখন খেল খেলিব নোৱাৰিলে ৰোহিতে । ৰোহিতক এতিয়া আজিৰ মেচত খেলা দেখা যাব পাৰে । ইয়াৰ ইংগিত দিছে দলৰ মুখ্য প্ৰশিক্ষক মহেলা জয়ৱৰ্ধনে ।

মুম্বাই ইণ্ডিয়ানছৰ বলিং বিভাগেও বিশেষ প্ৰদৰ্শন কৰিব পৰা নাই । লক্ষ্ণৌ ছুপাৰ জায়েন্টছৰ বিৰুদ্ধে অধিনায়ক হাৰ্দিক পাণ্ডিয়াই পাঁচ উইকেট দখল কৰাৰ পাছতো মুম্বাইৰ বলাৰসকলে ৰানৰ প্ৰবাহ বন্ধ কৰিব নোৱাৰিলে । ইয়াৰ পিছত তেওঁলোকৰ বেটছমেনসকল লক্ষ্যত উপনীত হ’ব নোৱাৰিলে । মুম্বাইৰ বাবে ভাল খবৰটো হ’ল আৰ চি বিৰ বিৰুদ্ধে খেলখনৰ পূৰ্বে দলটোত যোগদান কৰিছে ইয়াৰ মূল বেগী বলাৰ যশপ্ৰীত বুমৰাহে । এই মেচত বুমৰাহ বাছনিৰ বাবে উপলব্ধ হৈছে ।

কোহলীৰ পৰা ডাঙৰ ইনিংছৰ সম্ভাৱনা-

ৰয়েল চেলেঞ্জাৰছ বাংগালুৰুৰ ক্ষেত্ৰত মুম্বাইৰ বেটিঙৰ দুৰ্বলতাৰ সুযোগ ল’বলৈ চেষ্টা কৰিব দলটোৱে । কে কে আৰৰ বিৰুদ্ধে ৫৯ ৰান সংগ্ৰহ কৰাৰ পাছত আশানুৰূপ অৱদান আগবঢ়াব নোৱাৰা তাৰকা বেটছমেন বিৰাট কোহলীৰ পৰা ভাল প্ৰদৰ্শনৰ আশা কৰিব দলটোৱে । আৰ চি বিৰ ফিল ছল্ট আৰু দেৱদত্ত পাডিক্কালৰ দৰে বেটছমেন আছে, যিয়ে দলটোক আগ্ৰাসী ৰূপ প্ৰদান কৰে ।

অধিনায়ক ৰজত পাটিদাৰো ডাঙৰ ডাঙৰ শ্বট খেলাত পাকৈত । অষ্ট্ৰেলিয়াৰ টিম ডেভিদে অন্তিম অভাৰত ভাল বেটিং কৰিছে যিটো দলৰ বাবে ভাল লক্ষণ । জোছ হেজলউড আৰু ভুৱনেশ্বৰ কুমাৰৰ ৰূপত তীব্ৰ বেগী বলিং আক্রমণ আছে যদিও ইয়াৰ স্পীনাৰসকলে এতিয়াও ভাল প্রদর্শন কৰিব পৰা নাই ৷

মুম্বাই ইণ্ডিয়ানছৰ সম্ভাৱ্য মূল একাদশ :

ৰিয়ান ৰিকেলটন (উইকেটকীপাৰ), ৰোহিত শৰ্মা, উইল জেকছ, সূৰ্যকুমাৰ যাদৱ, তিলক বাৰ্মা, হাৰ্দিক পাণ্ডিয়া (অধিনায়ক), মিচেল ছেণ্টনাৰ, যশপ্ৰীত বুমৰাহ, ভিগনেশ পুথুৰ, ট্ৰেণ্ট ব’ল্ট, দীপক চহৰ ।

ৰয়েল চেলেঞ্জাৰছ বেংগালুৰুৰ সম্ভাৱ্য মূল একাদশ :

ফিল ছল্ট, বিৰাট কোহলী, দেৱদত্ত পডিক্কাল, ৰজত পাটিদাৰ (অধিনায়ক), লিয়াম লিভিংষ্টন, জিতেশ শৰ্মা (উইকেটকীপাৰ), টিম ডেভিদ, ক্ৰুনাল পাণ্ডিয়া, যশ দয়াল, জোছ হেজলউড, ভুৱনেশ্বৰ কুমাৰ ।

বুধবাৰে আই পি এল ২০২৫ৰ চতুৰ্দশ মেচত ৰয়েল চেলেঞ্জাৰ্ছ বেংগালুৰু (আৰ চি বি) আৰু গুজৰাট টাইটানছৰ মাজত অনুষ্ঠিত হ’ব । আৰ চি বিয়ে নিজৰ ঘৰুৱা খেলপথাৰত এই ছিজনৰ প্ৰথমখন মেচ খেলিব । তেওঁলোকৰ লক্ষ্য হ’ব বলাৰৰ উৎকৃষ্ট ফৰ্মৰ ভিত্তিত জয়ৰ হেট্ৰিক অৰ্জন কৰা । আজি (২ এপ্ৰিল) সন্ধিয়া ৭.৩০ বজাৰ পৰা বেংগালুৰুৰ এম চিন্নস্বামী ষ্টেডিয়ামত আৰম্ভ হ’ব এই মেচখন ।

ইডেন গাৰ্ডেনছত কলকাতা আৰু চেপাউকত চেন্নাই ছুপাৰ কিংছ (চি এছ কে)ক পৰাস্ত কৰি আৰ চি বিয়ে এক সুন্দৰ আৰম্ভণি কৰিছে । গুজৰাটৰ দলটোৱে এতিয়ালৈকে দুয়োখন উদ্বোধনী মেচ নিজৰ ঘৰুৱা খেলপথাৰত খেলিছে । প্ৰথমখন খেলত পঞ্জাব কিংছৰ হাতত পৰাস্ত হোৱাৰ বিপৰীতে দ্বিতীয়খন মেচত মুম্বাই ইণ্ডিয়ানছক পৰাস্ত কৰে দলটোৱে ।

এতিয়ালৈকে আই পি এলত আৰ চি বি আৰু গুজৰাটৰ মাজত ৫ খন মেচ অনুষ্ঠিত হৈছে । এই সময়ছোৱাত আৰ চি বিয়ে ৩ খন মেচত জয়লাভ কৰাৰ বিপৰীতে গুজৰাটে ২ খন মেচত জয়লাভ কৰিছে ।

অৱশ্যে চিন্নস্বামী ষ্টেডিয়ামৰ খেলপথাৰ বেটছমেনৰ বাবে সহায়ক আৰু ইয়াত তিনিবাৰকৈ ২৬০ৰো অধিক স্ক’ৰ হৈছে । চুটি বাউণ্ডেৰী আৰু দ্ৰুত আউটফিল্ডে বলাৰসকলক সদায় অসুবিধা দি আহিছে যদিও ৰয়েল চেলেঞ্জাৰছৰ মতে ইয়াৰ দুজন বলাৰ জোছ হেজলউড আৰু ভুৱনেশ্বৰ কুমাৰে বেটছমেনক ৰোধ কৰিব পাৰে ।

চলিত আই পি এলত হেজলউডে ৬তকৈ কম ইকনমি ৰেটত ৰান দিয়াৰ বিপৰীতে চেন্নাইৰ বিৰুদ্ধে খেলখনত ভুৱনেশ্বৰে প্ৰতি অভাৰত গড়ে মাত্ৰ ৬.৬ ইকনমিৰে ৰান দিছিল ।

গুজৰাট টাইটানছৰো অতি সক্ষম বেটছমেন আছে । অধিনায়ক শুভমন গীল আৰু সাই সুদৰ্শনে ভাল অ’পেনিং যুটি গঠন কৰিছে । আৰ চি বিয়ে তেওঁলোকক আৰম্ভণিতে ৰোধিবলৈ চেষ্টা কৰিব ।

নতুন বল চুইং কৰিব পৰাৰ ক্ষমতাৰে ভুৱনেশ্বৰ আৰু সঠিক বলিঙৰ দক্ষতাৰে হেজলউডে একেলগে তেওঁলোকৰ বাবে সমস্যাৰ সৃষ্টি কৰিব পাৰে । বাওঁহাতৰ বেগী বলাৰ য়শ দয়ালো উপযোগী বুলি প্ৰমাণিত হৈছে ।

স্পীন বিভাগত ক্ৰুনাল পাণ্ডিয়া আৰু সুয়াশ শৰ্মাক দুৰ্বল দেখা গৈছে, আনহাতে গুজৰাটত ৰছিদ খান আৰু আৰ চাই কিশোৰৰ দৰে বিপজ্জনক স্পীনাৰ আছে ।

এনে পৰিস্থিতিত স্পীনাৰৰ সন্মুখত বিৰাট কোহলী, ফিল ছল্ট, অধিনায়ক ৰজত পাটিদাৰ আৰু দেৱদত্ত পাদিক্কালৰ প্ৰকৃত পৰীক্ষা হ’ব । গুজৰাটত আছে কাগিছ’ ৰাবাদা আৰু মহম্মদ ছিৰাজৰ দৰে বেগী বলাৰ । পূৰ্বে আৰ চি বিৰ হৈ খেলা ছিৰাজক নিলামত ক্ৰয় কৰিছিল গুজৰাটে ।

কোহলী আৰু ছল্টে যোৱা দুখন মেচত ৯৫ আৰু ৪৫ ৰানৰ অংশীদাৰিত্ব গঢ়ি তুলিছে । চিন্নাস্বামী ষ্টেডিয়ামত দুয়োজন বিপদজনক হৈ উঠিব পাৰে ।

আৰ চি বিৰ সম্ভাৱ্য মূল একাদশ : ফিল ছল্ট (উইকেটকীপাৰ), বিৰাট কোহলী, টিম ডেভিদ, জিতেশ শৰ্মা, ৰজত পাটিদাৰ (অধিনায়ক), দেৱদত্ত পাদিক্কাল, লিয়াম লিভিংষ্টন, ক্ৰুনাল পাণ্ডিয়া, য়শ দয়াল, জোছ হেজলউড, ভুৱনেশ্বৰ কুমাৰ ।

গুজৰাট টাইটানছৰ সম্ভাব্য মূল একাদশ : জোছ বাটলাৰ (উইকেটকীপাৰ), শুভমন গীল (অধিনায়ক), ছাই সুদৰ্শন, শ্বাৰফেন ৰাদাৰফোৰ্ড, শ্বাহৰুখ খান, ৰছিদ খান, ৰাহুল টেৱাটিয়া, চাই কিশোৰ, কাগিছো ৰাবাদা, প্ৰসিদ্ধ কৃষ্ণ, মহম্মদ চিৰাজ ।

পাকিস্তানে আয়োজন কৰা আই চি চি চেম্পিয়নছ ট্ৰফী ২০২৫ত ভাৰতীয় দল আৰু খেলুৱৈসকলে বিস্ফোৰক প্ৰদৰ্শন আগবঢ়াইছিল । ৯ মাৰ্চত ডুবাইত অনুষ্ঠিত চূড়ান্ত খেলখনত ভাৰতীয় দলটোৱে নিউজীলেণ্ডক ৪ উইকেটত পৰাস্ত কৰি তৃতীয়বাৰৰ বাবে খিতাপ দখল কৰে । ইয়াৰ পিছত এতিয়া আন্তঃৰাষ্ট্ৰীয় ক্ৰিকেট পৰিষদে বুধবাৰে (১২ মাৰ্চ) খেলুৱৈৰ শেহতীয়া ৰেংকিং প্ৰকাশ কৰিছে ।

ভাৰতীয় দলৰ তাৰকা স্পীনাৰ কুলদীপ যাদৱ আৰু ৰবীন্দ্ৰ জাডেজাই আই চি চিৰ এদিনীয়া বলিং ৰেংকিঙত আলোড়নৰ সৃষ্টি কৰিছে । চেম্পিয়নছ ট্ৰফীত দুয়োজনে শক্তিশালী প্ৰদৰ্শন আগবঢ়াইছিল, যাৰ বাবে তেওঁলোক লাভান্বিত হৈছে ।

বলিং ৰেংকিঙৰ শীৰ্ষ দহটা স্থানত স্থান লাভ জাডেজাৰ-

কুলদীপ আৰু জাডেজাই ৩টাকৈ স্থান আগবাঢ়িছে । কুলদীপে তৃতীয় স্থান দখল কৰিছে । আনহাতে জাডেজাই শীৰ্ষ দহৰ ভিতৰত প্ৰৱেশ কৰিছে । এতিয়া তেওঁ ১০ নম্বৰত উপনীত হৈছে । শীৰ্ষ দহজন বলাৰৰ ভিতৰত আছে এই দুজন ভাৰতীয় । আনহাতে শ্ৰীলংকাৰ মহীশ তীক্ষ্ণনা শীৰ্ষত আছে ।

এতিয়াও শীৰ্ষস্থান দখল কৰি আছে শুভমন গীলে-

আনহাতে, এদিনীয়া বেটিং ৰেংকিঙত শীৰ্ষত আছে ভাৰতীয় অ’পেনাৰ শুভমন গীল । দ্বিতীয় স্থানত আছে পাকিস্তানৰ প্ৰাক্তন অধিনায়ক বাবৰ আজম । অৱশ্যে ভাৰতীয় অধিনায়ক ৰোহিত শৰ্মাই দুটা স্থান আগবাঢ়িছে । তেওঁ এতিয়া তৃতীয় স্থানত উপনীত হৈছে ।

আনহাতে বিৰাট কোহলীয়ে এটা স্থান অৱনমিত হৈছে । এতিয়া তেওঁ পঞ্চন স্থান লাভ কৰিছে । এদিনীয়া বেটিং ৰেংকিঙৰ শীৰ্ষ দহটা স্থানত আছে মাত্ৰ চাৰিজন ভাৰতীয় । গীল, কোহলী আৰু ৰোহিতৰ বাহিৰেও চতুৰ্থ ভাৰতীয় খেলুৱৈ হৈছে অষ্টম স্থানত থকা শ্ৰেয়াছ আয়াৰ ।

চেম্পিয়নছ ট্ৰফী ২০২৫ৰ সৰ্বাধিক ৰান সংগ্ৰহকাৰী নিউজীলেণ্ডৰ ৰচিন ৰবিন্দ্ৰই চতুৰ্দশ স্থান লাভ কৰিছে । এতিয়া তেওঁ এদিনীয়া বেটিং ৰেংকিঙত ১৪ নম্বৰ স্থান দখল কৰিছে । ফাইনেলত ভাৰতৰ হাতত পৰাস্ত হোৱা কিৱি দলৰ ডেৰিল মিচেল শীৰ্ষ দহৰ ভিতৰত থকা একমাত্ৰ বেটছমেন । এটা পজিচন জপিয়াই ষষ্ঠ স্থানত উপনীত হৈছে তেওঁ ।

আই পি এলৰ ইতিহাসত কোনজন বেটছমেনে দ্ৰুততম শতক অৰ্জন কৰিছে জানেনে ? এই তালিকাৰ শীৰ্ষ ৫ বেটছমেনৰ নাম কাৰ ?  লগতে এই তালিকাত ৰয়েল চেলেঞ্জাৰছ বেংগালুৰুৰ বিৰাট কোহলী কিমান নম্বৰত আছে ?  আচলতে আই পি এলৰ ইতিহাসত দ্ৰুততম শতক অৰ্জন কৰাৰ অভিলেখ ক্ৰীছ গেইলৰ নামত আছে । আই পি এল ২০১৩ ছিজনত পুনে ৱাৰিয়ৰ্ছৰ বিৰুদ্ধে মাত্ৰ ৩০টা বলত শতক অৰ্জন কৰিছিল ক্ৰীছ গেইলে । একে সময়তে ক্ৰীছ গেইলৰ পিছত এই তালিকাত দ্বিতীয় স্থানত আছে ইউছুফ পাঠান ।

এই বেটছমেনসকলে আই পি এল মেচত দ্ৰুততম শতক অৰ্জন কৰিছে-

আই পি এলত মাত্ৰ ৩৭টা বলত শতক অৰ্জন কৰাৰ কৃতিত্ব অৰ্জন কৰিছে ইউছুফ পাঠানে । আই পি এল ২০১০ ছিজনত মুম্বাই ইণ্ডিয়ানছৰ বিৰুদ্ধে তেওঁ এই কৃতিত্ব অৰ্জন কৰিছিল । সেই সময়ত ইউছুফ পাঠান ৰাজস্থান ৰয়েলছ দলৰ অংশ আছিল । ক্ৰীছ গেইল আৰু ইউছুফ পাঠানৰ পিছত তৃতীয় স্থানত আছে ডেভিদ মিলাৰ । আই পি এল ২০১৩ ছিজনত ৰয়েল চেলেঞ্জাৰছ বেংগালুৰুৰ বিৰুদ্ধে ৩৮টা বলত শতক অৰ্জন কৰিছিল ডেভিদ মিলাৰে । আই পি এলৰ ইতিহাসত এয়া তৃতীয় দ্ৰুততম শতক । সেই সময়ত ডেভিদ মিলাৰ পঞ্জাব কিংছৰ অংশ আছিল ।

তালিকাত ক’ত আছে বিৰাট কোহলী ?

এই খেলুৱৈসকলৰ পিছতে ছানৰাইজাৰ্ছ হায়দৰাবাদৰ ট্ৰেভিছ হেডৰ নাম আছে । যোৱা ছিজনত ট্ৰেভিছ হেডে ৩৯টা বলত শতক অৰ্জন কৰিছিল । আই পি এলৰ ইতিহাসত চতুৰ্থটো দ্ৰুততম শতক । কিন্তু কিমান নম্বৰত আছে ৰয়েল চেলেঞ্জাৰছ বাংগালুৰুৰ বেটছমেন বিৰাট কোহলী ?  আই পি এলৰ ইতিহাসত দ্ৰুততম শতক অৰ্জন কৰিবলৈ বিৰাট কোহলীয়ে কিমান বলৰ সন্মুখীন হৈছে ?  দৰাচলতে আই পি এলৰ ইতিহাসত বিৰাট কোহলীৰ আটাইতকৈ দ্ৰুততম শতক ৫৩ টা বলত অৰ্জন কৰিছে । ২০১৬ চনৰ আই পি এলত এই কৃতিত্ব অৰ্জন কৰিছিল বিৰাট কোহলীয়ে । এনেদৰে আই পি এলৰ মেচত দ্ৰুততম শতক অৰ্জন কৰা বেটছমেনৰ তালিকাত বিৰাট কোহলীৰ নাম বহু তলত আছে ।

নিউজীলেণ্ডক ৪ উইকেটত পৰাস্ত কৰি তৃতীয়বাৰৰ বাবে আই চি চি চেম্পিয়নছ ট্ৰফী ২০২৫ জয় কৰিবলৈ সক্ষম হৈছে ভাৰত । ৭৬ ৰানৰ ৰাজকীয় ইনিংছ খেলা অধিনায়ক ৰোহিত শৰ্মাক ‘মেন অৱ দ্য মেচ’ হিচাপে নিৰ্বাচিত কৰা হয় । কুলদীপ যাদৱ আৰু বৰুণ চক্ৰৱৰ্তীয়ে শক্তিশালী বলিং কৰে । কঠিন সময়ত দলটোক জয়ৰ দিশে আগুৱাই লৈ যায় কে এল ৰাহুলে । এই জয়েৰে ভাৰত তিনিবাৰকৈ চেম্পিয়নছ ট্ৰফী জয় কৰা প্ৰথমখন দেশ হিচাপে পৰিগণিত হৈছে । ইয়াৰ পূৰ্বে ২০০২ আৰু ২০১৩ চনত ভাৰতে এই ট্ৰফী লাভ কৰিছিল ।

ছামীৰ মাতৃৰ চৰণ স্পৰ্শ কৰিলে কোহলীয়ে-

এই ঐতিহাসিক জয়ৰ পিছত টিম ইণ্ডিয়াৰ তাৰকা বেটছমেন বিৰাট কোহলীৰ এটা ভিডিঅ’ ছ’চিয়েল মিডিয়াত ভাইৰেল হৈ পৰিছে । এই ভিডিঅ’টোত কোহলীয়ে মহম্মদ ছামীৰ মাতৃক চৰণ স্পৰ্শ কৰি আশীৰ্বাদ লোৱা দেখা গৈছে । এই ভিডিঅ’টোত মহম্মদ ছামীয়ে মাতৃক লৈ বিৰাট কোহলীক লগ কৰিবলৈ যোৱা দেখা গৈছে । ছামীৰ মাতৃক দেখি কোহলী অত্যন্ত সুখী আৰু অলপ আৱেগিক হৈ পৰিল । তেওঁ ছামীৰ মাতৃৰ ভৰি চুই তেওঁৰ আশীৰ্বাদ লয় আৰু তাৰ পিছত দুয়োজনে ইজনে সিজনক আঁকোৱালি লয় ।

চেম্পিয়নছ ট্ৰফী ২০২৫ত বিৰাট কোহলীয়ে শক্তিশালী প্ৰদৰ্শন কৰিছিল । অৱশ্যে অন্তিম মেচখনত তেওঁ ৰান সংগ্ৰহত ব্যৰ্থ হয় আৰু মাত্ৰ ১ ৰান কৰি আউট হয় । পাকিস্তানৰ বিৰুদ্ধে খেলখনত তেওঁ শতক অৰ্জন কৰে । অষ্ট্ৰেলিয়াৰ বিৰুদ্ধে ছেমি ফাইনেলতো অৰ্ধশতক অৰ্জন কৰে বিৰাটে । এই প্ৰতিযোগিতাত ৫খন মেচত বিৰাটে গড়ে ৫৪ ৰান কৰি ২১৮ ৰান সংগ্ৰহ কৰে । সৰ্বাধিক ৰান সংগ্ৰহ কৰা বেটছমেনৰ তালিকাত তেওঁ ৫ম স্থানত থাকে ।

ইফালে চেম্পিয়নছ ট্ৰফী ২০২৫ত ভাৰতৰ বাবে মহম্মদ ছামী অতি গুৰুত্বপূৰ্ণ বুলি প্ৰমাণিত হয় । টিম ইণ্ডিয়াৰ হৈ ৫ খন মেচত তেওঁ ৯ টা উইকেট দখল কৰে । ছামীয়ে মুঠ ৪১ অভাৰ বলিং কৰে । এই সময়ছোৱাত ২৩৩ ৰান দিয়ে তেওঁ । ভাৰতৰ হৈ সৰ্বাধিক উইকেট লোৱাৰ ক্ষেত্ৰত ছামীয যৌথভাৱে প্ৰথম স্থানত থাকে । বৰুণ চক্ৰৱৰ্তীয়ে ৩খন মেচত ৯টা উইকেট দখল কৰে ।

দেওবাৰে (৯ মাৰ্চ) ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত অনুষ্ঠিত হ’ব আই চি চি চেম্পিয়নছ ট্ৰফী ২০২৫ৰ চূড়ান্ত মেচ । এই খিতাপ মেচত ভাৰতীয় দলে নিউজীলেণ্ডৰ বিৰুদ্ধে খেলিব । এই ফাইনেলৰ মাত্ৰ এদিন পূৰ্বে ভাৰতীয় অনুৰাগীৰ বাবে এক দুঃখবৰ খবৰ প্ৰকাশ পাইছে ।

ভাৰতৰ প্ৰাক্তন অধিনায়ক বিৰাট কোহলী আঘাতপ্ৰাপ্ত হৈছে । এই দাবী কৰিছে পাকিস্তানী ৱেবছাইট জিঅ’ নিউজে । ৱেবছাইটটোৱে প্ৰতিবেদনত কয় যে অনুশীলনৰ সময়ত কোহলী আঘাতপ্ৰাপ্ত হয় । বলটোৱে তেওঁৰ আঁঠুৰ ওচৰত খুন্দা মাৰে । ইয়াৰ পিছত ইমানেই কষ্ট হৈছিল যে কোহলীয়ে নিজৰ অনুশীলন বন্ধ কৰিব লগা হয় ।

আঘাতৰ পিছত অনুশীলন বন্ধ কৰি দিলে কোহলীয়ে-

আঘাত পোৱাৰ লগে লগে ভাৰতীয় দলৰ ফিজিঅ’ই কোহলীক চিকিৎসা কৰি স্প্ৰে’ লগাই বেণ্ডেজ লগাই দিয়ে । অৱশ্যে দল পৰিচালনাই নিশ্চিত কৰিছে যে কোনো চিন্তাৰ কাৰণ নাই । ফাইনেল মেচত খেলিবলৈ উপযুক্ত কোহলী ।

যদিও আঘাতৰ পিছত হয়তো কোহলীয়ে অনুশীলন বন্ধ কৰি দিছিল, তথাপিও খেলপথাৰ এৰি যোৱা নাছিল । এই সময়ছোৱাত কোহলীয়ে কেৱল আন খেলুৱৈসকলে অনুশীলন কৰা চাই আছিল । কোহলীৰ বাবে ফাইনেলত দলত থকাটো অতি জৰুৰী, কাৰণ এই মুহূৰ্তত তেওঁ ভাল ফৰ্মত আছে । ইফালে সম্প্ৰচাৰক চেনেলটোৱে এটা ভিডিঅ’ শ্বেয়াৰ কৰিছে য’ত কোহলীয়ে অনুৰাগীসকলক আহি ফাইনেল চাবলৈ আহ্বান জনাইছে ।

ক্ৰীছ গেইলৰ অভিলেখ ভংগ কৰিব পাৰে কোহলীয়ে-

ইতিমধ্যে কোহলীয়ে ৰান চেজ কৰি ৮ হাজাৰৰো অধিক ৰানৰ সীমা অতিক্ৰম কৰিছে । যদি এই ফাইনেলত তেওঁৰ বেটে কাম কৰে আৰু তেওঁ ৪৬ ৰান কৰে, তেন্তে তেওঁ এক অভিলেখ গঢ়িব পাৰে । ইয়াৰ পিছত তেওঁ এই প্ৰতিযোগিতাত ক্ৰীছ গেইলক অতিক্ৰম কৰিব পাৰে । কোহলীয়ে এইবাৰ চেম্পিয়নছ ট্ৰফীত পাকিস্তান (১০০*) আৰু অষ্ট্ৰেলিয়া (৮৪)ৰ বিৰুদ্ধে ইনিংছ খেলিছে আৰু তেওঁ অতি সুন্দৰ ফৰ্মত আছে ।

চেম্পিয়নছ ট্ৰফীত কোহলীয়ে ১৭খন খেলত ৭৪৬ ৰান সংগ্ৰহ কৰিছে । যিটো ভাৰতীয় যিকোনো বেটছমেনৰ দ্বাৰা সৰ্বাধিক । মুঠতে এতিয়া মাত্ৰ ক্ৰীছ গেইলহে আগবাঢ়ি আছে, যিয়ে ১৭খন মেচত ৭৯১ ৰান সংগ্ৰহ কৰিছে । অৰ্থাৎ ফাইনেলত ৪৬ ৰান সংগ্ৰহ কৰাৰ লগে লগে কোহলীয়ে ক্ৰীছ গেইলৰ অভিলেখ ভংগ কৰিব । এই তালিকাৰ তৃতীয় স্থানত আছে ২২খন মেচত ৭৪২ ৰান সংগ্ৰহ কৰা মহেলা জয়ৱৰ্ধন ।