ৰাষ্ট্ৰপতিক অপমান কৰি টিএমচিয়ে সকলো সীমা অতিক্ৰম কৰিলেঃ মমতা চৰকাৰক তীক্ষ্ণ সমালোচনা প্ৰধানমন্ত্ৰী মোদীৰ
প্ৰধানমন্ত্ৰী নৰেন্দ্ৰ মোদীয়ে তৃণমূল কংগ্ৰেছ চৰকাৰক লক্ষ্য কৰি কয় যে ৰাষ্ট্ৰপতিৰ প্ৰতি যি ব্যৱহাৰ কৰা হৈছে সেয়া অত্যন্ত লজ্জাজনক
ৰাষ্ট্ৰপতি দ্ৰৌপদী মুৰ্মুৰ এক অনুষ্ঠানৰ প্ৰট’কল বিতৰ্কক লৈ পশ্চিম বংগত ৰাজনীতি তীব্ৰতৰ হৈ পৰিছে । প্ৰধানমন্ত্ৰী নৰেন্দ্ৰ মোদীয়ে এই বিষয়ত তৃণমূল কংগ্ৰেছ চৰকাৰক লক্ষ্য কৰি কয় যে ৰাষ্ট্ৰপতিৰ প্ৰতি যি ব্যৱহাৰ কৰা হৈছে সেয়া অত্যন্ত লজ্জাজনক । প্ৰধানমন্ত্ৰী মোদীয়ে ছ’চিয়েল মিডিয়াত লিখিছে যে যিয়েই গণতন্ত্ৰ আৰু জনজাতীয় সমাজৰ সবলীকৰণত বিশ্বাস কৰে তেওঁ এই ঘটনাত দুখী ।
প্ৰধানমন্ত্ৰী মোদীয়ে নিজৰ টুইটত লিখিছে, “এয়া এক অতি লজ্জাজনক ঘটনা । গণতন্ত্ৰ আৰু জনজাতীয় সম্প্ৰদায়ৰ সবলীকৰণত বিশ্বাসীসকল ইয়াৰ দ্বাৰা আঘাতপ্ৰাপ্ত আৰু হতাশ হৈছে । নিজেই জনজাতীয় সম্প্ৰদায়ৰ পৰা অহা ৰাষ্ট্ৰপতিগৰাকীয়ে প্ৰকাশ কৰা যন্ত্ৰণা আৰু দুখে দেশৰ জনসাধাৰণক গভীৰভাৱে দুখী কৰি তুলিছে ।”
প্ৰধানমন্ত্ৰীয়ে কয়, “এই বিষয়ত পশ্চিম বংগৰ টিএমচি চৰকাৰে সকলো সীমা অতিক্ৰম কৰিছে । ৰাষ্ট্ৰপতিৰ এই অপমানৰ বাবে ৰাজ্য প্ৰশাসন দায়ী । পশ্চিম বংগ চৰকাৰে সন্থাল সংস্কৃতিৰ দৰে ইমান গুৰুত্বপূৰ্ণ বিষয় এটা ইমান আকস্মিকভাৱে চম্ভালি লোৱাটোও দুৰ্ভাগ্যজনক ।” তেওঁ লগতে কয়, “ৰাষ্ট্ৰপতিৰ কাৰ্যালয় ৰাজনীতিৰ ওপৰত আৰু এই পদৰ মৰ্যাদাক সদায় সন্মান কৰিব লাগিব । আশা কৰা হৈছে যে পশ্চিম বংগ চৰকাৰ আৰু টিএমচিয়ে এই বিষয়ত বুদ্ধিমানৰ কাম কৰিব ।”
উল্লেখ্য যে, নৱম আন্তঃৰাষ্ট্ৰীয় সন্থাল সন্মিলনত অংশগ্ৰহণ কৰিবলৈ পশ্চিম বংগৰ শিলিগুৰি মহাকুমা পৰিষদৰ ফানচিদেৱা অঞ্চলত উপস্থিত হৈছিল ৰাষ্ট্ৰপতি দ্ৰৌপদী মুৰ্মু । প্ৰতিষ্ঠিত প্ৰট’কল অনুসৰি তেওঁক আদৰণি জনাবলৈ মুখ্যমন্ত্ৰী বা কোনো ৰাজ্যিক মন্ত্ৰী উপস্থিত নথকাত ৰাষ্ট্ৰপতিগৰাকীয়ে অসন্তুষ্টি আৰু দুখ প্ৰকাশ কৰে । অৱশ্যে তেওঁ ব্যক্তিগতভাৱে এই কথাত কোনো আপত্তি নাই বুলি উল্লেখ কৰে ।
অনুষ্ঠানৰ অন্তত তেওঁ সন্মিলনৰ বাবে নিৰ্বাচিত স্থানক লৈয়ো অসন্তুষ্টি প্ৰকাশ কৰে । ৰাষ্ট্ৰপতিয়ে উল্লেখ কৰে যে সভাস্থলী অতি সৰু হোৱাৰ বাবে বৃহৎ সংখ্যক সন্থাল সম্প্ৰদায়ৰ লোক উপস্থিত থাকিব নোৱাৰিলে । তেওঁ কয় যে সভাস্থলীত আনকি পাঁচ হাজাৰ লোকৰ বাবেও পৰ্যাপ্ত ঠাইৰ অভাৱ ।
লগতে পঢ়ক : “বংগ দুৰ্বল হ’লে আমি দিল্লী চৰকাৰক উফৰাই দিম”; বিজেপিক তীক্ষ্ণ সমালোচনা মমতা বেনাৰ্জীৰ