পশ্চিম বংগত পুনৰ ৰক্তপাত, শুভেন্দু অধিকাৰীৰ পিএ-ক হত্যা
বুধবাৰে বিয়লি শুভেন্দু অধিকাৰীৰ ব্যক্তিগত সহায়ক চন্দ্ৰনাথ ৰথক দুষ্কৃতিকাৰীয়ে গুলীয়াই হত্যা কৰে
পশ্চিম বংগত এক ভয়ংকৰ তথা চাঞ্চল্যকৰ হত্যাকাণ্ডৰ ঘটনা পোহৰলৈ আহিছে । বুধবাৰে বিয়লি বিজেপিৰ জ্যেষ্ঠ নেতা শুভেন্দু অধিকাৰীৰ ব্যক্তিগত সহায়ক (PA) চন্দ্ৰনাথ ৰথক দুষ্কৃতিকাৰীয়ে গুলীয়াই হত্যা কৰে । উত্তৰ ২৪ পৰগণা জিলাৰ মধ্যগ্ৰাম অঞ্চলত এই লোমহৰ্ষক কাণ্ডটো সংঘটিত হৈছে ।
তথ্য অনুসৰি, চন্দ্ৰনাথ ৰথ নিজৰ বাহনেৰে গৈ থকা অৱস্থাত এখন কাৰ আৰু এখন বাইকে তেওঁক অনুসৰণ কৰিছিল । মাজপথত দুষ্কৃতিকাৰীয়ে তেওঁৰ গাড়ীখন আগুৰি ধৰে আৰু লক্ষ্য কৰি চাৰি জাইকৈ গুলী বৰ্ষণ কৰে । এই আকস্মিক গুলীচালনাত চন্দ্ৰনাথ আৰু তেওঁৰ চালকজন গুৰুতৰভাৱে আহত হয় । লগে লগে তেওঁলোকক ওচৰৰ এখন হাস্পতালত ভৰ্তি কৰা হয় যদিও চিকিৎসাধীন অৱস্থাতে চন্দ্ৰনাথ ৰথে মৃত্যুক সাৱটি লয় ।
আৰক্ষীৰ সূত্ৰই সদৰী কৰা মতে, আক্ৰমণকাৰীসকলে ব্যৱহাৰ কৰা বাইকখনত কোনো পঞ্জীয়ন নম্বৰ নাছিল । বৰ্তমান আৰক্ষীয়ে যশোহৰ ৰোডত থকা বিভিন্ন চিচিটিভি (CCTV) ফুটেজ পৰীক্ষা কৰি হত্যাকাৰীৰ সন্ধান চলাইছে । ঘটনাৰ খবৰ পোৱাৰ পিছতে শুভেন্দু অধিকাৰী নিজেই হাস্পতালত উপস্থিত হয় আৰু এই কথা নিশ্চিত কৰে ।
উল্লেখ্য যে, শেহতীয়া বিধানসভা নিৰ্বাচনত বিজেপিৰ বৃহৎ বিজয়ৰ পিছৰে পৰা ৰাজ্যখনত ৰাজনৈতিক হিংসা বৃদ্ধি পোৱা দেখা গৈছে । এই হত্যাকাণ্ডক লৈ এতিয়া তীব্ৰ ৰাজনৈতিক প্ৰতিক্ৰিয়াৰ সৃষ্টি হৈছে । বিজেপিয়ে এই ঘটনাৰ আঁৰত তৃণমূল কংগ্ৰেছৰ (TMC) হাত থকা বুলি গুৰুতৰ অভিযোগ উত্থাপন কৰিছে । নিৰ্বাচনী পৰাজয়ৰ পোতক তুলিবলৈকে এনেদৰে টাৰ্গেট কিলিং কৰা হৈছে বুলি বিজেপি নেতৃত্বই দাবী কৰিছে । বৰ্তমান সমগ্ৰ অঞ্চলটোত আৰক্ষীয়ে কটকটীয়া নিৰাপত্তা ব্যৱস্থা গঢ়ি তুলিছে ।
লগতে পঢ়ক : ‘যদি পদত্যাগ নকৰে বৰ্খাস্ত কৰা হ’ব’; মমতা বেনাৰ্জীক লৈ ড০ হিমন্ত বিশ্ব শৰ্মাৰ বিস্ফোৰক মন্তব্য