জুবিন গাৰ্গৰ সমাধিক্ষেত্ৰত গৰিমা শইকীয়া গাৰ্গ

শুকুৰবাৰে নিশা জুবিন গাৰ্গৰ সমাধিক্ষেত্ৰত উপস্থিত হ’ল পত্নী গৰিমা শইকীয়া গাৰ্গ। জুবিনৰ সমাধিক্ষেত্ৰত সেৱা লৈ কান্দি কান্দি ন্যায় বিচাৰিলে পত্নী গৰিমা শইকীয়া গাৰ্গে।

সমাধিক্ষেত্ৰত উপস্থিত অনুৰাগীৰ সৈতে কান্দি কান্দি  সমস্বৰে ‘মায়াৱিনী ৰাতিৰ বুকুত’ গালে গৰিমা শইকীয়া গাৰ্গে।সমাধিক্ষেত্ৰত আঠুকাঢ়ি হাতযোৰ কৰি সমগ্ৰ অসমবাসীলৈ আহ্বান জনালে গৰিমা শইকীয়া গাৰ্গে।

তেওঁ সকলোকে প্ৰতিদিনে সামাজিক মাধ্যমত এবাৰ হ’লেও #JusticeForZubeen লিখি ন্যায়ৰ বাবে দাবী জনাবলৈ অনুৰোধ জনায়।

তেওঁ কয় যে, জুবিনৰ লগত কি হৈছিল সেই কথা আমি জানিব লাগিব। ২২ দিন হৈ গ’ল আজিলৈকে আমি জুবিনৰ লগত কি হ’ল সেই কথা জানিব পৰা নাই।

সকলোৱে প্ৰাৰ্থনা কৰাৰ লগতে সামাজিক মাধ্যমত লিখিব। বহু ধৈৰ্যৰে আমি অপেক্ষা কৰি আছো। কিন্তু আমি ন্যায় পাবই লাগিব।    

 ইফালে সোণাপুৰত কান্দোনত ভাঙি পৰা গৰিমা গাৰ্গক অনুৰাগী তথা আৰক্ষী বিষয়াই দিলে সান্ত্বনা।সাবতি ধৰি এগৰাকী আৰক্ষী বিষয়াই গৰিমা শইকীয়া গাৰ্গক ভাগি নপৰিবলৈ আহ্বান কৰে।  

লগতে পঢ়ক: আহি পালে প্ৰাণৰ শিল্পী জুবিন গাৰ্গৰ ‘ভিছেৰা’ ৰিপ’ৰ্ট…

জুবিন গাৰ্গৰ মৃত্যুৰ ঘটনা

‘জুবিন গাৰ্গৰ ঘটনাটোৰ ন্যায় প্ৰদান কৰিবলৈ আমি বদ্ধপৰিকৰ ।‘ এই মন্তব্য মুখ্যমন্ত্ৰী ড০ হিমন্ত বিশ্ব শৰ্মাৰ । অমৃত কণ্ঠ জুবিন গাৰ্গৰ ৰহস্যজনক মৃত্যুৰ ঘটনাৰ ন্যায়ৰ দাবী চৌদিশে উত্থাপন হৈছে । ইতিমধ্যে এই ঘটনাৰ তদন্ত ক্ষীপ্ৰগতিত অব্যাহত ৰাখিছে এছ আই টিয়ে । এই ঘটনাৰ সৈতে জড়িত থকাৰ অভিযোগত গ্ৰেপ্তাৰ কৰা হৈছে জুবিন গাৰ্গৰ সম্পৰ্কীয় ভাতৃ তথা আৰক্ষী বিষয়া সন্দীপন গাৰ্গকে ধৰি কেইবাজনো লোকক । এই ঘটনাৰ অভিযোগনামা তথা শ্বাৰ্জশ্বীট কেতিয়া দাখিল কৰা হ’ব তাকে লৈয়ো চৰ্চা চলিছে । ইয়াৰ মাজতে জুবিন গাৰ্গৰ মৃত্যুৰ ঘটনাৰ অভিযোগনামা সন্দৰ্ভত বুধবাৰে তাৎপৰ্যপূৰ্ণ মন্তব্য কৰিছে মুখ্যমন্ত্ৰী হিমন্ত বিশ্ব শৰ্মাই ।

কেতিয়া দাখিল হ’ব অভিযোগনামা ?

অসমীয়াৰ হিয়াৰ আমঠু শিল্পী জুবিন গাৰ্গৰ মৃত্যুৰ ঘটনাৰ তদন্ত সন্দৰ্ভত মুখ্যমন্ত্ৰী ড০ হিমন্ত বিশ্ব শৰ্মাই কয়-“জুবিন গাৰ্গৰ ঘটনাটোৰ ন্যায় প্ৰদান কৰিবলৈ আমি বদ্ধপৰিকৰ । তাৰ পৰিপ্ৰেক্ষিতত আমি কাকো ৰেহাই নিদিওঁ । এটাৰ পিছত এটা আমি গ্ৰেপ্তাৰ কৰিছোঁ । অসম আৰক্ষীয়ে নিৰ্ধাৰিত সময় অভিযোগনামা দিবলৈয়ো সক্ষম হ’ব । তদন্ত আকাংক্ষিত হিচাবে আগবাঢ়িছে ।“

মুখ্যমন্ত্ৰীয়ে পুনৰ কয়-“ছিংগাপুৰৰ লোকসকল নহাৰ বাবে কিছু সমস্যা হৈছে । কিন্তু তেওঁলোককো কেনেকৈ আনিব পৰা যায় তাৰ ব্যৱস্থা কৰি থকা হৈছে । জুবিন গাৰ্গৰ সমগ্ৰ ঘটনাটোক অসম চৰকাৰ অত্যন্ত গুৰুত্বসহকাৰে লৈছে । নিশ্চিতভাৱে আমি ন্যায় প্ৰদান কৰিম আৰু আদালতৰ সন্মুখলৈ অভিযুক্তসকলক লৈ যাম । সাধাৰণতে আমাক তিনি মাহ সময় দিয়া হয় । তিনি মাহতকৈ বেছি সময় আমি নিবিছাৰিম । নিৰ্ধাৰিত সময়ৰ ভিতৰতে আমি অভিযোগনামা দিয়াৰ চেষ্টা কৰিম ।“ লগতে তেওঁ জুবিন গাৰ্গক নিশ্চিতভাৱে ন্যায় প্ৰদান কৰিব পাৰিব বুলিও মন্তব্য কৰে ।

ছিংগাপুৰ আৰক্ষীয়ে সহায় কৰিবঃ মুখ্যমন্ত্ৰী

মুখ্যমন্ত্ৰী ড০ শৰ্মাই কয়-“অসম আৰক্ষী ছিংগাপুৰত যাব নোৱাৰে । কোনো দেশৰ কোনো আৰক্ষী কতো যাব নোৱাৰে । কোনো দেশৰ আৰক্ষী আন এখন দেশত যাবলৈ কোনো দেশে ভিছা নিদিয়ে । ছিংগাপুৰ আৰক্ষীয়ে আামাক সহায় কৰিব বুলি আমি নিশ্চিত । অক্টোবৰ ছিংগাপুৰৰ এম্বেছাডৰক দিল্লীত সাক্ষাৎ কৰিম । ইতিমধ্যে তেওঁৱলোকে ফৰেনছিক ৰিপৰ্ট প্ৰেৰণ কৰিছে । অভিযোগনামা দাখিলৰ ক্ষেত্ৰত আমাৰ কোনো সমস্যা নহ’ব । আমি ছিংগাপুৰ আৰক্ষীৰ পৰা সম্পূৰ্ণ সহযোগিতা পাম ।“

মুখ্যমন্ত্ৰীয়ে লগতে কয়,”যেতিয়া ধৈৰ্যৰ বান্ধ সুলকি যায় তেতিয়া কোনোৱে ন্যায় নাপায় । যেতিয়া আমি পৰ্যায় ক্ৰমে কোনো ভুল নকৰাকৈ আগবাঢ়ি যাম তেতিয়া আমি ন্যায় পাম । কিন্তু আমি যদি আৱেগ আৰু ন্যায় দুয়োটাকে একলগ কৰোঁ তেন্তে আদালতৰ পৰা সকলোৱে ৰেহাই পাই যাব । আৱেগ আৱেগৰ স্থানত থাকিব । আৰক্ষীয়ে কৌশলেৰে কাম কৰিব লাগিব । আদালতত গোচৰ হাৰিলে সকলোৱে আৰক্ষীক সমালোচনা কৰিব  । উকীলসকলেও তেতিয়া দৌৰা-দৌৰি কৰাৰ বাবে কেছত হাৰিল বুলি সকলোকে ক’ব । গতিকে তদন্ত ভালকৈ হ’ব আৰু তিনিমাহৰ ভিতৰত অভিযোগনামা দাখিল কৰা হ’ব ।“

লগতে পঢ়ক : বিধায়ক অখিল গগৈৰ বিৰুদ্ধে মানহানিৰ গোচৰ ৰিণিকি ভূঞা শৰ্মাৰ