আজি সম্পন্ন হ’ল ৰৈ ৰৈ বিনালেৰ অন্তিম পৰ্যায়ৰ শ্বুটিং
কেতিয়া মুক্তি পাব ৰৈ ৰৈ বিনালে
প্ৰাণৰ শিল্পী জুবিন গাৰ্গে অসমবাসীক এৰি যোৱা আজি ১৮ টা দিন অতিক্ৰম কৰিলে । হিয়াৰ আমঠু শিল্পীগৰাকীক হেৰুৱাই এতিয়া উচুপি উঠিছে ৰাজ্যবাসী । কিন্তু কায়িকভাৱে আঁতৰি গ’লেও জনতাৰ হৃদয়ে হৃদয়ে এতিয়াও জীয়াই আছে অমৰ শিল্পী জুবিন গাৰ্গ ।
গান, চিনেমা, কবিতা আদি অলেখ যুগমীয়া সৃষ্টি উপহাৰ দিয়া অমৃত কণ্ঠ জুবিন গাৰ্গৰ সপোনৰ ছবি আছিল শেহতীয়াকৈ মুক্তি পাবলগীয়া ৰৈ ৰৈ বিনালে । ছিংগাপুৰৰ পৰা উভতি আহি ছবিখনৰ বাকী থকা কামসমূহ সমাপ্ত কৰি চলিত বৰ্ষৰ ৩১ অক্টোবৰত ৰৈ ৰৈ বিনালে মুক্তি দিয়াৰ কথা চিন্তা কৰিছিল শিল্পীগৰাকীয়ে ।
প্ৰিয় শিল্পী জুবিন গাৰ্গৰ সপোনৰ ছবিখন তেওঁ বিচৰা তাৰিখতেই মুক্তি দিয়াৰ বাবে ব্যৱস্থা গ্ৰহণ কৰিছে ছবিখনৰ পৰিচালকৰ লগতে তেখেতৰ পত্নী গৰিমা শইকীয়া গাৰ্গে । জুবিন গাৰ্গে বিচৰা ধৰণেই ৩১ অক্টোবৰতে মুক্তি লাভ কৰিব ৰৈ ৰৈ বিনালে ছবিখনে । সেয়েহে মঙলবাৰে ছবিখনৰ অন্তিমটো চিত্ৰগ্ৰহণ সমাপ্ত কৰা হয় । জুবিন গাৰ্গৰ অৱৰ্তমানত গুৱাহাটীৰ ৰয়েল গ্লৱেল বিশ্ববিদ্যালয়ত সম্পন্ন হয় ছবিখনৰ অন্তিটো শ্বুটিং । এই চিত্ৰগ্ৰহণৰ সময়ত উপস্থিত থাকে জুবিন পত্নী গৰিমা শইকীয়া গাৰ্গ ।
গৰিমাই ছবিখনৰ সন্দৰ্ভত কয়-“ৰৈ ৰৈ বিনালে জুবিনৰ সপোনৰ প্ৰকল্প । এই চিনেমাখন কৰিবলৈ তেওঁ বহু বছৰ ধৰি ৰৈ আছিল । এই ছবিখন সম্পূৰ্ণৰূপে জুবিনৰ লগত মিল থকা এখন মিউজিকেল ছবি । এই ছবিখনৰ পৰা তেওঁৰ বহু আশা আছিল, ছবিখনৰ সকলো কাম অন্ত-কৰণেৰে কৰিছিল তেওঁ । তেওঁৰ পৰিকল্পনা আছিল ৩১ অক্টোবৰত ছবিখন মুক্তি দিয়াৰ । সেয়েহে আমি এই দিনটোতে ছবিখন ৰাইজৰ মাজলৈ ওলিয়াই দিবলৈ চেষ্টা কৰিম ।“
ইফালে মঙলবাৰে মুক্তি লাভ কৰিলে জুবিন গাৰ্গৰ ৰৈ ৰৈ বিনালেৰ প্ৰথমটো গীত । ইতিমধ্যে ইউটিউবটো উপলব্ধ হৈছে ‘মোৰ মন ‘ শীৰ্ষক গীতটো ।
লগতে পঢ়ক : তিনিশ কোটি অতিক্ৰম কৰিলে ‘কান্তাৰা চেপ্তাৰ ১’ৰ উপাৰ্জনে…
