চাকৰিৰ পৰা নিলম্বন কৰা হ’ল সন্দীপন গাৰ্গক
অসম আৰক্ষীৰ বিষয়া তথা জুবিন গাৰ্গৰ সম্পৰ্কীয় ভাতৃ সন্দীপন গাৰ্গক চাকৰিৰ পৰা নিলম্বন কৰা হৈছে । বুধবাৰে জুবিন গাৰ্গৰ ৰহস্যজনক মৃত্যুৰে সম্পৰ্ক থকাৰ বাবে সন্দীপনক গ্ৰেপ্তাৰ কৰাছিল চি আই ডিয়ে । অসম আৰক্ষী সেৱাৰ বিষয়াগৰাকীয়ে জুবিন গাৰ্গৰ সৈতে ছিংগাপুৰলৈ গৈছিল আৰু শিল্পীগৰাকীৰ সৈতে য়টত উপস্থিত আছিল । নিলম্বিত সন্দীপন গাৰ্গ বকো সমজিলাৰ অতিৰিক্ত আৰক্ষী অধীক্ষক ৰূপে কৰ্মৰত আছিল ।
কামৰূপ মহানগৰ জিলাৰ মুখ্য ন্যায়িক দণ্ডাধীশে তেওঁক ৭ দিনৰ আৰক্ষী জিম্মালৈ প্ৰেৰণ কৰে । এই গোচৰত এতিয়ালৈকে সন্দীপনকে ধৰি ৫জন লোকক গ্ৰেপ্তাৰ কৰা হৈছে ।
জানিব পৰা মতে ছিংগাপুৰত সংঘটিত ঘটনাৰ সময়ত সন্দীপন জুবিন গাৰ্গৰ সৈতে একেখন য়টতে আছিল । চলিত সপ্তাহৰ আৰম্ভণিতে তেওঁক সোধা-পোছাৰ বাবে মাতিছিল এছ আই টিয়ে । উল্লেখ্য যে, জুবিন গাৰ্গৰ ৰহস্যজনক মৃত্যুৰ ঘটনা সন্দৰ্ভত এছ আই টিয়ে এই পৰ্যন্ত গ্ৰেপ্তাৰ কৰিছে সন্দীপন গাৰ্গ, কন্ঠশিল্পীগৰাকীৰ মেনেজাৰ সিদ্ধাৰ্থ শৰ্মা, নৰ্থ-ইষ্ট ফেষ্টিভেলৰ উদ্যোক্তা শ্যামকানু মহন্ত, সংগীত শিল্পী শেখৰ জ্যোতি গোস্বামী, অমৃত প্ৰভা মহন্তকে ধৰি ৫জন লোকক ।
লগতে পঢ়ক : বিধায়ক অখিল গগৈৰ বিৰুদ্ধে মানহানিৰ গোচৰ ৰিণিকি ভূঞা শৰ্মাৰ
