ৰাজ্যত স্থাপন হ’ব ৪ খন নতুন চিকিৎসা মহাবিদ্যালয়; হ’ব বৃহৎ নিযুক্তি
বিত্তমন্ত্ৰী জয়ন্তমল্ল বৰুৱাই বাজেট ভাষণত এক গুৰুত্বপূৰ্ণ ঘোষণা কৰে। গোৱালপাৰা, হাইলাকান্দি, হোজাই আৰু বজালী জিলাত ৪ খন নতুন চিকিৎসা মহাবিদ্যালয় স্থাপন কৰা হ’ব।
শুকুৰবাৰে বিধানসভাত ২০২৬-২৭ বৰ্ষৰ অসম বাজেট উত্থাপন কৰাৰ সময়ত ৰাজ্যৰ বিত্তমন্ত্ৰী জয়ন্ত মল্লবৰুৱাই স্বাস্থ্য খণ্ডক লৈ কেইবাটাও গুৰুত্বপূৰ্ণ ঘোষণা কৰে। ইয়াৰ ভিতৰত আটাইতকেই উল্লেখনীয় বিষয়টো হৈছে ৰাজ্যত অতিৰিক্ত ৪ খন নতুন চিকিৎসা মহাবিদ্যালয় স্থাপনৰ প্ৰস্তাৱ।
কোন কোন জিলাত নিৰ্মাণ হ’ব নতুন চিকিৎসা মহাবিদ্যালয়?
বিত্তমন্ত্ৰী জয়ন্ত মল্লবৰুৱাৰ ঘোষণা অনুসৰি, নতুন চিকিৎসা মহাবিদ্যালয়সমূহ তলত উল্লেখ কৰা ৪ খন জিলাত নিৰ্মাণ কৰা হ’ব : গোৱালপাৰা, হাইলাকান্দি, হোজাই আৰু বজালী ।
এই নতুন ৪ খন চিকিৎসা মহাবিদ্যালয়ৰ নিৰ্মাণ সম্পূৰ্ণ হোৱাৰ লগে লগে অসমত মুঠ চিকিৎসা মহাবিদ্যালয়ৰ সংখ্যা ২৮ খনলৈ বৃদ্ধি পাব । চৰকাৰৰ এই ঐতিহাসিক পদক্ষেপ আচলতে “এখন জিলা, এখন বিশ্ববিদ্যালয়, এখন চিকিৎসা মহাবিদ্যালয় আৰু এখন অভিযান্ত্ৰিক মহাবিদ্যালয়”ৰ দূৰদৰ্শী পৰিকল্পনাৰেই এক গুৰুত্বপূৰ্ণ অংশ । ইয়াৰ জৰিয়তে অসমৰ প্ৰতিখন জিলাতে গুণগত মানদণ্ডৰ উচ্চ শিক্ষা নিশ্চিত কৰাৰ লক্ষ্য লোৱা হৈছে ।
প্ৰতিটো সমষ্টিত ৫০ খন বিছনাযুক্ত FRU স্থাপনৰ প্ৰতিশ্ৰুতি
স্বাস্থ্য আন্তঃগাঁথনি অধিক শক্তিশালী কৰাৰ উদ্দেশ্যে বিত্তমন্ত্ৰীগৰাকীয়ে আন এক ডাঙৰ ঘোষণা কৰে । ৰাজ্যৰ বৰ্তমানৰ স্বাস্থ্য সেৱাৰ সুবিধাসমূহ সুদৃঢ় কৰাৰ লগতে প্ৰতিটো বিধানসভা সমষ্টিত অন্ততঃ এখনকৈ ৫০ খন বিছনাযুক্ত FRU স্থাপন কৰিবলৈ চৰকাৰ প্ৰতিশ্ৰুতিবদ্ধ বুলি তেওঁ সদৰী কৰে ।
সৃষ্টি হ’ব নতুন স্বাস্থ্যসেৱাৰ পদ: নিযুক্তি পাব ডাক্তৰ-নাৰ্ছ
অসমৰ স্বাস্থ্য প্ৰতিষ্ঠানসমূহক চিকিৎসক আৰু কৰ্মীৰ অভাৱ দূৰ কৰিবলৈ চৰকাৰে এক বৃহৎ নিযুক্তি প্ৰক্ৰিয়াৰো ইংগিত দিছে । বাজেট ভাষণত বিত্তমন্ত্ৰী বৰুৱাই কয় যে ৰাজ্যৰ স্বাস্থ্যখণ্ডক শক্তিশালী কৰিবলৈ নতুন স্বাস্থ্যসেৱা পদ সৃষ্টিৰ প্ৰস্তাৱ লোৱা হৈছে । ইয়াৰ অধীনত এম বি বি এছ ডাক্তৰ, আয়ুষ ডাক্তৰ, দন্ত চিকিৎসক, নাৰ্চ, ফাৰ্মাচিষ্ট, পৰীক্ষাগাৰ টেকনিচিয়ান, ৰেডিঅ’গ্ৰাফাৰ আৰু এ এন এম কৰ্মীক নিযুক্তি দিয়া হ’ব ।
স্বাস্থ্য খণ্ডত অসমৰ অভূতপূৰ্ব সফলতা: হ্ৰাস পালে মাতৃ মৃত্যুৰ হাৰ
বাজেটত ৰাজ্যৰ স্বাস্থ্য খণ্ডৰ এক ইতিবাচক তথা আশাপ্ৰদ ছবিও দাঙি ধৰে মন্ত্ৰীগৰাকীয়ে । বিগত দশকটোৰ তুলনাত অসমত মাতৃ মৃত্যুৰ হাৰ ৬৫% লৈ হ্ৰাস পাইছে । বৰ্তমান এই হাৰ প্ৰতি লাখ জীৱিত জন্মৰ বিপৰীতে ৮৪ লৈ হ্ৰাস পাইছে, যিটো বৰ্তমান ৰাষ্ট্ৰীয় গড়তকৈও কম ।
ইয়াৰ উপৰিও, চৰকাৰী প্ৰচেষ্টাৰ ফলত ৰাজ্যত প্ৰতিষ্ঠানিক প্ৰসৱৰ হাৰ ৮৭.৬% লৈ বৃদ্ধি পাইছে । একেদৰে, দক্ষ স্বাস্থ্যকৰ্মীৰ উপস্থিতিত প্ৰসৱৰ হাৰ ৯০.৭% লৈ বৃদ্ধি পোৱাৰ বিপৰীতে বাল্যবিবাহৰ হাৰ উল্লেখনীয়ভাৱে ৬২% লৈ হ্ৰাস পাইছে ।
লগতে পঢ়ক: অসম বাজেট ২০২৬-২৭: উচ্চশিক্ষাৰ বাবে বৃহৎ ঘোষণা চৰকাৰৰ