বিদ্যালয়ৰ শ্ৰেণীকোঠাৰ ভিতৰতে একাংশ বিশেষ ধৰ্মৰ ছাত্ৰই নিষিদ্ধ মাংস ভক্ষণ কৰাৰ লগতে আন হিন্দু ছাত্ৰ তথা সহপাঠীক সেয়া খাবলৈ বাধ্য কৰোৱাৰ চেষ্টা চলোৱা বুলি এক গুৰুতৰ অভিযোগ উত্থাপন হৈছে
গোৱালপাৰা জিলাৰ কৃষ্ণাইত সংঘটিত এক ভয়ংকৰ ঘটনাই তীব্ৰ চাঞ্চল্যৰ সৃষ্টি কৰিছে । কৃষ্ণাইৰ হাবৰাঘাট উচ্চতৰ মাধ্যমিক বিদ্যালয়ৰ শ্ৰেণীকোঠাৰ ভিতৰতে একাংশ বিশেষ ধৰ্মৰ ছাত্ৰই নিষিদ্ধ মাংস ভক্ষণ কৰাৰ লগতে আন হিন্দু ছাত্ৰ তথা সহপাঠীক সেয়া খাবলৈ বাধ্য কৰোৱাৰ চেষ্টা চলোৱা বুলি এক গুৰুতৰ অভিযোগ উত্থাপন হৈছে । এই সন্দৰ্ভত ইতিমধ্যে কৃষ্ণাই আৰক্ষী থানাত এক আনুষ্ঠানিক গোচৰ ৰুজু কৰা হৈছে ।
কি আছিল প্ৰকৃত ঘটনা ?
অভিযোগ অনুসৰি, বিদ্যালয়খনৰ বিশেষ সম্প্ৰদায়ৰ পাঁচজন ছাত্ৰই শ্ৰেণীকোঠাৰ ভিতৰলৈ নিষিদ্ধ মাংস লৈ আহিছিল আৰু সকলোৰে সমুখতে সেয়া ভক্ষণ কৰিছিল । কেৱল ইমানেই নহয়, উক্ত ছাত্ৰকেইজনে তেওঁলোকৰ দুজন হিন্দু সহপাঠীকো সেই মাংস খাবলৈ বাধ্য কৰিবলৈ চেষ্টা চলায় । হিন্দু ছাত্ৰ দুজনে এই নিষিদ্ধ মাংস খাবলৈ অস্বীকাৰ কৰাত তেওঁলোকৰ ওপৰত তীব্ৰ মানসিক চাপ সৃষ্টি কৰা বুলিও এজাহাৰত উল্লেখ কৰা হৈছে ।
পৰিয়ালৰ লোকৰ এজাহাৰ দাখিল :
বিদ্যালয়ৰ পৰা ঘৰলৈ উভতি অহাৰ পিছত ভুক্তভোগী ছাত্ৰ দুজনে সমগ্ৰ ঘটনাৰ বিষয়ে নিজৰ পিতৃ-মাতৃক অৱগত কৰে । ঘটনাৰ ভয়াৱহতা বুজি পাই ছাত্ৰ দুজনৰ পৰিয়ালৰ লোকসকলে স্থানীয় ৰাইজৰ সহযোগত কৃষ্ণাই আৰক্ষী থানাত উপস্থিত হয় আৰু দোষী ছাত্ৰকেইজনৰ বিৰুদ্ধে কঠোৰ আইনী ব্যৱস্থা গ্ৰহণৰ দাবীৰে এখন এজাহাৰ দাখিল কৰে ।
কৃষ্ণাই আৰক্ষী থানাৰ ভাৰপ্ৰাপ্ত বিষয়া ঘটনাৰ সত্যতা স্বীকাৰ কৰি সংবাদ মাধ্যমক জনায় যে ভুক্তভোগী ছাত্ৰদ্বয়ৰ পিতৃ-মাতৃয়ে এই ঘটনাৰ সন্দৰ্ভত থানাত এটা গোচৰ ৰুজু কৰিছে । আৰক্ষীয়ে সমগ্ৰ বিষয়টো গুৰুত্বসহকাৰে লৈছে ।
বিদ্যালয় প্ৰশাসনৰ বিৰুদ্ধে ক্ষোভ :
ইফালে, এই সমগ্ৰ ঘটনাক কেনেকৈ বিদ্যালয় কৰ্তৃপক্ষই আওকাণ কৰিবলৈ পাৰিলে, তাক লৈ স্থানীয় ৰাইজে প্ৰশ্ন উত্থাপন কৰিছে । অভিযোগকাৰীসকলৰ দাবী যে বিদ্যালয় প্ৰশাসনে এই সন্দৰ্ভত কোনো উপযুক্ত বা তাৎক্ষণিক ব্যৱস্থা গ্ৰহণ কৰাত ব্যৰ্থ হৈছে । আনকি পৰিস্থিতি নিয়ন্ত্ৰণৰ নামত বিদ্যালয় কৰ্তৃপক্ষই সমগ্ৰ বিষয়টো গাপ দিবলৈহে চেষ্টা চলাইছিল বুলি গুৰুতৰ অভিযোগ উত্থাপন হৈছে ।
বৰ্তমান এই ঘটনাক কেনেকৈ স্থানীয় অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে । স্থানীয় ৰাইজে শান্তিপূৰ্ণ পৰিৱেশ অটুট ৰখাৰ স্বাৰ্থত আৰু বিদ্যালয়ৰ পবিত্ৰতা ৰক্ষাৰ্থে ঘটনাৰ এক পুংখানুপুংখ তথা নিৰপেক্ষ তদন্তৰ দাবী জনাইছে ।
লগতে পঢ়ক : “১ আগষ্টৰ পৰা পুনৰ চেনি, চাউল, তেল লাভ কৰিব”;কেবিনেটত মুখ্যমন্ত্ৰীৰ ডাঙৰ সিদ্ধান্ত
