তিনিমাহৰ ভিতৰত দ্বিতীয়বাৰলৈ বৃদ্ধি LPGৰ মূল্য, অসমৰ কোন জিলাত কিমান দাম ?
সামগ্ৰীৰ আকাশলংঘী মূল্যবৃদ্ধিৰ মাজতে পুনৰ সাধাৰণ গ্ৰাহকৰ পকেটত মোক্ষম আঘাত হানি বৃদ্ধি পালে ঘৰুৱা ৰন্ধন গেছ (LPG) চিলিণ্ডাৰৰ মূল্য
সাধাৰণ জনতাৰ বাবে এক অতি দুখবৰ । সামগ্ৰীৰ আকাশলংঘী মূল্যবৃদ্ধিৰ মাজতে পুনৰ সাধাৰণ গ্ৰাহকৰ পকেটত মোক্ষম আঘাত হানি বৃদ্ধি পালে ঘৰুৱা ৰন্ধন গেছ (LPG) চিলিণ্ডাৰৰ মূল্য । লাভ কৰা খবৰ অনুসৰি, এইবাৰ ঘৰুৱা ব্যৱহাৰ্য LPG চিলিণ্ডাৰৰ দাম একেলগে ২৯ টকাকৈ বৃদ্ধি কৰা হৈছে । এই সংশোধিত নতুন বৰ্ধিত মূল্য আজি অৰ্থাৎ দেওবাৰ, ৭ জুনৰ পৰা সমগ্ৰ দেশৰ লগতে ৰাজ্যজুৰিও কাৰ্যকৰী কৰা হৈছে । এই হঠাত্ হোৱা মূল্যবৃদ্ধিয়ে এতিয়া পাকঘৰৰ বাজেট ওলট-পালট কৰি তুলিছে ।
ৰাজ্যৰ বিভিন্ন জিলাভেদে এই নতুন মূল্যৰ কিছু তাৰতম্য দেখা গৈছে । অসমৰ বিভিন্ন প্ৰান্তত আজিৰ পৰা কাৰ্যকৰী হোৱা ঘৰুৱা চিলিণ্ডাৰৰ নতুন মূল্যসমূহ এনেধৰণৰ-
বজালী আৰু বৰপেটা জিলাত গ্ৰাহকে এতিয়াৰে পৰা প্ৰতিটো চিলিণ্ডাৰৰ বাবদ ৯৮৪ টকা ভৰিব লাগিব । একেদৰে বাক্সাত ৯৯৯ টকা, বিশ্বনাথ, ধেমাজি, লখিমপুৰ, শোণিতপুৰ আৰু ওদালগুৰি জিলাত এই মূল্য বৃদ্ধি পাই হৈছেগৈ ১০০৭.৫০ টকা । আনহাতে বঙাইগাঁও, চিৰাং আৰু কোকৰাঝাৰ জিলাত ৰন্ধন গেছৰ নতুন দাম নিৰ্ধাৰণ কৰা হৈছে ৯৭৬ টকা ।
পাহাৰীয়া তথা দূৰৱৰ্তী জিলাসমূহৰ লগতে বৰাক উপত্যকাত ইয়াৰ প্ৰভাৱ অধিক পৰিলক্ষিত হৈছে । ডিমা হাছাও জিলাত বৰ্তমান ঘৰুৱা চিলিণ্ডাৰৰ মূল্য সৰ্বাধিক ১১০০.৫০ টকা হৈছেগৈ । ইয়াৰ উপৰি কাছাৰত ১০৭৬.৫০ টকা, হাইলাকান্দিত ১০৮৫ টকা আৰু শ্ৰীভূমিত ১০৯৩.৫০ টকালৈ মূল্য বৃদ্ধি পাইছে ।
ৰাজ্যৰ বাকী অংশৰ ভিতৰত চৰাইদেউ আৰু যোৰহাটত নতুন মূল্য ৯৫৭.৫০ টকা, দৰঙত ৯৯৯ টকা, ধুবুৰী আৰু দক্ষিণ শালমৰাত ৯৯২.৫০ টকা আৰু ডিব্ৰুগড় তথা তিনিচুকীয়া জিলাত এই মূল্য হৈছেগৈ ৯৪১ টকা । তদুপৰি গোৱালপাৰাত ৯৭.৫০ টকা, গোলাঘাট আৰু মাজুলীত ৯৫৮.৫০ টকা, হোজাই, নগাঁও আৰু পশ্চিম কাৰ্বি আংলঙত ১০১৪ টকা হিচাপে নতুন দাম ধাৰ্য কৰা হৈছে ।
মহানগৰী সামৰি লোৱা কামৰূপ মেট্ৰ’ (গুৱাহাটী)ত গ্ৰাহকে এতিয়াৰে পৰা প্ৰতিটো চিলিণ্ডাৰত ৯৯১ টকাকৈ ব্যয় কৰিব লাগিব । একেদৰে কাৰ্বি আংলঙত ৯৬৪ টকা, মৰিগাঁৱত ১০০১.৫০ টকা, নলবাৰীত ৯৯৯.৫০ টকা আৰু শিৱসাগৰ জিলাত ঘৰুৱা চিলিণ্ডাৰৰ নতুন মূল্য হৈছে ৯৪৯.৫০ টকা ।
লগতে পঢ়ক : পুনৰ বাঢ়িল ঘৰুৱা চিলিণ্ডাৰৰ দাম : আজিৰ পৰা কাৰ্যকৰী হ’ব নতুন দৰ