এই ঐতিহাসিক জয়েৰে ইংলেণ্ডে ৫ খনীয়া শৃংখলাটো ৪-০ ব্যৱধানত নিজৰ নামত কৰিবলৈ সক্ষম হয়

ভাৰত আৰু ইংলেণ্ডৰ মাজত অনুষ্ঠিত পাঁচখনীয়া টি-২০ শৃংখলাৰ অন্তিমখন খেলত ভাৰতীয় দলে এক লজ্জাজনক পৰাজয়ৰ মুখ দেখিবলগীয়া হৈছে । শনিবাৰে ছাউথম্পটনৰ ‘দ্য ৰোজ বাউল’ ষ্টেডিয়ামত অনুষ্ঠিত অন্তিমখন টি-২০ খেলত ইংলেণ্ডে ভাৰতক ৫৬ ৰানৰ এক বৃহৎ ব্যৱধানত পৰাস্ত কৰে । এই ঐতিহাসিক জয়েৰে ইংলেণ্ডে ৫ খনীয়া শৃংখলাটো ৪-০ ব্যৱধানত নিজৰ নামত কৰিবলৈ সক্ষম হয় । ক্ৰিকেট ইতিহাসত প্ৰথমবাৰৰ বাবে ভাৰতীয় দলে কোনো এটা দ্বিপাক্ষিক টি-২০ শৃংখলাত চাৰিখনকৈ খেলত পৰাজয়বৰণ কৰিছে ।

আইচিচি টি-২০ ৰেংকিঙত ভাৰতৰ স্থান হেৰাল-

এই শৃংখলাত মুখ ঠকেচা খোৱাৰ পিছত ভাৰতীয় দলে কেৱল ট্ৰফীয়েই হেৰুওৱা নাই, বৰঞ্চ আইচিচি টি-২০ ৰেংকিঙৰ নম্বৰ-১ স্থানৰ পৰাও অপসাৰিত হৈছে । ভাৰতক অভিলেখ ব্যৱধানত হৰুৱাই এতিয়া ইংলেণ্ড টি-২০ আন্তঃৰাষ্ট্ৰীয় ৰেংকিঙৰ বিশ্বৰ শীৰ্ষ স্থানত উপনীত হৈছে ।

উল্লেখ্য যে, এই শৃংখলাৰ প্ৰথমখন খেল বৰষুণৰ বাবে পৰিত্যক্ত হৈছিল । ইয়াৰ পিছত মানচেষ্টাৰ টি-২০ত ইংলেণ্ডে ৪ উইকেটত, নটিংহামত ১২৫ ৰানত আৰু ব্ৰিষ্টল টি-২০ত ৯ উইকেটত জয়লাভ কৰি ভাৰতক দিশহাৰা কৰি পেলাইছিল । অন্তিমখন খেলতো ইংলিছ বাহিনী শ্ৰেয়াছ আয়াৰৰ ব্ৰিগেডৰ ওপৰত সম্পূৰ্ণ গধুৰ হৈ পৰে ।

জছ বাটলাৰ আৰু হেৰী ব্ৰুকৰ বেটিং ধুমুহা-

খেলখনত টছ হাৰি প্ৰথমে বেটিং কৰিবলৈ নমা ইংলেণ্ডৰ আৰম্ভণি ভাল নাছিল । ফিল ছল্ট মাত্ৰ ৬ ৰান কৰি প্ৰসিদ্ধ কৃষ্ণৰ চিকাৰ হয় । কিন্তু ইয়াৰ পিছতে ক্ৰীজত ধুমুহা তোলে জছ বাটলাৰ আৰু অধিনায়ক হেৰী ব্ৰুকে । দুয়োৰে মাজত দ্বিতীয় উইকেটৰ বাবে মাত্ৰ ১০২ টা বলত ২৩৩ ৰানৰ এক বিশাল আৰু অভিলেখকাৰী অংশীদাৰিত্ব গঢ়ি উঠে ।

বাটলাৰে মাত্ৰ ৫১ টা বলত শতক অৰ্জন কৰাৰ লগতে মুঠ ৬৪ টা বলত ১৩১ ৰানৰ এক বিস্ফোৰক ইনিংছ খেলে, য’ত আছিল ১২ টা চাৰি আৰু ৮ টা দৰ্শনীয় ছয় । ব্ৰুকেও নিজৰ ধুমুহা অব্যাহত ৰাখি ৪ টা চাৰি আৰু ৮ টা ছয়ৰ সহায়ত ৯৫ ৰান কৰি অপৰাজিত হৈ থাকে । ইংলেণ্ডে নিৰ্ধাৰিত ২০ অভাৰত ভাৰতক ২৫৮ ৰানৰ এক বৃহৎ লক্ষ্য বান্ধি দিয়ে । ভাৰতৰ হৈ শিৱম ডুবেই ক্ৰমাগত দুটা বলত বাটলাৰ আৰু জেকব বেথেলক (০) আউট কৰে ।

অথলে গ’ল তিলক বৰ্মা আৰু ঈশান কিষাণৰ যুঁজ-

২৫৮ ৰানৰ বিশাল লক্ষ্য খেদিবলৈ নামি ভাৰতীয় দলৰ আৰম্ভণি অতি হতাশাজনক আছিল । অপেনাৰ অভিষেক শৰ্মা মাত্ৰ ৩ ৰান কৰি জোফ্ৰা আৰ্চাৰৰ বলত আউট হয় । সঞ্জু চেমছনে কিছু ভাল শ্বট খেলি ২৭ ৰান কৰে যদিও ছেম কাৰনৰ প্ৰথমটো বলতে উইকেট হেৰুৱায় ।

ইয়াৰ পিছত অধিনায়ক শ্ৰেয়াছ আয়াৰ (২৮) আৰু ঈশান কিষাণে তৃতীয় উইকেটৰ বাবে ৫৫ ৰান যোগ কৰে । ঈশানে ৩৫ টা বলত ৫৬ ৰান (৭ টা চাৰি, ২ টা ছয়) কৰি আদিল ৰছিদৰ চিকাৰ হয় । শেষৰ ফালে যুৱ তাৰকা তিলক বৰ্মাই মাত্ৰ ২৫ টা বলত ৩ টা চাৰি আৰু ৪ টা ছয়ৰ সহায়ত ৫৩ ৰানৰ এক আক্ৰমণাত্মক ইনিংছ খেলে যদিও আন কোনো বেটছমেনে সংগ দিয়াত ব্যৰ্থ হয় । শিৱম ডুবে (১৪), সূৰ্যাংশ শ্বেদগে (৭) আৰু অক্ষৰ পেটেলে (৩) বেটেৰে হতাশ কৰে। ফলত ভাৰতে ৮ উইকেট হেৰুৱাই ২০১ ৰানহে কৰিবলৈ সক্ষম হয় । ইংলেণ্ডৰ হৈ ছেম কাৰনে ৩ টা আৰু আদিল ৰছিদে ২ টা উইকেট লাভ কৰে ।

ভাৰতীয় দলৰ প্লেয়িং-১১ ত সালসলনি-

এই খেলখনত ভাৰতীয় দলে তেওঁলোকৰ প্লেয়িং-১১ ত দুটা ডাঙৰ সালসলনি কৰিছিল । যুৱ বেটছমেন বৈভৱ সূৰ্যবংশী আৰু অলৰাউণ্ডাৰ ৱাশ্বিংটন সুন্দৰৰ স্থানত ক্ৰমে উইকেটৰক্ষক সঞ্জু চেমছন আৰু অলৰাউণ্ডাৰ সূৰ্যাংশ শ্বেদগেই সুযোগ লাভ কৰিছিল । আনহাতে, ইংলেণ্ডে ৰেয়ান আহমেদৰ স্থানত পুনৰ লিয়াম ডছনক অন্তৰ্ভুক্ত কৰিছিল ।

লগতে পঢ়ক : শচীন-বিৰাটেও কৰিব নোৱাৰা কৃতিত্ব অৰ্জন কৰিলে হৰমনপ্ৰীত কৌৰে!

পঞ্চম তথা অন্তিমখন টি-২০ মেচৰ পূৰ্বে ভাৰতীয় দলৰ বাছখন তীব্ৰ ট্ৰেফিক জামত আৱদ্ধ হৈ পৰে

ইংলেণ্ড ভ্ৰমণত থকা ভাৰতীয় ক্ৰিকেট দলটোৱে শনিবাৰে এক আচৰিত আৰু অস্বস্তিকৰ পৰিস্থিতিৰ সন্মুখীন হ’বলগীয়া হয় । ছাউথহেম্পটনৰ ৰোজ বাউল ষ্টেডিয়ামত অনুষ্ঠিত হ’বলগীয়া পঞ্চম তথা অন্তিমখন টি-২০ মেচৰ পূৰ্বে ভাৰতীয় দলৰ বাছখন তীব্ৰ ট্ৰেফিক জামত আৱদ্ধ হৈ পৰে ।

ইয়াৰ ফলত খেলুৱৈসকল সময়মতে ষ্টেডিয়ামত উপস্থিত হ’ব নোৱাৰিলে আৰু নিৰ্ধাৰিত সময়তকৈ ৪৫ মিনিট পলমকৈ টছ কৰিবলগীয়া হয় । ভাৰতীয় সময় অনুসৰি সন্ধিয়া ৬:৩০ বজাত হ’বলগীয়া টছ অৱশেষত সন্ধিয়া ৭:১৫ বজাতহে সম্ভৱ হয় । অৱশ্যে পৰৱৰ্তী সময়ত টীম ইণ্ডিয়া ষ্টেডিয়ামত উপস্থিত হোৱাৰ লগে লগে খেলখন আৰম্ভ কৰাৰ প্ৰস্তুতি দ্ৰুতগতিত আগবাঢ়ে ।

ইয়াৰ পূৰ্বে ঘৰুৱা দল ইংলেণ্ডৰ ক্ৰিকেটাৰ সকল অহা বাহনখনো ট্ৰেফিক জামত আৱদ্ধ হৈ পৰাত তেওঁলোক চাইকেলেৰে ষ্টেডিয়ামলৈ অহা পৰিলক্ষিত হয় ।

হাতৰ পৰা গ’ল শৃংখলা, ম্লান হ’ল টীম ইণ্ডিয়াৰ ৰেকৰ্ড

পাঁচখনীয়া এই টি-২০ শৃংখলাৰ ফলাফল ইতিমধ্যে নিৰ্ধাৰণ হৈ গৈছে, গতিকে এই মেচখনে শৃংখলাৰ ফলাফল সলনি কৰিব নোৱাৰে । প্ৰথমখন টি-২০ মেচ বৰষুণৰ বাবে বাতিল হোৱাৰ পিছত, পৰৱৰ্তী তিনিওখন মেচতে ইংলেণ্ডে ভাৰতক পৰাস্ত কৰে । ইয়াৰ ফলত ঘৰুৱা দলটোৱে শৃংখলাত ৩-০ ব্যৱধানত এক অপ্ৰতিৰোধ্য অগ্ৰগতি লাভ কৰিছে ।

এই পৰাজয়ে ভাৰতীয় ক্ৰিকেটৰ ইতিহাসত কেতবোৰ বেয়া ৰেকৰ্ডৰো সৃষ্টি কৰিছে । ভাৰতীয় দলটোৱে ইতিহাসত প্ৰথমবাৰৰ বাবে ইংলেণ্ডৰ বিৰুদ্ধে দুখন বা তাতকৈ অধিক মেচৰ টি-২০ শৃংখলাত পৰাজয়ৰ সোৱাদ লৈছে । লগতে ২০১৯ চনৰ পিছত ইংলেণ্ডৰ বিৰুদ্ধে এয়া ভাৰতৰ প্ৰথমটো দ্বিদেশীয় টি-২০ শৃংখলা পৰাজয় ।

অধিনায়ক শ্ৰেয়াছ আয়াৰ আৰু প্ৰশিক্ষক গৌতম গম্ভীৰৰ বাবে অগ্নিপৰীক্ষা

শৃংখলা হেৰুওৱাৰ পিছত এই অন্তিমখন খেল ভাৰতৰ বাবে কেৱল সন্মান ৰক্ষাৰ যুঁজ হৈ পৰিছে । এই মেচখন বিশেষকৈ নৱনিযুক্ত অধিনায়ক শ্ৰেয়াছ আয়াৰ আৰু হেড কোচ গৌতম গম্ভীৰৰ বাবে অত্যন্ত গুৰুত্বপূৰ্ণ । সূৰ্যকুমাৰ যাদৱৰ অনুপস্থিতিত দলৰ ক দায়িত্ব লোৱা শ্ৰেয়াছ আয়াৰৰ অধিনায়কত্বৰ ট্ৰেক ৰেকৰ্ড এতিয়ালৈকে অতি হতাশাজনক হৈছে ।

আয়াৰৰ নেতৃত্বত খেলা প্ৰাৰম্ভিক ৬ খন মেচৰ ভিতৰত ৫ খনতে ভাৰত পৰাজিত হৈছে আৰু এখন খেল ড্ৰ’ হৈছে । দলৰ এনে ধাৰাবাহিক বেয়া প্ৰদৰ্শনক লৈ এতিয়া ভাৰতীয় ক্ৰিকেট নিয়ন্ত্ৰণ ব’ৰ্ড মুঠেই সন্তুষ্ট নহয় । জানিব পৰা মতে, বিচিচিআইয়ে অতি শীঘ্ৰেই দলৰ এই প্ৰদৰ্শনৰ এক গুৰুত্বপূৰ্ণ পৰ্যালোচনা কৰাৰ প্ৰস্তুতি চলাইছে ।

লগতে পঢ়ক : উইম্বলডনত ভাৰতীয় ক্ৰিকেটৰ তিনি প্ৰজন্ম: চিনাৰৰ প্ৰশংসাত পঞ্চমুখ মাষ্টাৰ ব্লাষ্টাৰ

ভাৰতীয় টি-২০ দলটোৰ শোচনীয় প্ৰদৰ্শন অব্যাহত আছে

শ্ৰেয়াছ আয়াৰৰ নেতৃত্বত বৰ্তমান ইংলেণ্ড ভ্ৰমণত থকা ভাৰতীয় টি-২০ দলটোৰ শোচনীয় প্ৰদৰ্শন অব্যাহত আছে । ব্ৰিষ্টলত অনুষ্ঠিত পাঁচখনীয়া টি-২০ শৃংখলাৰ চতুৰ্থখন মেচত টীম ইণ্ডিয়াই আকৌ এবাৰ ডাঙৰ বিপৰ্যয়ৰ সন্মুখীন হ’বলগীয়া হৈছে । শৃংখলাত বৰ্তি থাকিবলৈ ভাৰতৰ বাবে এই মেচখন জিকাটো অতি জৰুৰী আছিল, কিন্তু তাৰকা বেটৰসকলৰ ব্যৰ্থতা আৰু বলাৰসকলৰ দুৰ্বল প্ৰদৰ্শনৰ বাবে ভাৰতে মেচখন হেৰুৱাব লগা হয় । এই বিজয়েৰে ঘৰুৱা দল ইংলেণ্ডে ৫খনীয়া মেচৰ শৃংখলাটোত ৩-০ ৰ এক অপৰাজেয় অগ্ৰগতি লাভ কৰিছে ।

টছ জিকিও ব্যৰ্থ ভাৰতীয় বেটিং লাইন-আপ

মেচখনত ভাৰতীয় দলৰ অধিনায়ক শ্ৰেয়াছ আয়াৰে টছত জিকি প্ৰথমে বেটিং কৰাৰ সিদ্ধান্ত লয় । কিন্তু দলৰ আৰম্ভণি একেবাৰেই আশাপ্ৰদ নাছিল । যুৱ অপেনাৰ বৈভৱ সূৰ্যৱংশীয়ে কিছুমান ভাল শ্বট খেলি ১৫ ৰান কৰাৰ পাছতে জোফ্ৰা আৰ্চাৰৰ চিকাৰ হয় । ইয়াৰ পিছত ক্ৰীজলৈ অহা উইকেটকীপাৰ ঈশান কিষাণো মাত্ৰ ৪ ৰান কৰি বিদায় লয় । ভাল ফৰ্মত থকা যেন লগা অভিষেক শৰ্মায়ো (১৪ ৰান) আদিল ৰছিদৰ বলত নিজৰ কেচ দি আউট হোৱাত ভাৰতে ৪৮ ৰানতে ৩টা গুৰুত্বপূৰ্ণ উইকেট হেৰুৱায় ।

অধিনায়ক শ্ৰেয়াছ আয়াৰৰ সংগ্ৰাম

এফালে ইটোৰ পিছত সিটো উইকেট পতন ঘটি থকাৰ সময়ত অধিনায়ক শ্ৰেয়াছ আয়াৰে এক আকৰ্ষণীয় অধিনায়কসুলভ ইনিংছ খেলে । আয়াৰে ৪৯ বলত সংগ্ৰামী অপৰাজিত ৮০ ৰান সংগ্ৰহ কৰে । মধ্যক্ৰমত তেওঁক কিছু পৰিমাণে সংগ দিয়ে শিৱম ডুবেই (২২ ৰান)। দুয়োৰে মাজত ৫৩ ৰানৰ এক মূল্যবান পাৰ্টনাৰশ্বিপ গঢ়ি উঠে ।

অৱশ্যে শেষৰ ফালে তিলক বাৰ্মা, ৱাশ্বিংটন সুন্দৰ (৫ ৰান) আৰু অক্ষৰ পেটেল (১ ৰান) ব্যৰ্থ হয় । নিৰ্ধাৰিত ২০ অভাৰত ভাৰতে ৭টা উইকেট হেৰুৱাই ১৫৮ ৰান হে কৰিবলৈ সক্ষম হয় । ইংলেণ্ডৰ হৈ জোছ টাং আৰু জোফ্ৰা আৰ্চাৰে ২টি কৈ উইকেট লাভ কৰে ।

হেৰী ব্ৰুক আৰু ফিল ছল্টৰ ধুমুহা

১৫৯ ৰানৰ লক্ষ্য অনুসৰণ কৰিবলৈ নামি ইংলেণ্ডৰ বেটৰসকলে ভাৰতীয় বলাৰসকলক তিলমাত্ৰও সুযোগ নিদিলে । যদিও ইনিংছৰ তৃতীয় অভাৰতে অধিনায়ক জোছ বাটলাৰক (৮ ৰান) অৰ্শদীপ সিঙে আউট কৰি ভাৰতক প্ৰথমটো সফলতা দিছিল, কিন্তু তাৰ পিছত ভাৰতীয় বলাৰসকল সম্পূৰ্ণ অসহায় হৈ পৰে ।

হেৰী ব্ৰুকে ৩৫ বলত অপৰাজিত ৭৯ ৰান ইনিংছ খেলে । ইফালে ফিল ছল্টে ৪২ বলত ৫৯ ৰান (অপৰাজিত) সংগ্ৰহ কৰে । দুয়োৰে আক্ৰমণাত্মক বেটিঙৰ বলত ইংলেণ্ডে ৪৩ বল বাকী থকা অৱস্থাতে মাত্ৰ ১টা উইকেট হেৰুৱাই লক্ষ্যত উপনীত হয় ।

টীম ইণ্ডিয়াত দুটা পৰিৱৰ্তন, আয়াৰৰ নেতৃত্বক লৈ প্ৰশ্ন

এই গুৰুত্বপূৰ্ণ মেচখনৰ বাবে ভাৰতীয় দলত দুটা ডাঙৰ পৰিৱৰ্তন কৰা হৈছিল । আঘাতৰ বাবে দলৰ বাহিৰত থকা হৰ্ষিত ৰাণা আৰু বৰুণ চক্ৰৱৰ্তীৰ স্থানত প্ৰসিদ্ধ কৃষ্ণ আৰু ৱাশ্বিংটন সুন্দৰক অন্তৰ্ভূক্ত কৰা হৈছিল । এই মেচখনতো সঞ্জু ছেমছনক সুযোগ দিয়া নহ’ল ।

উল্লেখ্য যে, শ্ৰেয়াছ আয়াৰৰ অধিনায়কত্বত টীম ইণ্ডিয়াই এতিয়ালৈকে এখনো টি-২০ মেচত জয়লাভ কৰিব পৰা নাই । শৃংখলাৰ প্ৰথমখন মেচ বৰষুণৰ বাবে বাতিল হৈছিল আৰু বাকী তিনিখন মেচত ইংলেণ্ডে জয়লাভ কৰি ট্ৰফী নিজৰ নামত কৰে । শৃংখলাৰ অন্তিমখন মেচ এতিয়া চাউথহ্যাম্পটনত অনুষ্ঠিত হ’ব, য’ত ভাৰতে সন্মান ৰক্ষাৰ বাবে খেলিব ।

লগতে পঢ়ক : ক্ৰিকেট ইতিহাসৰ লজ্জাজনক পৰাজয়! ইংলেণ্ডৰ বিৰুদ্ধে ১২৫ ৰানত ধৰাশায়ী টীম ইণ্ডিয়া