দেওবাৰে আয়াৰলেণ্ডৰ বিৰুদ্ধে টি-২০ শৃংখলাত টীম ইণ্ডিয়া ক্লীন চুইপ হোৱাৰ পিছত আইচলেণ্ড ক্ৰিকেটে এটা পোষ্ট শ্বেয়াৰ কৰিছে। য’ত গৌতম গম্ভীৰক ইতিকিং কৰিছে।

ভাৰতীয় দলৰ মুখ্য প্ৰশিক্ষকৰ দায়িত্ব লোৱাৰ পিছৰে পৰা গৌতম গম্ভীৰৰ নামত কেইবাটাও লজ্জাজনক পৰাজয়ৰ অভিলেখ যোগ হৈছে। ঘৰুৱা মাটিত নিউজিলেণ্ডৰ বিৰুদ্ধে প্ৰথমবাৰৰ বাবে হোৱা ক্লীন চুইপ হওক বা শ্ৰীলংকাত দীৰ্ঘদিনৰ মূৰত এদিনীয়া শৃংখলাত পৰাজয়। এতিয়া আয়াৰলেণ্ডৰ দৰে দুৰ্বল বুলি গণ্য কৰা দলটোৰ বিৰুদ্ধে টি-২০ শৃংখলাত ক্লীন চুইপ টীম ইণ্ডিয়া। টিম ইণ্ডিয়াৰ এই লজ্জাজনক পৰাজয়ৰ কিছু ঘণ্টাৰ পিছতেই সোমবাৰে (২৯ জুন) আইচলেণ্ড ক্ৰিকেটৰ তৰফৰ পৰা এক্স যোগে ভাৰতৰ মুখ্য প্ৰশিক্ষক গৌতম গম্ভীৰক লৈ কটাক্ষ কৰা হয়।

ছচিয়েল মিডিয়াত ভাইৰেল হৈ পৰা এই পোষ্টটোত আইচলেণ্ড ক্ৰিকেটে বৰ্ণনা কৰিছে যে তেওঁলোকৰ প্ৰশিক্ষকৰ তালিকাত গম্ভীৰক অন্তৰ্ভুক্ত কৰাৰ কোনো পৰিকল্পনা নাই। লগতে লিখিছে যে তাৰকা খেলুৱৈৰে ভৰা ভাৰতীয় দলটোক আয়াৰলেণ্ডৰ বিৰুদ্ধে শৃংখলাত পৰাস্ত কৰাৰ দৰে উল্লেখযোগ্য কাম কৰিবলৈ বিশেষ প্ৰতিভাৰ প্ৰয়োজন আছে।

আইচলেণ্ড ক্ৰিকেটে এক্সত লিখিছে, “আমি নিশ্চিত কৰিব পাৰো যে আমি গৌতম গম্ভীৰক আমাৰ প্ৰশিক্ষকৰ দলত অন্তৰ্ভুক্ত কৰিবলৈ বিচৰা নাই। অৱশ্যে, তেওঁ স্পষ্টভাৱে প্ৰতিভাশালী। সেই ভাৰতীয় খেলুৱৈসকলৰ সৈতে আয়াৰলেণ্ডত এনে ফলাফল প্ৰদান কৰাটো সঁচাকৈয়ে অসাধাৰণ ‘উপহাৰ’ৰ প্ৰয়োজন।”

টি-২০ বিশ্বকাপৰ খিতাপ সফলতাৰে ৰক্ষা কৰাৰ মাত্ৰ তিনিমাহৰ পাছতেই ভাৰতে শ্ৰেয়াছ আয়াৰৰ অধিনায়কত্বত দুখন মেচৰ টি-২০ শৃংখলা খেলিবলৈ আয়াৰলেণ্ডত উপস্থিত হৈছিল।কিন্তু দলটোৱে দুয়োখন মেচতে পৰাজয়ৰ সন্মুখীন হয়। বেলফাস্টত খেলা প্ৰথমখন মেচত ভাৰতে ৩৪ ৰানত পৰাজয় বৰণ কৰে, আনহাতে দেওবাৰে বৰষুণৰ দ্বাৰা প্ৰভাৱিত দ্বিতীয়খন টি-২০আই মেচত আয়াৰলেণ্ডে ১ ৰানত জয়ী হয়। দুয়োখন মেচতে ভাৰতীয় বলাৰসকলে ভাল প্ৰদৰ্শন আগবঢ়াইছিল যদিও বেটিঙৰ দিশটো সম্পূৰ্ণৰূপে বিফল হয়।

অধিনায়ক শ্ৰেয়াছ আয়াৰ আৰু টি-২০ বিশ্বকাপ ২০২৬ৰ প্লেয়াৰ অৱ দ্য টুৰ্ণামেণ্ট সঞ্জু ছেমছনকে ধৰি কেইবাজনো ডাঙৰ তাৰকা খেলুৱৈয়ে গোটেই শৃংখলাটোত কোনো প্ৰভাৱ পেলাবলৈ সক্ষম নহ’ল। একেৰাহে প্ৰথম দুখন টি-২০ত পৰাস্ত হোৱা মাত্ৰ দ্বিতীয়জন ভাৰতীয় অধিনায়ক হোৱাৰ পিছত এতিয়া ইংলেণ্ডৰ বিৰুদ্ধে অনুষ্ঠিত হ’বলগীয়া পাঁচখন টি-২০ শৃংখলাত পুনৰ প্ৰত্যাৱৰ্তন কৰিবলৈ আগ্ৰহী আয়াৰ।

ভাৰত এই সপ্তাহৰ শেষৰ ফালে ইংলেণ্ড ভ্ৰমণৰ বাবে ৰাওনা হ’ব। প্ৰথমখন টি-২০আই ১ জুলাইত চেষ্টাৰ-লে-ষ্ট্ৰীটৰ ৰিভাৰচাইড গ্ৰাউণ্ডত অনুষ্ঠিত হ’ব, আনহাতে দ্বিতীয়খন মেচ ৪ জুলাইত অ’ল্ড ট্ৰেফৰ্ডত অনুষ্ঠিত হ’ব । বাকী তিনিখন টি-২০ আই ৭, ৯ আৰু ১১ জুলাইত নটিংহাম, ব্রিষ্টল, আৰু চাউথমপটনত অনুষ্ঠিত হ’ব ।

লগতে পঢ়ক: ফুটবলৰ ইতিহাসত কানাডাৰ সোণালী অধ্যায়; ১-০ গ’লত জয়লাভেৰে প্ৰি-কোৱাৰ্টাৰ ফাইনেলত স্থান নিশ্চিত

শুকুৰবাৰৰ পৰা আৰম্ভ হৈছে ভাৰতীয় টি-২০ ক্ৰিকেটত শ্ৰেয়াছৰ যুগ। অৱশ্যে ইয়াৰ আৰম্ভণি ভাল নহ’ল। শ্ৰেয়াছ আয়াৰৰ নেতৃত্বত ভাৰতীয় দলটোৱে আয়াৰলেণ্ডৰ হাতত ৩৪ ৰানত পৰাজয়ৰ সন্মুখীন হ’বলগীয়া হয়।

ভাৰত আৰু আয়াৰলেণ্ডৰ মাজত অনুষ্ঠিত হোৱা দুখন খেলৰ টি-২০ শৃংখলাৰ প্ৰথমখন খেল শুকুৰবাৰে (২৬ জুন) অনুষ্ঠিত হয়। দুয়োটা দলৰ মাজত এই খেলখন বেলফাষ্টৰ চিভিল চাৰ্ভিচ ক্ৰিকেট ক্লাবত অনুষ্ঠিত হৈছিল। খেলখনত আয়াৰলেণ্ডে ভাৰতক ৩৪ ৰানত পৰাস্ত কৰিছে। টি-২০ ক্ৰিকেটৰ ইতিহাসত এইটো প্ৰথমবাৰৰ বাবে ঘটিছে যে আয়াৰলেণ্ডে টিম ইণ্ডিয়াক পৰাস্ত কৰিছে।

অধিনায়ক হিচাপে শ্ৰেয়স আয়াৰৰ আৰম্ভণি অতি বেয়া হৈছে, কাৰণ তেওঁ প্ৰথমবাৰৰ বাবে টি-২০ত ভাৰতীয় দলৰ নেতৃত্ব দিছিল।জয়ৰ বাবে আয়াৰলেণ্ডে দিয়া ১৮৩ ৰানৰ লক্ষ্য অনুসৰণ কৰি ভাৰতীয় দলটো ১৪৮ ৰানতে অল-আউট হয়।আয়াৰলেণ্ডৰ জয়ত অভিষেককাৰী জে মুণ্ড্ৰা আৰু মেথিউ হালাৰ্ডে গুৰুত্বপূৰ্ণ ভূমিকা পালন কৰিছিল।

ভাৰতীয় দলৰ এই পৰাজয় অতি লজ্জাজনক, কাৰণ তেওঁলোকে সম্পূৰ্ণ ২০ অভাৰ বেটিং কৰিবও নোৱাৰিলে। ৭টা বল বাকী থাকোতেই ভাৰতীয় দলটো অল-আউট হৈ পেভেলিয়ান উভতি যায়। টিম ইণ্ডিয়াৰ হৈ কেৱল অভিষেক শৰ্মাই এটা ডাঙৰ ইনিংছ খেলিবলৈ সক্ষম হয়, যিয়ে ২০টা বলত ৫০ ৰানৰ এক ইনিংছ খেলে। অভিষেকে এই ইনিংছত ৭টা চাৰি আৰু ২টা ছয় কোবায়।

টি-২০ ক্ৰিকেটৰ ইতিহাসত ভাৰত আৰু আয়াৰলেণ্ডৰ প্ৰথমখন মেচ ২০০৯ চনত হৈছিল। তাৰ পিছৰ পৰা বিগত ১৭ বছৰত দুয়োটা দল ৮বাৰ মুখামুখি হৈছিল, কিন্তু প্ৰতিবাৰেই টিম ইণ্ডিয়াই একপক্ষীয়ভাৱে জয়লাভ কৰি আহিছিল। কিন্তু ২৬ জুন, ২০২৬ চনৰ দিনটো আয়াৰলেণ্ড দলে সদায় মনত ৰাখিব, কাৰণ এই দিনটোতেই টি-২০ত ভাৰতৰ বিৰুদ্ধে তেওঁলোকৰ পৰাজয়ৰ ধাৰাবাহিকতা ভংগ হ’ল।

লগতে পঢ়ক: টিম ইণ্ডিয়াৰ প্লেয়িং একাদশত স্থান নাপালে বৈভৱ সূৰ্যবংশীয়ে; অধিনায়ক শ্ৰেয়াছ আয়াৰে জনালে কাৰণ