টি-২০ বিশ্বকাপ ২০২৬ এতিয়া এনে এটা পৰ্যায়ত উপনীত হৈছে য’ত প্ৰতিখন মেচেই হ’ব পাৰে এটা দলৰ বাবে অন্তিম মেচ ।
টি-২০ বিশ্বকাপ ২০২৬ এতিয়া এনে এটা পৰ্যায়ত উপনীত হৈছে য’ত প্ৰতিখন মেচেই হ’ব পাৰে এটা দলৰ বাবে ‘জীৱনদান’ বা ‘বিদায়’ । ইতিমধ্যে লীগ পৰ্যায়ৰ মাজভাগত নেপাল, ওমান, নামিবিয়া বাহিৰ হৈছে । ইয়াৰ পিছত এতিয়া পাকিস্তানকে ধৰি পাঁচটা দল আছে, যাৰ ছুপাৰ ৮ত স্থান সম্পূৰ্ণৰূপে নিৰ্ভৰ কৰিব তেওঁলোকৰ আগন্তুক মেচৰ ফলাফলৰ ওপৰত ।
পাকিস্তানৰ শেষ সুযোগ-
ভাৰতৰ বিৰুদ্ধে হোৱা শোচনীয় পৰাজয়ে পাকিস্তানৰ পৰিস্থিতি অত্যন্ত কঠিন কৰি তুলিছে । এই পৰাজয়ে কেৱল পইণ্ট টেবুলতে নহয় দলটোৰ নেট ৰান ৰেটতো প্ৰভাৱ পেলাইছে । বৰ্তমান গ্ৰুপ এৰ তৃতীয় স্থানত থকা পাকিস্তানৰ পৰৱৰ্তী মেচখন অতি গুৰুত্বপূৰ্ণ । যদিহে দলটোৱে লীগৰ অন্তিমখন খেলত জয়ী হ’ব নোৱাৰে তেন্তে তেওঁলোকৰ টি-২০ বিশ্বকাপৰ যাত্ৰা শেষ হ’ব পাৰে । এই মেচখন তেওঁলোকৰ বাবে অত্যন্ত গুৰুত্বপূৰ্ণ ।
কঠিন প্ৰত্যাহ্বানৰ সন্মুখীন নেদাৰলেণ্ড-
গ্ৰুপ এৰ দ্বিতীয় দল নেদাৰলেণ্ডো বিপদৰ পৰা বাহিৰ হোৱা নাই । তেওঁলোকৰ পৰৱৰ্তী মেচ হ’ব শক্তিশালী ভাৰতীয় দলৰ বিৰুদ্ধে, যিটো দলে একেৰাহে জয়ৰ সৈতে উৎকৃষ্ট ফৰ্মত আছে । গতিকে নেদাৰলেণ্ডৰ বাবে জয় সহজ নহ’ব । এই মেচত পৰাস্ত হ’লে নেদাৰলেণ্ড ছুপাৰ ৮ৰ দৌৰৰ পৰা বাহিৰ হোৱাটো প্ৰায় নিশ্চিত ।
আয়াৰলেণ্ড আৰু স্কটলেণ্ডৰ সংগ্ৰাম-
গ্ৰুপ বিত আয়াৰলেণ্ডৰ স্থান যথেষ্ট দুৰ্বল । তিনিখন মেচত মাত্ৰ এখনত জয় লাভ কৰি পইণ্ট টেবুলত পিছ পৰি আছে দলটো । এতিয়া বাকী থকা মেচবোৰত জয়ী হ’ব লাগিব দলটো । স্কটলেণ্ডৰ পৰিস্থিতিও একেধৰণৰ । গ্ৰুপ চিত থকা তেওঁলোকে এতিয়ালৈকে মাত্ৰ এটা জয়হে লাভ কৰিবলৈ সক্ষম হৈছে আৰু আগবাঢ়ি যাবলৈ আগন্তুক মেচসমূহত ভাল প্ৰদৰ্শন কৰিব লাগিব ।
আশা সজীৱ ৰাখিছে আফগানিস্তানে-
বিগত সংস্কৰণৰ টি-২০ বিশ্বকাপৰ ছেমি ফাইনেলত প্ৰৱেশ কৰা আফগানিস্তানৰ দলটোৱে এইবাৰ আশানুৰূপ প্ৰদৰ্শন কৰিব পৰা নাই । প্ৰথম মেচত পৰাজয়ে ছুপাৰ এইটছলৈ যোৱাৰ পথ কঠিন হৈ পৰিছে দলটোৰ । অৱশ্যে সোমবাৰে ইউ এ ইৰ বিৰুদ্ধে অনুষ্ঠিত হোৱা মেচত জয়লাভ কৰি ছুপাৰ এইটৰ আশা কিছু সজীৱ কৰিছে দলটোৱে ।
লগতে পঢ়ক : পাকিস্তানক ধূলিসাৎ কৰি ইতিহাস ৰচিলে টীম ইণ্ডিয়াই, সূৰ্য বাহিনীৰ সন্মুখত পাকিস্তানৰ আত্মসমৰ্পণ
