শুকুৰবাৰে সন্ধিয়া ৰাজ্যখনৰ নৱ-নিৰ্বাচিত বিধায়িনী দলৰ নেতা শুভেন্দু অধিকাৰীয়ে ৰাজ্যপাল আৰ এন ৰবিক সাক্ষাৎ কৰে
পশ্চিমবংগৰ ৰাজনৈতিক ইতিহাসত এক অভূতপূৰ্ব পৰিৱৰ্তনৰ সূচনা কৰি শুকুৰবাৰে সন্ধিয়া ৰাজ্যখনৰ নৱ-নিৰ্বাচিত বিধায়িনী দলৰ নেতা শুভেন্দু অধিকাৰীয়ে ৰাজ্যপাল আৰ এন ৰবিক সাক্ষাৎ কৰে । এই সাক্ষাৎকালত তেওঁ চৰকাৰ গঠনৰ বাবে আনুষ্ঠানিকভাৱে দাবী উত্থাপন কৰে । ইয়াৰ লগে লগে ৰাজ্যখনত প্ৰথমবাৰৰ বাবে ভাৰতীয় জনতা পাৰ্টিৰ শাসন প্ৰতিষ্ঠা হোৱাটো নিশ্চিত হৈ পৰিল ।
নেতৃত্ব নিৰ্বাচন আৰু ৰাজভৱন যাত্ৰা-
শুকুৰবাৰে কলকাতাত কেন্দ্ৰীয় গৃহমন্ত্ৰী অমিত শ্বাহৰ সভাপতিত্বত অনুষ্ঠিত বিজেপি বিধায়িনী দলৰ গুৰুত্বপূৰ্ণ বৈঠকত শুভেন্দু অধিকাৰীক সৰ্বসন্মতিক্ৰমে নেতা নিৰ্বাচিত কৰা হয় । ইয়াৰ পাছতেই দিলীপ ঘোষ, লকেট চেতাৰ্জী আৰু তাপস ৰায়ৰ দৰে জ্যেষ্ঠ নেতাসকলক লগত লৈ অধিকাৰীয়ে ৰাজভৱনলৈ গৈ চৰকাৰ গঠনৰ দাবী জনায় ।
ৰাইজৰ প্ৰতিশ্ৰুতি পূৰণৰ সংকল্প-
নেতা নিৰ্বাচিত হোৱাৰ পাছত সংবাদ মাধ্যমৰ আগত শুভেন্দু অধিকাৰীয়ে কয়, “মই ৰাষ্ট্ৰীয় সভাপতি আৰু অমিত শ্বাহৰ প্ৰতি কৃতজ্ঞ । প্ৰধানমন্ত্ৰীৰ আশীৰ্বাদ আৰু বিধায়কসকলৰ সমৰ্থনত মই এই দায়িত্ব লাভ কৰিছোঁ । নিৰ্বাচনৰ সময়ত আমি যিবোৰ প্ৰতিশ্ৰুতি দিছিলোঁ, সেই সকলোবোৰ জনকল্যাণৰ স্বাৰ্থত পূৰণ কৰা হ’ব ।”
নিশিথ প্ৰমাণিকৰ সমৰ্থন-
বিজেপি নেতা নিশিথ প্ৰমাণিকে অধিকাৰীক সমৰ্থন কৰি কয় যে বংগক বৰ্তমান শুভেন্দু অধিকাৰীৰ দৰে এজন বলিষ্ঠ নেতাৰ প্ৰয়োজন । তেওঁ উল্লেখ কৰে যে সীমান্ত সুৰক্ষা আৰু অনুপ্ৰৱেশ ৰোধ কৰাটোৱেই নতুন চৰকাৰৰ প্ৰধান লক্ষ্য হ’ব ।
ঐতিহাসিক জয়ৰ খতিয়ান-
২০২৬ চনৰ এই বিধানসভা নিৰ্বাচনত বিজেপিয়ে মুঠ ২০৭খন আসন লাভ কৰি একক সংখ্যাগৰিষ্ঠতা অৰ্জন কৰে । আনহাতে, বিগত ১৫ বছৰ ধৰি শাসনত থকা তৃণমূল কংগ্ৰেছ মাত্ৰ ৮০খন আসনতে সীমাবদ্ধ থাকে । উল্লেখযোগ্য যে, শুভেন্দু অধিকাৰীয়ে ভৱানীপুৰ সমষ্টিত বিদায়ী মুখ্যমন্ত্ৰী মমতা বেনাৰ্জীক ১৫,০০০ তকৈও অধিক ভোটৰ ব্যৱধানত পৰাস্ত কৰি এক ৰাজনৈতিক চমক সৃষ্টি কৰিছে ।
শপত গ্ৰহণ অনুষ্ঠান বিশ্বকবি ৰবীন্দ্ৰনাথ ঠাকুৰৰ জন্ম জয়ন্তীৰ পবিত্ৰ দিনটোতে অৰ্থাৎ শনিবাৰে শুভেন্দু অধিকাৰীয়ে পশ্চিমবংগৰ প্ৰথমগৰাকী বিজেপি মুখ্যমন্ত্ৰী হিচাপে শপত গ্ৰহণ কৰিব । এই অনুষ্ঠানক লৈ এতিয়া সমগ্ৰ ৰাজ্যজুৰি উছাহৰ পৰিৱেশ বিৰাজ কৰিছে ।
লগতে পঢ়ক : বিজেপিৰ কান্ধত ‘সোণাৰ বাংলা’ গঢ়াৰ দায়িত্ব, পশ্চিমবংগৰ ভৱিষ্যতক লৈ অমিত শ্বাহৰ ডাঙৰ ঘোষণা
