এপষ্টেইন ফাইলত প্ৰকাশ পোৱা তথ্যই বিগত পাঁচ বছৰত পাঁচজন প্ৰধানমন্ত্ৰীক দেখা পোৱা যুক্তৰাজ্য চৰকাৰক জোকাৰি গৈছে ।
শেহতীয়াকৈ ব্ৰিটেইনত প্ৰচণ্ড ৰাজনৈতিক অস্থিৰতাৰ সৃষ্টি হৈছে । এপষ্টেইন ফাইলত প্ৰকাশ পোৱা তথ্যই বিগত পাঁচ বছৰত পাঁচজন প্ৰধানমন্ত্ৰীক দেখা পোৱা যুক্তৰাজ্য চৰকাৰক জোকাৰি গৈছে । ৰাজনৈতিক বিশ্লেষকে আন এজন প্ৰধানমন্ত্ৰীয়ে পদত্যাগ কৰিব পাৰে বুলি ভৱিষ্যদ্বাণী কৰিছে । বাতৰি অনুসৰি প্ৰধানমন্ত্ৰী কেইৰ ষ্টাৰ্মাৰৰ সহযোগীসকলে ধাৰাবাহিকভাৱে পদত্যাগ কৰিছে ।
সোমবাৰে প্ৰধানমন্ত্ৰীৰ যোগাযোগ সঞ্চালক টিম এলেনে পদত্যাগ কৰে । ইয়াৰ পূৰ্বে ষ্টাৰ্মাৰৰ চীফ অফ ষ্টাফ মৰ্গান মেকছুইনীয়ে ৮ ফেব্ৰুৱাৰীত পদত্যাগ কৰিছিল । কেইৰ ষ্টাৰ্মাৰৰ পদত্যাগৰ চৰ্চাৰ মাজতে দেশৰ পৰৱৰ্তী প্ৰধানমন্ত্ৰীৰ সম্ভাৱনাক লৈ এতিয়া ব্ৰিটিছ ৰাজনৈতিক মহলত হুলস্থুলীয়া পৰিৱেশৰ সৃষ্টি হৈছে ।
ইয়াৰ ভিতৰত শ্বাবানা মাহমুদ এটা গুৰুত্বপূৰ্ণ নাম । বৰ্তমান শ্বাবানা মাহমুদ এগৰাকী বিশিষ্ট ব্ৰিটিছ ৰাজনীতিবিদ । বৰ্তমান তেওঁ দেশখনৰ গৃহ সচিবৰ পদত অধিষ্ঠিত । লেবাৰ পাৰ্টিৰ এগৰাকী জ্যেষ্ঠ নেত্ৰী হিচাপে শেহতীয়াকৈ ব্ৰিটিছ ৰাজনীতিত কেইৰ ষ্টাৰ্মাৰৰ নেতৃত্বক লৈ হোৱা সংকটৰ মাজতে পৰৱৰ্তী প্ৰধানমন্ত্ৰী হোৱাৰ দৌৰত আগশাৰীৰ প্ৰতিদ্বন্দ্বী হিচাপে আত্মপ্ৰকাশ কৰিছে শ্বাবানাই । যদি তেওঁ প্ৰধানমন্ত্ৰী হয় তেন্তে ব্ৰিটেইনৰ প্ৰথমগৰাকী মুছলমান প্ৰধানমন্ত্ৰী হ’ব, যিয়ে এই ইউৰোপীয় দেশখন এক নতুন ইতিহাস ৰচিব ।
বৰ্তমানৰ প্ৰধানমন্ত্ৰী কেইৰ ষ্টাৰ্মাৰৰ ঘনিষ্ঠ সহযোগী শ্বাবানা মাহমুদ । অনুপ্ৰৱেশকাৰীৰ কন্যা হোৱাৰ পিছতো শ্বাবানা মাহমুদে ব্ৰিটেইনত অনুপ্ৰৱেশৰ ক্ষেত্ৰত শক্তিশালী স্থিতি গ্ৰহণ কৰিছে, যাৰ ফলত তেওঁ লেবাৰ পাৰ্টিৰ প্ৰিয় হৈ পৰিছে ।
গৃহ সচিব হিচাপে তেওঁ অকৰ্তৃত্বশীল অনুপ্ৰৱেশক দমন কৰা, সীমান্ত নিয়ন্ত্ৰণ কঠোৰ কৰা, স্থায়ী বাসস্থানৰ বাবে যোগ্যতাৰ সময়সীমা বৃদ্ধি কৰা (৫ বছৰৰ পৰা ১০ বছৰলৈ) আদি পদক্ষেপ গ্ৰহণ কৰিছে । এই কাৰণেই অনুপ্ৰৱেশকাৰীৰ কন্যা হোৱাৰ পিছতো এই বিষয়ত তেওঁ কঠোৰপন্থী হিচাপে পৰিচিত ।
ইয়াৰ পূৰ্বে ন্যায় মন্ত্ৰী হিচাপে তেওঁ কাৰাগাৰ সংস্কাৰ, শাস্তি প্ৰদান আৰু মানৱ অধিকাৰৰ কাম কৰিছিল । মাৰ্গাৰেট থেচাৰ আৰু বেনজিৰ ভুট্টোক তেওঁ নিজৰ প্ৰেৰণা বুলি গণ্য কৰে ।
উল্লেখ্য যে, পাক অধিকৃত কাশ্মীৰৰ মিৰপুৰৰ পৰা অহা শ্বাবানা মাহমুদক ষ্টাৰ্মাৰৰ ঘনিষ্ঠ, অভিজ্ঞ আৰু সুস্থিৰ বিকল্প হিচাপে দেখা গৈছে ।
ষ্টাৰ্মাৰৰ ওপৰত পদত্যাগৰ হেঁচা!
শেহতীয়াকৈ এপষ্টেইন ফাইলছ আৰু পিটাৰ মেণ্ডেলছনক লৈ হোৱা বিতৰ্কই কেইৰ ষ্টাৰ্মাৰৰ ওপৰত হেঁচা বৃদ্ধি কৰিছে । লেবাৰ পাৰ্টিৰ ভিতৰত অসন্তুষ্টি, পদত্যাগ আৰু অনুমোদনৰ ৰেটিং কম হোৱাটোৱে নেতৃত্ব পৰিৱৰ্তনৰ জল্পনা-কল্পনাৰ ইন্ধন যোগাইছে ।
লগতে পঢ়ক : ৰাছিয়াৰ তেল ক্ৰয়ৰ ক্ষেত্ৰত কি হ’ব ভাৰতৰ স্থিতি ? স্পষ্ট কৰিলে বৈদেশিক সচিব বিক্ৰম মিশ্ৰীয়ে
