ৰোজগাৰ মেলা অভিযানৰ অধীনত নতুনকৈ নিযুক্তি পোৱা ৫১,০০০ তকৈও অধিক প্ৰাৰ্থীৰ মাজত চৰকাৰী চাকৰিৰ নিযুক্তি পত্ৰ বিতৰণ
সমগ্ৰ দেশৰ যুৱপ্ৰজন্মৰ কৰ্মসংস্থাপন আৰু সৱলীকৰণৰ দিশত এক ডাঙৰ পদক্ষেপ গ্ৰহণ কৰি প্ৰধানমন্ত্ৰী নৰেন্দ্ৰ মোদীয়ে শনিবাৰে ‘ৰোজগাৰ মেলা‘ অভিযানৰ অধীনত নতুনকৈ নিযুক্তি পোৱা ৫১,০০০ তকৈও অধিক প্ৰাৰ্থীৰ মাজত চৰকাৰী চাকৰিৰ নিযুক্তি পত্ৰ বিতৰণ কৰে ।
এই উপলক্ষে নতুনকৈ নিযুক্তি পোৱা যুৱক-যুৱতীসকলক অভিনন্দন জনাই প্ৰধানমন্ত্ৰীগৰাকীয়ে কয় যে তেওঁলোকে দেশৰ বাবে এক অত্যন্ত গুৰুত্বপূৰ্ণ সন্ধিক্ষণত নিজৰ কৰ্তব্যত ভৰি দিছে । সমবেত নবীন বিষয়াসকলক উদ্দেশ্যি তেওঁ কয়, “আজি ৫১,০০০ তকৈও অধিক যুৱক-যুৱতীয়ে চৰকাৰী চাকৰিৰ নিযুক্তি পত্ৰ লাভ কৰিছে । আজি আপোনালোক সকলোৱে দেশৰ উন্নয়নৰ যাত্ৰাত একোগৰাকী গুৰুত্বপূৰ্ণ আৰু দায়িত্বশীল অংশীদাৰ হৈ পৰিছে ।”
প্ৰধানমন্ত্ৰী মোদীয়ে এই কথাৰ ওপৰত বিশেষভাৱে জোৰ দিয়ে যে এই নতুন নিযুক্তি কেৱল একোটা চাকৰিয়েই নহয়, বৰঞ্চ ই দেশখনক আগবঢ়াই নিয়াত মুখ্য ভূমিকা ল’বলগীয়া কেইবাটাও গুৰুত্বপূৰ্ণ খণ্ডৰ সৈতে জড়িত । তেওঁ লগতে কয়, “আপোনালোক সকলোৱে ৰেলৱে, বেংকিং, প্ৰতিৰক্ষা, স্বাস্থ্য, শিক্ষা আৰু অন্যান্য বহুতো গুৰুত্বপূৰ্ণ খণ্ডত নতুন দায়িত্ব গ্ৰহণ কৰিবলৈ ওলাইছে । অনাগত বছৰবোৰত এখন ‘উন্নত ভাৰত’ গঢ়ি তোলাৰ যি সংকল্প লোৱা হৈছে, তাক পূৰণ কৰাত আপোনালোক সকলোৰে ভূমিকা অপৰিহাৰ্য হ’ব ।”
উল্লেখযোগ্য যে, কেন্দ্ৰীয় চৰকাৰৰ এই ‘ৰোজগাৰ মেলা’ অভিযানটো দেশত কৰ্মসংস্থাপন সৃষ্টি আৰু যুৱ সবলীকৰণৰ ধাৰাবাহিক প্ৰয়াসৰ এক অন্যতম অংশ । বিভিন্ন কেন্দ্ৰীয় মন্ত্ৰালয়, বিভাগ আৰু ৰাজ্যিক প্ৰশাসনত এনেদৰে নতুন প্ৰতিভাক অন্তৰ্ভুক্ত কৰি চৰকাৰী ৰাজহুৱা সেৱা প্ৰদান ব্যৱস্থাক অধিক ক্ষিপ্ৰ আৰু জনমুখী কৰাৰ লক্ষ্য লোৱা হৈছে ।
এই ৰোজগাৰ মেলাসমূহত মূলতঃ ১৮ ৰ পৰা ৩৫ বছৰ বয়সৰ যুৱক-যুৱতীসকলক লক্ষ্য কৰি লোৱা হয় । য’ত অষ্টম, দশম আৰু দ্বাদশ শ্ৰেণী উত্তীৰ্ণ হোৱাৰ পৰা আৰম্ভ কৰি আইটিআই (ITI), ডিপ্লমা আৰু স্নাতক ডিগ্ৰীধাৰীসহ বিভিন্ন শৈক্ষিক অৰ্হতা সম্পন্ন প্ৰাৰ্থীয়ে অংশগ্ৰহণ কৰাৰ সুযোগ পায় । ইয়াৰ উপৰিও ৰাষ্ট্ৰীয় দক্ষতা অৰ্হতা ফ্ৰেমৱৰ্ক (NSQF) অনুসৰি প্ৰশিক্ষণপ্ৰাপ্ত আৰু প্ৰমাণিত প্ৰাৰ্থীসকলকো ইয়াত অন্তৰ্ভুক্ত কৰা হৈছে ।
সংশ্লিষ্ট জিলাখন আৰু ইয়াৰ আশে-পাশে থকা মহাবিদ্যালয়, বিশ্ববিদ্যালয়সমূহত প্ৰিণ্ট বিজ্ঞাপন, বাল্ক এছএমএছ (SMS), ছচিয়েল মিডিয়া আৰু বিশেষ কৰ্মশালাৰ আয়োজন কৰি চাকৰি প্ৰাৰ্থীসকলক একত্ৰিত কৰাৰ লগতে এই মেলাৰ বিষয়ে বহুলভাৱে অৱগত কৰা হয় । চৰকাৰৰ এই উদ্যোগে দেশৰ শিক্ষিত নিবনুৱা যুৱক-যুৱতীসকলৰ মাজত এক নতুন আশাৰ সঞ্চাৰ কৰিছে ।
লগতে পঢ়ক : পুনৰ মাধমাৰ; ১০ দিনৰ ভিতৰত তৃতীয়বাৰলৈ বৃদ্ধি পেট্ৰ’ল-ডিজেলৰ মূল্য
