দেওবাৰে বিয়লি ৰাজধানী দিল্লীত উপস্থিত হয় ইউৰোপীয় পৰিষদৰ সভাপতি এণ্টনিঅ’ লুইছ ছান্টোছ দা কোষ্টা আৰু ইউৰোপীয় আয়োগৰ সভাপতি উৰ্চুলা ভন ডেৰ লেয়েন । গণৰাজ্য দিৱস উদযাপনত অংশগ্ৰহণ কৰিব দুয়োগৰাকীয়ে ।
গণৰাজ্য দিৱস উদযাপনত অংশগ্ৰহণ কৰিবলৈ ইউৰোপীয় পৰিষদৰ সভাপতি এণ্টনিঅ’ লুইছ ছান্টোছ দা কোষ্টা আৰু ইউৰোপীয় আয়োগৰ সভাপতি উৰ্চুলা ভন ডেৰ লেয়েন দেওবাৰে বিয়লি ৰাজধানী দিল্লীত উপস্থিত হয় । দুয়োগৰাকী অতিথি উপস্থিত হোৱাৰ লগে লগে দুয়োজনকে গাৰ্ড অব্ অনাৰ দিয়া হয় । ৭৭ সংখ্যক গণৰাজ্য দিৱস উদযাপনৰ মুখ্য অতিথি হিচাপে উপস্থিত থাকিব দুয়োগৰাকী বিষয়া । ইউৰোপীয় ইউনিয়নৰ দুয়োগৰাকী শীৰ্ষ বিষয়াই ভাৰতৰ গণৰাজ্য দিৱস উদযাপনত প্ৰথমবাৰৰ বাবে একেলগে অংশগ্ৰহণ কৰিব ।
ইউৰোপীয় ইউনিয়নৰ শীৰ্ষ বিষয়া দুগৰাকী দিল্লীত উপস্থিত হোৱাৰ লগে লগে বাণিজ্য আৰু উদ্যোগ ৰাজ্য মন্ত্ৰী জিতীন প্ৰসাদাই তেওঁলোকক আদৰণি জনায় । ১৯৫০ চনৰ পৰা ভাৰতে কোনো বিদেশী দেশৰ ৰাষ্ট্ৰপতি বা প্ৰধানমন্ত্ৰীক গণৰাজ্য দিৱস উদযাপনত মুখ্য অতিথি হিচাপে আমন্ত্ৰণ জনাই আহিছে । এই পৰম্পৰাই ভাৰতৰ বৈদেশিক নীতি আৰু আন্তঃৰাষ্ট্ৰীয় সম্পৰ্কক প্ৰতিফলিত কৰে । শীতল যুদ্ধৰ সময়ত ভাৰতে নিৰপেক্ষ আন্দোলনৰ সৈতে জড়িত নেতাক আমন্ত্ৰণ জনাইছিল, আনহাতে শেহতীয়া বছৰবোৰত এই সন্মান দেশৰ ঘনিষ্ঠ আৰু কৌশলগত অংশীদাৰৰ নেতাসকলৈ প্ৰসাৰিত হৈছে ।
২৭ জানুৱাৰীত ভাৰত-ইউৰোপীয় ইউনিয়নৰ শীৰ্ষ সন্মিলন-
গণৰাজ্য দিৱস উদযাপনৰ পিছদিনা, ২৭ জানুৱাৰীত অনুষ্ঠিত হ’ব ভাৰত-ইউৰোপীয় ইউনিয়নৰ শীৰ্ষ সন্মিলন । এই বৈঠকত দুয়োপক্ষই বাণিজ্য, বিনিয়োগ, নিৰাপত্তা আৰু প্ৰযুক্তিৰ ক্ষেত্ৰত সহযোগিতাৰ বিষয়ে আলোচনা কৰিব । এই ভ্ৰমণ ভাৰত আৰু ইউৰোপীয় ইউনিয়নৰ মাজত কৌশলগত অংশীদাৰিত্ব আৰু অধিক শক্তিশালী কৰাৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে ।
লগতে পঢ়ক : ভোটদান এক ডাঙৰ দায়িত্বঃ ৰাষ্ট্ৰীয় ভোটাৰ দিৱসত প্ৰধানমন্ত্ৰী মোদীৰ বাৰ্তা
