‘কিউএছ কুৱাকুৱাৰেডী চাইমণ্ডছ’ৰ এই শেহতীয়া তালিকাত মুঠ ৫২ খন ভাৰতীয় শিক্ষানুষ্ঠান অন্তৰ্ভুক্ত হৈছে
গোলকীয় শিক্ষা জগতত পুনৰ জিলিকি উঠিল ভাৰতীয় শিক্ষানুষ্ঠান । শেহতীয়াকৈ প্ৰকাশ পোৱা মৰ্যাদাপূৰ্ণ ‘কিউএছ ৱৰ্ল্ড ইউনিভাৰ্চিটি ৰেংকিং ২০২৭’ (QS World University Rankings 2027)ত ভাৰতৰ সৰ্বোচ্চ স্থানপ্ৰাপ্ত বিশ্ববিদ্যালয় হিচাপে নিজৰ স্থান অক্ষুণ্ণ ৰাখিছে ইণ্ডিয়ান ইনষ্টিটিউট অৱ টেকন’লজী দিল্লীয়ে । গোলকীয় সূচকাংকত প্ৰতিষ্ঠানখনে ১১৮ নম্বৰ স্থানলৈ উন্নীত হৈছে, যিটো যিকোনো ভাৰতীয় প্ৰতিষ্ঠানে অৰ্জন কৰা সৰ্বকালৰ সৰ্বশ্ৰেষ্ঠ ৰেংকিঙৰ সমকক্ষ ।
‘কিউএছ কুৱাকুৱাৰেডী চাইমণ্ডছ’ৰ এই শেহতীয়া তালিকাত মুঠ ৫২ খন ভাৰতীয় বিশ্ববিদ্যালয় অন্তৰ্ভুক্ত হৈছে । ইয়াৰ সৈতে ভাৰত এতিয়া বিশ্বৰ পঞ্চম আটাইতকৈ বেছি প্ৰতিনিধিত্ব থকা উচ্চ শিক্ষা ব্যৱস্থা হিচাপে পৰিগণিত হৈছে । উল্লেখনীয় যে, ২০১৭ চনৰ (১৪ খন প্ৰতিষ্ঠান) তুলনাত ভাৰতৰ এই প্ৰতিনিধিত্ব ২৭১ শতাংশ বৃদ্ধি পাইছে, যিটো জি-২০ ৰাষ্ট্ৰসমূহৰ ভিতৰত আটাইতকৈ দ্ৰুততম বৃদ্ধি ।
কোনখন প্ৰতিষ্ঠানৰ স্থান কিমান ?
এইবাৰ ৰেংকিঙত অংশ লোৱা আধাতকৈও অধিক ভাৰতীয় বিশ্ববিদ্যালয়ে নিজৰ প্ৰদৰ্শনৰ উন্নতি ঘটাইছে । দেশৰ প্ৰমুখ শিক্ষানুষ্ঠানসমূহৰ গোলকীয় স্থানসমূহ তলত উল্লেখ কৰা হ’ল :
আইআইটি দিল্লী : ১১৮ নম্বৰ স্থান (দেশৰ ভিতৰত প্ৰথম)
আইআইটি বোম্বাই : ১৩৪ নম্বৰ স্থান
আইআইটি মাদ্ৰাছ : ১৭০ নম্বৰ স্থান
আইআইটি খড়গপুৰ : ২০৫ নম্বৰ স্থান
আইআইটি কানপুৰ : ২২১ নম্বৰ স্থান
দিল্লী বিশ্ববিদ্যালয় : ৩২২ নম্বৰ স্থান
জামিয়া মিলিয়া ইছলামিয়া : ৬৮৬ নম্বৰ স্থান
কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানে এই সাফল্যক আদৰণি জনাই কয় যে, এই ফলাফল ৰাষ্ট্ৰীয় শিক্ষা নীতি ২০২০-ৰ অধীনত অনা সংস্কাৰসমূহৰ এক ইতিবাচক প্ৰতিফলন ।
প্ৰতিবেদন অনুসৰি ভাৰতৰ এই অগ্ৰগতি কেৱল আইআইটিসমূহৰ মাজতে সীমাবদ্ধ থকা নাই । এইবাৰ ১৮ খন ভাৰতীয় বিশ্ববিদ্যালয়ে নিজৰ সৰ্বকালৰ সৰ্বশ্ৰেষ্ঠ ৰেংকিং লাভ কৰিছে, যাৰ ভিতৰত ১৩ খনেই হৈছে অনা-আইআইটি প্ৰতিষ্ঠান । ইয়াৰ ভিতৰত জৱাহৰলাল নেহৰু বিশ্ববিদ্যালয়, বিটছ পিলানী, ভিআইটি, চণ্ডীগড় বিশ্ববিদ্যালয় আৰু শূলিনী বিশ্ববিদ্যালয় অন্যতম । বিশেষকৈ ‘ভিআইটি’য়ে ৯৪ টা স্থান আৰু ‘বিটছ পিলানী’য়ে ৯৩ টা স্থানৰ এক বিশাল জাঁপেৰে ক্ৰমে ৫৯৭ আৰু ৫৭৫ নম্বৰ স্থান দখল কৰিবলৈ সক্ষম হৈছে ।
গৱেষণাত বিশ্বৰ ভিতৰতে তৃতীয় ভাৰত :
গৱেষণা আৰু সংস্থাপনৰ ক্ষেত্ৰতো ভাৰতে নিজৰ স্থিতি মজবুত কৰিছে । ‘চাইটেশ্যন পাৰ ফেকাল্টী’ৰ ক্ষেত্ৰত ১১ খন আৰু নিয়োগকৰ্তাৰ সুনামৰ ক্ষেত্ৰত ৬ খন ভাৰতীয় বিশ্ববিদ্যালয় বিশ্বৰ শীৰ্ষ ১০০ ৰ ভিতৰত আছে । বৰ্তমান বিশ্বৰ ভিতৰতে তৃতীয় বৃহত্তম গৱেষণা উৎপাদন ভিত্তি আছে ভাৰতৰ হাতত ।
এতিয়াও আছে কিছু প্ৰত্যাহ্বান
উল্লেখনীয় সফলতাৰ মাজতো প্ৰতিবেদনত কিছু চিন্তনীয় দিশো প্ৰকাশ পাইছে । গৱেষণা আৰু সংস্থাপন বৃদ্ধি পালেও গোলকীয় পৰ্যায়ত আন্তঃৰাষ্ট্ৰীয় শিক্ষাৰ্থী আৰু বিদেশী শিক্ষকক আকৰ্ষণ কৰাৰ ক্ষেত্ৰত ভাৰতীয় বিশ্ববিদ্যালয়সমূহ এতিয়াও পিছপৰি আছে । শৈক্ষিক সুনাম আৰু আন্তঃৰাষ্ট্ৰীয়কৰণৰ ক্ষেত্ৰত ভাৰতক আৰু অধিক কাম কৰাৰ প্ৰয়োজন আছে ।
কিউএছৰ মুখ্য কাৰ্যবাহী বিষয়া জেচিকা টাৰ্নাৰে কয় যে, ১০৬ খন দেশৰ ১৫০০ তকৈও অধিক প্ৰতিষ্ঠানৰ মাজত হোৱা এই তীব্র প্ৰতিযোগিতাত ভাৰতৰ প্ৰদৰ্শনে ইয়াৰ উজ্জ্বল ভৱিষ্যতৰ দিশকে আঙুলিয়াই দিছে ।
লগতে পঢ়ক : নৱম শ্ৰেণীৰ পাঠ্যপুথিত প্ৰতিস্থাপন হ’ব ‘ডান্সিং গাৰ্ল’ৰ প্ৰকৃত ছবিঃ এনচিইআৰটিৰ সিদ্ধান্ত
