শুল্ক হ্ৰাস কৰা আমেৰিকাৰ সিদ্ধান্তক লৈ প্ৰধানমন্ত্ৰী মোদীয়ে আনন্দ প্ৰকাশ কৰিছে । বিশ্বৰ শান্তি আৰু স্থিতিশীলতাৰ বাবে ট্ৰাম্পৰ নেতৃত্বক অতি গুৰুত্বপূৰ্ণ বুলি অভিহিত কৰে প্ৰধানমন্ত্ৰীগৰাকীয়ে ।
ভাৰতৰ ওপৰত শুল্ক হ্ৰাস কৰা আমেৰিকাৰ সিদ্ধান্তক লৈ প্ৰধানমন্ত্ৰী নৰেন্দ্ৰ মোদীয়ে আনন্দ প্ৰকাশ কৰিছে । তেওঁ কয় যে ড’নাল্ড ট্ৰাম্পৰ সৈতে ফোনযোগে হোৱা কথা-বতৰাৰ পিছত দুয়োখন দেশৰ মাজত এক গুৰুত্বপূৰ্ণ বাণিজ্যিক চুক্তি ঘোষণা কৰা হয় । এই পদক্ষেপে দুয়োখন দেশৰ মাজত অৰ্থনৈতিক সহযোগিতা শক্তিশালী কৰাৰ লগতে বাণিজ্যিক সম্পৰ্ক বৃদ্ধি কৰিব । ইয়াৰ পূৰ্বে ট্ৰাম্পে ট্ৰুথছ’চিয়েলত পোষ্ট কৰি কয় যে মোদীৰ অনুৰোধত আমেৰিকাই ভাৰতৰ পৰা আমদানি কৰা সামগ্ৰীৰ ওপৰত পাৰস্পৰিক শুল্ক ২৫%ৰ পৰা ১৮%লৈ হ্ৰাস কৰিছে, যিটো শীঘ্ৰেই কাৰ্যকৰী হ’ব ।
ট্ৰাম্পৰ শুল্ক হ্ৰাসৰ ঘোষণাত আনন্দ প্ৰকাশ কৰি প্ৰধানমন্ত্ৰী মোদীয়ে কয়, “আজি মোৰ প্ৰিয় বন্ধু ৰাষ্ট্ৰপতি ট্ৰাম্পৰ সৈতে বাৰ্তালাপ কৰি আনন্দিত হৈছো । ভাৰতত নিৰ্মিত সামগ্ৰীৰ শুল্ক এতিয়া ১৮% লৈ হ্ৰাস পাব বুলি জানি মই আনন্দিত হৈছো । ভাৰতৰ ১৪০ কোটি জনসাধাৰণৰ হৈ এই ঘোষণাৰ বাবে ৰাষ্ট্ৰপতি ট্ৰাম্পক অশেষ ধন্যবাদ জনাইছো ।”
মোদীয়ে আৰু কয় যে, “যেতিয়া দুখন ডাঙৰ অৰ্থনীতি আৰু বিশ্বৰ বৃহত্তম গণতন্ত্ৰই একেলগে কাম কৰে, তেতিয়া ই আমাৰ জনসাধাৰণক উপকৃত কৰে আৰু পাৰস্পৰিকভাৱে উপকাৰী সহযোগিতাৰ বাবে অপৰিসীম সুযোগ মুকলি কৰে ।”
বিশ্বৰ শান্তি আৰু স্থিতিশীলতাৰ বাবে ট্ৰাম্পৰ নেতৃত্বক অতি গুৰুত্বপূৰ্ণ বুলি অভিহিত কৰে প্ৰধানমন্ত্ৰীগৰাকীয়ে । প্ৰধানমন্ত্ৰীগৰাকীয়ে কয়, “ৰাষ্ট্ৰপতি ট্ৰাম্পৰ নেতৃত্ব বিশ্ব শান্তি, স্থিতিশীলতা আৰু সমৃদ্ধিৰ বাবে অতি গুৰুত্বপূৰ্ণ । ভাৰতে শান্তিৰ বাবে তেওঁৰ প্ৰচেষ্টাক সম্পূৰ্ণৰূপে সমৰ্থন কৰে । তেওঁৰ সৈতে ঘনিষ্ঠভাৱে কাম কৰি আমাৰ অংশীদাৰিত্বক অভূতপূৰ্ব উচ্চতালৈ লৈ যোৱাৰ বাবে মই আগ্ৰহী ।”
ইয়াৰ পূৰ্বে ভাৰতৰ ওপৰত শুল্ক হ্ৰাস কৰাৰ কথা ঘোষণা কৰি ট্ৰাম্পে কয়, “আজি ভাৰতৰ প্ৰধানমন্ত্ৰী মোদীৰ সৈতে বাৰ্তালাপ কৰাটো মোৰ বাবে এক সন্মানৰ কথা । তেওঁ মোৰ অন্যতম ঘনিষ্ঠ বন্ধু আৰু তেওঁৰ দেশৰ এজন শক্তিশালী আৰু সন্মানীয় নেতা । আমি বাণিজ্য আৰু ৰাছিয়া-ইউক্ৰেইন যুদ্ধৰ অন্ত পেলোৱাকে ধৰি বহু বিষয়ৰ ওপৰত আলোচনা কৰিলোঁ । ভাৰতে ৰাছিয়াৰ পৰা তেল ক্ৰয় কৰা বন্ধ কৰি আমেৰিকা আৰু সম্ভৱতঃ ভেনিজুৱেলাৰ পৰা অধিক তেল ক্ৰয় কৰিবলৈ সন্মত হ’ল । ইয়াৰ দ্বাৰা ইউক্ৰেইনত চলি থকা যুদ্ধ শেষত সহায় হ’ব, যিয়ে প্ৰতি সপ্তাহত হাজাৰ হাজাৰ লোকৰ মৃত্যু ঘটাইছে !”
লগতে পঢ়ক : ভাৰতৰ ওপৰত শুল্ক হ্ৰাসৰ বৃহৎ ঘোষণা আমেৰিকাৰ…
