এই সাধাৰণ নিৰ্বাচনত বিএনপিৰ ঐতিহাসিক জয়ৰ আঁৰত আছিল তাৰিক ৰহমানৰ কৌশলগত নেতৃত্ব ।
জামাতক ধৰাশায়ী কৰি বাংলাদেশৰ শাসনৰ বাঘজৰী ল’লে বাংলাদেশ নেশ্যনেলিষ্ট পাৰ্টীয়ে । এই সাধাৰণ নিৰ্বাচনত বিএনপিৰ ঐতিহাসিক জয়ৰ আঁৰত আছিল তাৰিক ৰহমানৰ কৌশলগত নেতৃত্ব । দীৰ্ঘদিনীয়া নিৰ্বাসন আৰু ৰাজনৈতিক প্ৰত্যাহ্বানৰ মাজতো তেওঁ দলটোক একত্ৰিত কৰিছিল, যুৱ ভোটাৰক আকৰ্ষণ কৰিছিল আৰু জনসমৰ্থনৰ নতুন ঢৌৰ সৃষ্টি কৰিছিল । এই বিজয় কেৱল বিএনপিৰেই নহয় তাৰিক ৰহমানৰ নেতৃত্ব আৰু ৰাজনৈতিক দৃষ্টিভংগীৰ প্ৰতীক হৈ পৰিছে ।
এই নিৰ্বাচনী ফলাফলৰ পৰা বুজিব পৰা গৈছে যে, বাংলাদেশৰ ৰাজনীতি দশকজুৰি দুটা মুখ্য পৰিয়াল-কেন্দ্ৰিক ৰাজনৈতিক ধাৰণাৰ মাজত আৱৰ্তিত হৈ আহিছে— এফালে পদচ্যুত প্ৰধানমন্ত্ৰী শ্বেখ হাছিনা আৰু আনফালে প্ৰয়াত প্ৰাক্তন প্ৰধানমন্ত্ৰী খালেদা জিয়াৰ উত্তৰাধিকাৰ । এনে পৰিপ্ৰেক্ষিতত, ২০২৬ চনৰ নিৰ্বাচনত বিএনপিৰ জয় আৰু তাৰেক ৰহমানৰ উদীয়মান ভূমিকাই এই সংকেত দিয়ে যে দেশৰ নেতৃত্বই এতিয়া এক নতুন ৰাজনৈতিক যুগত প্ৰৱেশ কৰিব পাৰে ।
কোন হয় তাৰিক ৰহমান-
১৯৬৫ চনৰ ২০ নৱেম্বৰত জন্মগ্ৰহণ কৰা তাৰিক ৰহমান বাংলাদেশ নেশ্যনেলিষ্ট পাৰ্টিৰ জ্যেষ্ঠ নেতা আৰু দলটোৰ অধ্যক্ষ । তেওঁ দলৰ সৰ্বোচ্চ ৰাজনৈতিক সংস্থাটোৰ নেতৃত্ব দিয়ে । তেওঁ ঢাকা বিশ্ববিদ্যালয়ত অধ্যয়ন কৰি ৰাজনীতিত সক্ৰিয় ভূমিকা ল’বলৈ আৰম্ভ কৰে । বাংলাদেশৰ ইতিহাসত গভীৰভাৱে শিপাই থকা ৰাজনৈতিক পৰিয়ালত তেওঁৰ জন্ম । তেওঁৰ পিতৃ জিয়াউৰ ৰহমান বাংলাদেশৰ এজন বিশিষ্ট ৰাষ্ট্ৰপতি আৰু বিশিষ্ট স্বাধীনতা কৰ্মী আছিল, যিজনক ১৯৮১ চনত হত্যা কৰা হৈছিল ।
তাৰিকৰ মাতৃ বেগম খালেদা জিয়া ১৯৯১ চনৰ পৰা ১৯৯৬ চনলৈ আৰু ২০০১ চনৰ পৰা ২০০৬ চনলৈকে বাংলাদেশৰ প্ৰথম মহিলা প্ৰধানমন্ত্ৰী আৰু বিএনপিৰ অধ্যক্ষ আছিল । ৰাজনৈতিক জীৱনৰ প্ৰথম দিনৰ পৰাই তাৰিকে পৰিয়ালকেন্দ্ৰীক ৰাজনীতিৰ লগত জড়িত হৈ বিএনপিৰ ভিতৰ চ’ৰাত গুৰুত্বপূৰ্ণ ভূমিকা পালন কৰি আহিছে ।
কোন হয় খালেদা জিয়া ?
তাৰিক ৰহমানৰ মাতৃ তথা বাংলাদেশৰ প্ৰাক্তন প্ৰধানমন্ত্ৰী খালেদা জিয়াই ১৯৮২ চনৰ ৩ জানুৱাৰীত বিএনপিৰ সদস্য হিচাপে ৰাজনৈতিক জীৱন আৰম্ভ কৰে । পিছলৈ তেওঁ বিএনপিৰ সভানেত্ৰী হয়, যিটো পদত তেওঁ মৃত্যুৰ আগলৈকে আছিল । বাংলাদেশত সামৰিক শাসনৰ বিৰুদ্ধে বিশিষ্ট কণ্ঠস্বৰ হিচাপে আত্মপ্ৰকাশ কৰিছিল খালেদা জিয়াই । সামৰিক শাসনৰ বিৰুদ্ধে জনসাধাৰণক একত্ৰিত কৰাত গুৰুত্বপূৰ্ণ ভূমিকা পালন কৰিছিল তেওঁ ।
১৯৯১ত প্ৰথমবাৰৰ বাবে প্ৰধানমন্ত্ৰী হৈছিল জিয়া-
১৯৯১ চনত প্ৰথমবাৰৰ বাবে বাংলাদেশৰ প্ৰধানমন্ত্ৰী হৈ খালেদা জিয়াই দেশখনৰ প্ৰথম মহিলা প্ৰধানমন্ত্ৰী হোৱাৰ গৌৰৱ অৰ্জন কৰে । ইয়াৰ পিছত ২০০১ চনৰ পৰা ২০০৬ চনলৈ দ্বিতীয় কাৰ্যকালৰ বাবে কাৰ্যনিৰ্বাহ কৰে তেওঁ । ১৯৪৬ চনৰ ১৫ আগষ্টত অবিভক্ত ভাৰতৰ দিনাজপুৰ জিলাত জন্মগ্ৰহণ কৰিছিল খালেদা জিয়াই ।
খালেদাৰ পৰিয়াল জলপাইগুৰিত চাহ ব্যৱসায়ৰ লগত জড়িত আছিল । পৰৱৰ্তী সময়ত তেওঁলোক দিনাজপুৰলৈ প্ৰব্ৰজন কৰে । ১৯৬০ চনত খালেদা জিয়াই সেনাৰ কেপ্তেইন জিয়াউৰ ৰহমানৰ সৈতে বিবাহপাশত আবদ্ধ হয়, যি পিছলৈ বাংলাদেশৰ ৰাষ্ট্ৰপতি হয় । ১৯৮৩ চনত খালেদা বিএনপিৰ মুৰব্বী হোৱাত তেওঁৰ দলৰ কেইবাজনো জ্যেষ্ঠ নেতাই তেওঁৰ সামৰ্থ্যক লৈ সন্দেহ প্ৰকাশ কৰি দল ত্যাগ কৰে ।
তাৰিক ৰহমানৰ পিতৃ বাংলাদেশৰ প্ৰাক্তন ৰাষ্ট্ৰপতি-
তাৰিক ৰহমানৰ পিতৃ জিয়াউৰ ৰহমান বাংলাদেশৰ স্বাধীনতা সংগ্ৰামী আৰু দেশৰ সামৰিক-ৰাজনৈতিক নেতা আছিল । ১৯৭৫ চনত সামৰিক হস্তক্ষেপৰ অন্তত ক্ষমতালৈ আহি ১৯৭৭ চনৰ পৰা ১৯৮১ চনলৈ বাংলাদেশৰ ৰাষ্ট্ৰপতি হিচাপে কাৰ্যনিৰ্বাহ কৰি বিএনপি প্ৰতিষ্ঠা কৰি গণতান্ত্ৰিক বহুদলীয় ৰাজনীতি শক্তিশালী কৰে । ১৯৮১ চনত তেওঁক হত্যা কৰা হৈছিল যদিও বিএনপি আৰু দেশৰ ৰাজনীতিত তেওঁৰ ৰাজনৈতিক উত্তৰাধিকাৰ জীয়াই আছে ।
লগতে পঢ়ক : ‘প্ৰগতিশীল বাংলাদেশৰ সৈতে আছে ভাৰত’, ঐতিহাসিক বিজয়ৰ পিছত তাৰিক ৰহমানক অভিনন্দন প্ৰধানমন্ত্ৰী মোদীৰ
