শনিবাৰে শ্ৰীহৰিকোটাৰ পৰা উৎক্ষেপণ কৰিব স্কাইৰুট এৰ’স্পেচৰ বিক্ৰম-১ ৰকেট। এইটো ভাৰতৰ প্ৰথমটো ব্যক্তিগতভাৱে নিৰ্মিত কক্ষপথৰ ৰকেটৰ প্ৰথম উৰণ।
শনিবাৰে পুৱা ১১:৩০ বজাত শ্ৰীহৰিকোটাৰ সতীশ ধাৱন মহাকাশ কেন্দ্ৰৰ পৰা স্কাইৰুট এৰ’স্পেচৰ (Skyroot Aerospace) বিক্ৰম-১ ৰকেট উৎক্ষেপণ কৰা হ’ব। ভাৰতত কোনো ব্যক্তিগত কোম্পানীয়ে নিৰ্মাণ কৰা অৰ্বিটেল ক্লাছ ৰকেটৰ (orbital class rocket) এয়া প্ৰথম উৰণ হ’ব। এই মিছনটোৰ নাম দিয়া হৈছে ‘মিছন আগমন’।ইয়াক ভাৰতৰ ব্যক্তিগত মহাকাশ খণ্ডৰ বাবে এক ডাঙৰ আৰু ঐতিহাসিক পদক্ষেপ হিচাপে গণ্য কৰা হৈছে। প্ৰধানমন্ত্ৰী নৰেন্দ্ৰ মোদীয়ে এক্সত এটা পোষ্ট শ্বেয়াৰ কৰি ইয়াক এক ‘ঐতিহাসিক নতুন আৰম্ভণি’ বুলি অভিহিত কৰিছে।
হায়দৰাবাদৰ কোম্পানী স্কাইৰুট এৰ’স্পেচে বহু বছৰৰ পৰীক্ষণ আৰু প্ৰস্তুতিৰ অন্তত এই ৰকেটটো মুকলি কৰিবলৈ সাজু কৰি তুলিছে। প্ৰায় সাত মহলীয়া অট্টালিকাৰ সমান ওখ এই ৰকেটটোৰ সকলো জৰুৰী পৰীক্ষা সম্পূৰ্ণ হৈছে। অভিযন্তাসকলে ৰকেটটোৰ পৰীক্ষণ, টেলিমেট্ৰী পৰীক্ষা আৰু ৰাডাৰ ট্ৰেকিং আদি সকলো প্ৰক্ৰিয়া সফলতাৰে সম্পূৰ্ণ কৰিছে। স্কাইৰুটৰ সহ-প্ৰতিষ্ঠাপক তথা মুখ্য কাৰ্যবাহী বিষয়া (CEO) পৱন কুমাৰ চন্দনাই কয় যে মাটিত যিবোৰ পৰীক্ষা কৰিব লগা আছিল সেইসমূহ সকলো সম্পূৰ্ণ হৈছে আৰু এতিয়া কেৱল উৰণত ৰকেটটোৰ প্ৰদৰ্শন কেনে হয়, সেয়া চাবলৈ বাকী আছে।
এই ৰকেটটোৱে ৩৫০ কিলোগ্ৰাম পৰ্যন্ত ওজন কঢ়িয়াব পাৰে।বিক্ৰম-১ ৰকেটে বিভিন্ন কাৰিকৰী সঁজুলিক পৃথিৱীৰ পৰা ৪৫০ কিলোমিটাৰ ওপৰৰ এক বিশেষ কক্ষপথত স্থাপন কৰাৰ চেষ্টা কৰিব।ৰকেটটো কাৰ্বন কম্পোজিটৰ (carbon composite) সহায়ত তৈয়াৰ কৰা হৈছে আৰু ইয়াত কোম্পানীটোৱে নিজেই নিৰ্মাণ কৰা ইঞ্জিন ব্যৱহাৰ কৰিছে, যাৰ ভিতৰত ৩ডি প্ৰিন্টেড (3D printed) ইঞ্জিনো অন্তৰ্ভুক্ত হৈ আছে।
এই ৰকেটটোৰ জৰিয়তে গ্ৰহ স্পেচ (Graha Space), কছম’ছাৰ্ভ (Cosmoserve), ডি-কিউবড (D-Orbit / D-Qubed) আৰু স্কাইৰুটৰ নিজা পৰীক্ষামূলক সঁজুলিকে ধৰি কেইবাটাও কাৰিকৰী পেলোড প্ৰেৰণ কৰা হৈছে। ইয়াৰ উপৰিও, প্ৰধানমন্ত্ৰী নৰেন্দ্ৰ মোদীৰ হাতেৰে লিখা ‘বন্দে মাতৰম’ সম্বলিত পোষ্টকাৰ্ড, ইছৰোৰ (ISRO) বৰ্তমানৰ আৰু প্ৰাক্তন মুৰব্বীসকলৰ বাৰ্তা তথা ভাৰতীয় মহাকাশচাৰীসকলৰ বাৰ্তাও এই মিছনৰ জৰিয়তে পঠোৱা হৈছে।
কোম্পানীটোৰ দুই প্ৰতিষ্ঠাপক পৱন চন্দনা আৰু নাগা ভৰত ডাকাই পূৰ্বে ইছৰোত কাম কৰিছিল। তেওঁলোকৰ মতে, ৰকেটটোৱে সঠিকভাৱে উৰণ কৰাটোৱেই হ’ব তেওঁলোকৰ বাবে আটাইতকৈ ডাঙৰ সফলতা। ২০২২ চনত সম্পন্ন হোৱা ‘বিক্ৰম-এছ’ (Vikram-S) মিছনৰ সফলতাৰ পিছত ইয়াক পৰৱৰ্তী ডাঙৰ পদক্ষেপ বুলি ধৰা হৈছে।
যদি এই মিছন সফল হয়, তেন্তে ই ভাৰতৰ ব্যক্তিগত মহাকাশ উদ্যোগৰ বাবে এক নতুন দিগন্তৰ সূচনা কৰিব। অনাগত সময়ত ইছৰোৰ সৈতে কান্ধত কান্ধ মিলাই ব্যক্তিগত কোম্পানীসমূহেও উপগ্ৰহ উৎক্ষেপণৰ কামত আগবাঢ়ি যাবলৈ সক্ষম হ’ব।
লগতে পঢ়ক: কাইলৈ প্ৰধানমন্ত্ৰী মোদীয়ে শুভাৰম্ভ কৰিব দেশৰ প্ৰথমখন হাইড্ৰ’জেন চালিত ৰে’ল
