খালেদা জিয়াৰ পুত্ৰ তাৰিক ৰহমানৰ বাংলাদেশলৈ প্ৰত্যাৱৰ্তনৰ পিছতেই ভাৰতে প্ৰথমটো প্ৰতিক্ৰিয়া প্ৰকাশ কৰিছে । দেশখনত সংখ্যালঘুৰ বিৰুদ্ধে চলি থকা হিংসাক লৈয়ো প্ৰতিক্ৰিয়া প্ৰকাশ কৰে ভাৰতে ।
বাংলাদেশৰ প্ৰাক্তন প্ৰধানমন্ত্ৰী খালেদা জিয়াৰ পুত্ৰ তথা বাংলাদেশ নেশ্যনেলিষ্ট পাৰ্টিৰ নেতা তাৰিক ৰহমানৰ প্ৰত্যাৱৰ্তনৰ পিছতে ভাৰতে প্ৰথমটো প্ৰতিক্ৰিয়া প্ৰকাশ কৰিছে । তাৰিক ৰহমান বাংলাদেশলৈ উভতি অহাৰ পিছতে বৈদেশিক পৰিক্ৰমা মন্ত্ৰালয়ে কয় যে ভাৰতে বাংলাদেশত মুক্ত আৰু নিকা নিৰ্বাচনক সমৰ্থন কৰে । ইয়াৰ সমান্তৰালকৈ বৈদেশিক পৰিক্ৰমা মন্ত্ৰালয়ে কয় যে ভাৰতে বাংলাদেশত ঘটি থকা উন্নয়নৰ ওপৰত তীক্ষ্ণ দৃষ্টি ৰাখিছে । সংখ্যালঘুৰ ওপৰত হোৱা আক্ৰমণ সন্দৰ্ভত বৈদেশিক পৰিক্ৰমা মন্ত্ৰালয়ে কয় যে বাংলাদেশত হিন্দু, খ্ৰীষ্টান, বৌদ্ধকে ধৰি সংখ্যালঘুৰ বিৰুদ্ধে চলি থকা হিংসা গুৰুতৰ চিন্তাৰ বিষয় ।
উল্লেখ্য যে, তাৰিক ৰহমান বাংলাদেশৰ প্ৰাক্তন ৰাষ্ট্ৰপতি জিয়াউৰ ৰহমানৰ পুত্ৰ । ২০০৮ চনৰ পৰা লণ্ডনত বাস কৰি থকা তাৰিকে তাৰ পৰাই বি এন পিৰ নেতৃত্ব দি আহিছে । দুৰ্নীতি আৰু ২০০৪ চনত ঢাকা গ্ৰেনেড আক্ৰমণৰ গোচৰত দোষী সাব্যস্ত হৈছিল তাৰিক । বি এন পিৰ মতে এই গোচৰসমূহ ৰাজনৈতিক প্ৰতিশোধৰ উদ্দেশ্যে আছিল । তাৰিক ৰহমানৰ প্ৰত্যাৱৰ্তনে বি এন পিলৈ নবীকৃত শক্তি কঢ়িয়াই আনিছে যদিও দলটোক একত্ৰিত কৰি ৰখা, যুৱক-যুৱতীসকলৰ আস্থা লাভ কৰা আৰু হিংসা আৰু অস্থিৰতাৰ সৈতে যুঁজি থকা দেশখনক এক সুস্থিৰ দিশ প্ৰদান কৰা আদি প্ৰত্যাহ্বান এতিয়াও আছে ।
বৰ্তমান বাংলাদেশে ৰাজনৈতিক আৰু সামাজিক সংকটৰ সৈতে যুঁজি আছে । ফেব্ৰুৱাৰী মাহৰ নিৰ্বাচনৰ পূৰ্বে পৰিস্থিতি অধিক উত্তেজিতময় হৈ পৰিছে দেশখনত । ভাৰতৰ ঘনিষ্ঠ বুলি বিবেচিত আৱামী লীগে এইবাৰৰ নিৰ্বাচনত প্ৰতিদ্বন্দ্বিতা কৰিব নোৱাৰিব । অন্তৱৰ্তীকালীন চৰকাৰী মুৰব্বী মহম্মদ ইউনুছৰ কাৰ্যকালত দেশখন ভাৰতৰ পৰা আঁতৰি থকাৰ লগতে পাকিস্তানৰ সৈতে ঘনিষ্ঠতা বৃদ্ধি পোৱাৰ লক্ষণ দেখা গৈছে । পাকিস্তানৰ চোৰাংচোৱা সংস্থা আই এছ আইৰ সৈতে জড়িত বুলি ভাৰতে বিশ্বাস কৰা উগ্ৰ সংগঠন জামাত-ই-ইছলামী পুনৰ সক্ৰিয় হৈ পৰিছে । ভাৰত-বাংলাদেশৰ সম্পৰ্কত অতীতৰ তিক্ততা থকাৰ পিছতো ভাৰতে সেয়েহে বি এন পিক তুলনামূলকভাৱে উদাৰ আৰু গণতান্ত্ৰিক বিকল্প হিচাপে লয় ।
লগতে পঢ়ক : অস্থিৰতাৰ মাজতে নিৰ্বাসনৰ অন্ত পেলাই বাংলাদেশলৈ ঘূৰিল তাৰিক ৰহমান, ভংগ কৰিলে প্ৰতিশ্ৰুতি !
